ANQARA - Rojnamegere Habîbe Erene, ya ke bi 8 embazanê xo reyde ameye destbendkerdiş û tepiştiş, demê tepiştişî de çîyê ke ameyî sereyê ci û embazanê xo qal kerd. Habîbe dîyar kerd ke ê bi fermanê amirî Têkoşînê bi Terorî dir TEMî ameyî tepiştiş.

 

Çarçewaya cipersayîşê Anqara de ame destpêkerdiş de 25ê Teşrîna Verêne de Edîtora ajansê ma JINEWSî Habîbe Eren netîceyê sereştişê keyeyî de Amed de amebî destbendkerdiş û dima ra berdî Anqara 29ê Teşrîna Verêne de bi 8 embazanê xo dir seba karê xo yê rojnamegerîye ameye tepiştiş. Habîbe çîyê ke destbendkerdiş û tepiştişî de qal kerd.

 

Habîbe dîyar kerd ke sereştişê keyeyî yê 25ê Teşrîna Verêne de keyeyê xo ke bi meslegdara xo Derya Rena muxabîra JINNEWSî ke dosyayêk bîn ameyîne muhakemekerdiş û pêwa înan bi 11 rojnamegeran dir ameyî destbendkerdiş. Habîbe dewam de wina vat, " Ma emnîyet de Selman Guzelyuzî dî û dima ra zî Oznûr Degere Qoserê Mêrdînî ra ardî. Dima ra ma eşnawit ke Derya Rene berdê dadgehe û dima ra zî aye tepiştê. Eke ez agêrî serê destbendkerdişî, dimayê ke heta nîmerojî ma dayî vindarnayîş, vatî ke do ma bere Anqarayî.”

 

Raywanîya bi kelepçe

 

Habîbe dîyar kerd ke aye reyde Salman û Oznûre zî kelemçekerde wesayitî espar kerdî, dimayê amadekarîya raywanî her ke şino hûmara polîsan zî zêde bîyî. Hebîbe wina dewam kerd, "Ma dûrê yewbînan dayî ronitiş û nêverdayî ke ma bi tu hawayî têkilîyê bi yewbînan reyde roşê. Bi 30 polîsan reyde ma seba şêrê  Anqara kewtî rayîr. Wesayît de pêwa polîsê bi çekanê luledergî, 5 cendirmeyê bi çekê luledergî ca girewtî. Demo ke ma resayî Rihayî me dî ke muxabîra MAyî Ceylan Şahînlî û Emrullah Acar zî ardî. Tewr tay 15 saetan raywanîya ma bi hawayê kelemçekerde dewam kerd. Qiseykerdişê ma yê pîya zî qedexe bi. Xêrcê molaya seba werdî û daşirî kelepçeyê destê ma de nêameyî vetiş. Ma verê sibayî resayî Anqara. Dimayê kontrolê weşîye ma berdî TEMê Anqarayî û ma uca de dî ke kesê ke ameyê tepiştiş zêde yê.”

 

'Emîrê TEMî: Ez dewlet a'

 

Habîbe, dîyar kerd ke roja diyîn ê destbendkerdişî de seba taqîbkerdişê engiştan berdî wareyêk û uca de seba ke Oznur Deger kelemçe kerda, hetê mudûrê polîsan ra kuyayîş werde û wina vat: "Demo ke Oznure xo ver da, aye bi fekro û bi kelemçekerde  derenceyan ra kaş kerdî. O wext ma bi hêzêk pîl reaksîyon mojna û ma înan ra vat, şima îşkencekar ê. Eynî tehdîtî ma rê zî kerdî. Demo ke ma vat, şima do bêrê muhakemekerdiş, emîrê TEMî vat, 'mi xeylêk çepgîr û hukmatan dî. Ez 30 serrî yo tîya de ya. Çîyêk nêbi ez dewlete ya dewlete’. Demo ke ma waşt îşkenceyî derbazê zabitnameyî bikerê, ma ra vatî, 'serê dêsî de binusê’. Demo ke ma waşt seba Oznure rapor bêro dayîş, goş nêdayî ma. Oznure m ara vat, bi kiştişî ameya tehdîdkerdiş. Demo ke ma şî TEM, eynî  muamele dewam kerd." 

