ŞIRNEX - Aktîvîsta TJAye Guler Tunçe da zanayîş ke startê xebatanê xo yê seba 25ê Teşrîna Peyêne do Qilebanî de bidê û dîyar kerd ke do pê sloganê ‘Jin Jiyan Azadî’ na seserre bikerî seserra azadîya cinîyan.

 

Tevgerê Cinîyanê Azadan (TJA) emserr startê xebatanê xo yê seba 25ê Teşrîna Peyêne Roja Têkoşînê Vera Şîdetê Serê Cinîyan do bi sloganê ‘Hemverê faşîzm û qirkerdişê cinîyan de dem demê azadîya cinîyan o’ bidê. TJAye na çarçewe de 5ê aşme de Stenbolî de bi deklerasyonêk organîzekerdişê xebatanê xo eşkera kerd û dîyar kerd ke ê do 3 merkezan de startê xebatanê xo bidê û înan ra yew zî merkezê Şirnexî yo. Aktîvîsta TJAye Guler Tunçe derheqê babete de qisey kerd.

 

Gulere destpêkê qiseykerdişê xo de vat ke înan aşmêk verê cû çarçeweya xebatanê 25ê Teşrîna Peyêne de munaqaşayê hîrayan viraştî û domnaye: “Ma sere de Stenbol de bi deklarasyonêk xebatan eşkera kerd. Ma konferanso ke verê cû Êlih de viraştbî de xeylê qerar û babetan girewt dest. 11ê Teşrîna Peyêne de seba vîrardiş û yadkerdişê Nagîhan Akarsela ke Silêmanîyê de ameye qetilkerdiş Anqara de do bernameyêk taybet bêro viraştiş. Dima ra 12ê Teşrîna Peyêne de Wanî de şexsê Jîna Amînîye de do têkoşînê cinîyan û şarê Îranî bêro silamkerdiş. Eynî roje de ma do hemverê polîtîkayê şerê taybetî de Qilebanê Şirnexî de startê xebatanê 25ê Teşrîna Peyêne bidê destpêkerdiş û babeta ma ya yewine polîtîkayê şerê taybetî ke 7 serrî yo herêma Botanî de yena rayraberdiş a. Demê peyênan de 6 cinîyî bi hawayêko şikin ameyî qetilkerdiş. Ma do hemverê polîtîkayê ke serê cinî û ciwanan de yenê rayraberdiş de startê xo bidê.”

 

 ‘Xo rêxistinkerdiş muhîm o’

 

Gulere dewamê qiseykerdişê xo de bale ant plankerdişê xebatanê Şirnexî ke do bêrê destpêkerdiş ser vat: “Çarçeweya xebatanê ma de nuqtaya yewine rêxistinkerdiş o û pêvînayîşê bi cinîyan reyde yo. Heto bîn de babetê sey edalet, tecrîd û binpaykerdişê heqan zî mîyanê babetanê ma de ca gênê. Sewbîna zî ma do têkoşînê hemverê çekê kîmyewî, sucê şerî, polîtîkayê şerê taybet, têkoşînê hemverê qetlîyaman bikerê rojeva xo. Sernameyê ke ma konferans de girewtî dest ma do bi hawayêko hîra pê bîyarê.”

 

‘Ma do seserre bikerê azadîya cinîyan’

 

Gulere peynîya qiseykerdişê xo de veng da û vat: “Ma do hemverê polîtîkayê şerê taybet, girankerdişê tecrîd, qirkerdişê kultur, şixulnayîşê çekê kîmyewî û qirkerdişê polîtîkî de bi xurtkerdişê rêxistinbîyayîşî xebatan pê bîyarê. Ez veng dana pêro cinîyan ke çarçeweya xebat û bernameyê ma de wa bêrê têkişt û bi tewrbîyayîşêko xurt cewab bidê. Bi sloganê “Jin Jiyan Azadî” ke êdî seba ma sloganêk ra wetêr o, ma do vajî na seserre bikerê seserra azadîya cinîyan. Bêrêne ma pîya hemverê faşîzm, qirkerdişê cinîyan û girankerdişê tecrîdî de dormeyê têkoşînê azadîya cinîyan de arê bibê.”