STENBOL - Dimayê teqîyayîşê Cadeyê Îstîklalî Eren Keskîn û Jîyan Tosun hedef ameyî mojnayîş, avûkate Jîyane dozgerîye rê gerre kerd û vat: "Şewe bîn seba asayîşê canê mi çinbi, ez edliye de menda.”

 

Demêk zaf kilm dimayê teqîyayîşê Cadeyê Îstîklalî yê Beyoglûyê Stenbolî de, Adem Taşkaya ke Partîya Zaferî ra yo, avûkate Jiyan Tosune seke hedef mojna. Nê ser de Jîyan Tosune, dozgerîye rê gerre kerd. Demê teqîyayîşî de Jîyan Tosune Qereqolê Kuçukçekmeceyî de bi miwekîlê xo reyde pêvînayîş kerdêne. Dimayê ke hedef ameye mojnayîş, polîsan bi sebebê “derheqê ci de gerre esto’ îfadeyê aye girewt. Jîyan Tosune, dimayê ke îfadeyê aye ame girewtiş zî ameye veradayîş.

 

Dimayê hedefmojnayîşî, xeylêk tehdîdî avûkate Jîyan Tosune rê ame kerdiş û nê ser de Jîyane şî  edliye û bi sebebê “asayîşê canê mi çin o”, heta serê sibayî edliye de mende. Saetê serê sibayî de Jîyan Tosune dozgerîye rê gerre kerd.

 

Eynî wextî de tehdîdê kiştişî Hemsereka Pêroyî ya Komeleya Heqê Merdiman (ÎHD) Eren Keskîn zî ameyî kerdiş. Erene derheqê babete de serê hesabê xo yê medyaya dîjîtale de mesajêkê pare kerd. Erene, da zanayîş ke serê telefonî aye ameyo cigêrayîş û tehdîdê kiştiş û desteştişî aye rê ameyo kerdiş. Erene, wina domnaye:“Ez nêzana ka ma çira ameyê weçînayîş la halê hazir de ne asayîşê canê min û ne zî yê Jiyane esto.”