Gulîstan Dursun

 

STENBOL - Rojnamegeran reaksîyon vera tepiştişê 26 rojnamegerê ke 5 aşmê peyîn de ameyê tepiştiş dayî û vatî: “Ma hemverê hewldayîşê krîmînalîzekerdişî kîşte çapemenîya Kurdî de yê.”

 

Çarçewa tehqîqatêkê Serdozgerîya Komare ya Anqara de 25ê teşrîna verêne de Mudira Karanê Nuşteyî yê Ajansê Mezopotamya (MA) Dîren Yurtsever, muxabîrê MA Denîz Nazlim, Selman Guzelyuz, Zemo Aggoz, Berîvan Altan, Hakan Yalçin, Emrullah Acar, Ceylan Şahînlî, muxabîrê Jinnewsî Habîbe Eren û Oznur Gunhan û stajyerê MA Mehmet Gunhan bi îşkenceyî ameybî destbendkerdene. Zemo Aggoz îfade ra dima vera dîyabi. 10 rojnamegerî 4 rojan ra dima seba îfadeyê sewqê Edlîyeya Anqara bîyî. Xeber û karê înan ê rojnamegerîye, vilakerdişê înan ê medyaya dîjîtale sey unsurê sûcdarîye pêşkêşê rojnamegeran ameyî kerdene. Îfadeyan ra dima Dîren Yurtsever, Bêrîvan Altan, Denîz Nazlim, Selman Guzelyuz, Hakan Yalçin, Ceylan Şahînlî, Emrullah Acar, Habîbe Eren û Oznur Deger bi îdîaya ‘endamîya rêxistine’ ameyî tepiştene û berdîyayî zîndanê Sîncanî.

 

Rojnamegeran derheqê babete de ercnayîş kerdî.

 

Muxabîra Agence France-Presse (AFP) Eylul Denîz yaşar da zanayîş ke sey rojanemgerêke çapemenîya Kurdî yê nêzdî ra taqîb kena û xeylêk rey çapemenîya Kurdî de babeta heqê merdiman de hîsgêr têgêrena û wina vat: “Çapemenîya Kurde tena şarî rê xizmet nêkena, çapemenîyê bînan rê zî rojeve peşkeş kena. Ewro welat de babeta aştî û demokrasî de ma vernê de JINNEWS, Ajansê Mezopotamya û Rojnameyê Yenî Yaşamî rê ewnîyenê û rojeve dîyar kenê. Ê ma rê rayberî kenê. Ma bi rojnamegerê ke ameyî tepiştiş dir pîya taqîbkerdişê xeberan kerd. Sebebê tepiştişê înan xebera înan a. Serranê 90î ra heta nika Çapemenîya Kurde bena hedef.”

 

‘Do ê destî ma rê zî derg bibê’

 

Eylule vat, qanûnê sansurî verê zî Tirkîya de fîîlî bi ca ameyo û wina vat: “Nê welatî de komêke çapemenîye seba ke xeberan viraştêne, hedef de bî. Nika bi qanûnê dezenformasyonî dir çapemenîya mîyanneteweyî tedayê serê çapemenîye ya Tirkîya bi hawayêkê somut dîne. Ganî çapemenîya mîyanneteweyî rojnamegerê ke vengê nê welatî danê eşnawitiş tewr zêde taqîb bikero. Eke ma hemverê nê teredayan serê rojnamegeran de nêvîyaye bêrê, do dore bêro ma zî û do ê destî rojêke ma rê zî derg bibê. Ganî ma wina bivînê. Ganî ma hemverê tedayan bibê veng.”

 

‘Hemverê rojnamegeranê cinîyan ê kurdan de teda di qatî ya’

 

Eylule tewr peyîn vat, vera rojnamegeranê cinîyan ê kurdan de teda di qatî ya û vat: “Meslegdarê ma demo ke bajarê rojawanê Tirkîya de rojnamegerî ameyî tepiştiş, qîyamet wedarnayî. La demo ke rojnamegerê Kurdî yê cinîyî ameyî tepiştiş, kesî veng nêkerd. Ganî ma na babete bikerê rojeva wareyê mîyanneteweyî. Ganî ma tewr zêde hewl bidê. La ma qels manenê. Ganî ma tewr zêde têkoşîn bikerê.”

 

‘Çapemenîya Kurde bêveng nêmanena’

 

Rojnameger Fatoş Edogane zî vat, îqtîdar, verê xo dayo rojnamegerê ke rastî nusenê û çapemenîya Kurde û wina vat: “Aşma Hezîrane de 16 rojnamegerî ameyî tepiştiş. Hûmara rojnamegerê ke ameyî tepiştiş bî 26. Na tedaya hemverê çapemenîya Kurde, hemverê heme çapemenîya muxalîfe yo. Ganî ma hemverê nê têkoşîn bikerê. Hewl danê çapemenîya Kurde bi pêroyî îzole bikerê. Ma veng danê heme kesan ke verê çapemenîya Kurde ca bigîrê. Ma hemverê krîmînalîzekerdişê vera çapemenîya Kurde de ca gênê.”

 

‘Nêeşkenê sere bidê tewênayîş’

 

Rojnamegere Zeynep Kuray zî vat, çîyê ke yenê ciwîyayîş şibnenê fîlmêk û vat verê zî şahidîya nê fîlmî kerdê û wina vat: “2011ine de netîceyê kumpasî de 47 rojnamegerî ameyî tepiştiş. O wext  AKP û FETO pîya kerdî. La nika AKP bi tena sereyê xo keno. Dozgerî û dadgerî o wext ma muhakeme kerdî, nika heme tepişte yê. Şima nêeşkenê sere bi ma bidê tewênayîş. Tepiştiş, destbendkerdiş nêeşkenê zorê ma berê. Ez hemverê tedayan venga serekkomar kena. Gelo ma do hemverê her eşkerayîye de vajê heya? Şima seba Roboskî eşkerayî dabî, o wext şima vatibi çi û dima ra çi vejîya werte. Komel xeyrê rayaumûmî rastî musayî. Ma do bêşik nê ser de şêrê. Tedayî nêeşkenê zorê ma berê. Ganî ma hemverê nînan de têkoşîn bikerê.”