 

'Seba çapemenîya hetgire dîmenî antî’

 

Habîbe wina bale ant serê prosesê berdişê verê dozgerîye: “Demo ke ma berê verê dozgerîye ma yewbînan dî. Bi kelepçeyê çepî ma bi yew odayan ra vetî. Ma hemverê kelepçeyan vejîyayî û ma Protokolê Stenbolî ard vîrê înan. La ma dî ke seba çapemenîya terefgire mîzansenêk yeno amadekerdiş. Demo ke ma înan ra vat, ‘Gelo kayê şima nêqedîya? Şima do nika servîsê ça bikerê?’ ma ra vatî, 'Do heta wesayîtî wina bo’. Dima ra ma kerdî dore û verê xeylêk polîsan de dîmenê ma antî. Demo ke ma sloganan berz kerd zî talîmatê 'Kelemçeyan mevejê' ame dayîş. Demo ma ardî Edliyeyê Anqarayî reyke bîn zî dîmenê ma antî.”

 

Hetê 9 dozgeran ra îfade ame girewtiş’

 

Habîbeye da zanayîş ke edlîye de 9 dozgerî eynî wextî de îfadeyê rojnamegeran girewtî û qiseykerdişê xo wina dewam kerd: “Dozgerê ke îfadeyê mi girewtî persê teberê huqûqî persayî. Çîyê ke mi nêvatî zabitnameyî de nuştî. Wexto ke avûkatî hemverê ci de vejîyayî, vengdayî polîsan û ma odeye ra vetî. Polîsî reyna deste ma kelemçe kerdî û bê ke zabıtname bêro wendiş ma îfadeyan îmze kerd. Wextê îfadedayîşî de nizdîyê yew saet û 45 deqa ez payan ser de menda.”

 

Polîs talîmat da dadger

 

Habibeye ard ziwan ke bi saetan dima 9 tenî seba tepiştişî sewq kerdî û heta mehkemaya nobedare îfade dayî saet bîbî nîmeyê şewe û wina domnaye: “Mehkemaya nobedare îfadeyê peynî saetanê serê sibayî de girewt. 10-15 deqeyan ra dima mehkema qerar eşkera kerd û ma pêro ameyî tepiştiş. La heta îfade qedîya, seba her îfadeyî 3 polîsê TEMî zî tewrê ci bîyêne. Eşkerakerdişê qerarî ra ver polîsî dekewtî mehkema û talimat dayî. Badê qerarê tepiştişî destê ma ameyî kelemçekerdiş û ma edlîye ra vetî. Ma ewja de sloganê ‘Şima nêeşkenê çapemenîya azade bêveng bikerî’ berz kerd. Berzkerdişê sloganan ra dima dayî fekê ma û fekê ma girewtî. Wexto ke ma weyşayî wesayîto ke do ma biberdêne Zîndanê Sîncanî bîyî, na reye amirêk bîn vat ‘kam nîşaneyê serfirazî berz kerd?’ Ma zî vat ‘ma heme’. Vat ‘hadê 15 serra birizîyê’.”

 

Lazimîyanê ma nêanê ca

 

Habibeye da zanayîş ke saaet 05.00î de înan resayî Zîndanê Cinîyan yê Sîncanî û wina vat: “Badê gureyê teknîkî cigêrayîşê zit serê ma de ame ferzkerdiş. La wexto ke ma reaksiyon mojna tepîya gam eştî. Di rojan seba ke ma derbazê qawişî bikerî ‘odeya muşadeye’ de vindarnayî. Rojêk û nîme awe nêdayî ma. Ma vat nêweşîya gurçike bi embazanê ma de esta la reyna zî nêdayî. Badê hewldayîşanê ma awa lîtreyêk û nîme dayî ma. 5 rojan qawişo veng de tu lazimîyê ma nêardî ca. Dima ra ma xeylê reyan resna û waştişname şirawit ke lazimîyê ma nînê caardiş. Bado ke ma sere wedarna mase û kursî dîya ma. Hema zî ma seba xeylê lazimîyanê xo xover danê.”