AMED - Keyeyê Meryem Sevîma ke di roje verê cû hetê Musa Sevîmî ra ameye qetilkerdiş, vengê wa kiştoxê ci bêro tepiştiş da û wina vat: “Meryeme seba cinîyê ke ameyî qetilkerdiş bêveng nêmende. Coka ra ganî ma zî hemverê kiştişê aye de bêveng nêmanê”.

 

Qezaya Peyasî ya Amedî de Musa Sevîmî 2 rojî verê cû pê çeke Meryem Sevîma (21) ke aye ra cîya bî birîndar kerd. Dima ra kesê dorme xebere dayî û ekîbê polîsan û weşîye ameyî cayê qewimîyayîşî. Meryeme hetê ekîbê weşîye ra wedarîya Nêweşxaneyê Perwerdeyî û Cigêrayîşî yê Gazî Yaşargîlî la vera pêro mudaxaleyan Meryeme dinyaya xo bedelnaye. Cenazeya Meryeme seba otopsî berdî Dezgehê Tibê Edlî (ATK) û dima ra cenaze goristanê Yenîkoyî yê qezaya Baglarî ya Amedî de ameye definkerdiş. Her çend ke qetilkerdişê Meryeme ra 2 rojî derbaz bibo zî hema kiştox nêameyo destbendkerdiş.

 

Merdimê Meryeme derheqê qetilkerdişî de qisey kerdî.

 

'Ameyêne tehdîtkerdiş’

 

Embaza Meryeme Evîn Kaplane ard ziwan ke Meryeme hemverê qetilkerdişê xeylê cinîyan de veng da û nika zî cinîyê ke netîceyê şîdetê camêrdî de ameyî qetilkerdiş ra yew a û qala çîyê ke roja qewimîyayîşî de ameyî cuyayîş kerd: “Çîyo ke ma nêpawitêne bî. Seba ke aye cinîyêka camêr bî. Meryeme her tim hetê kiştoxî ra ameyêne tehdîtkerdiş. Kiştox wexto ke museno Meryeme qehwexane de ya, erzeno qehwexane ser û Meryem vana ke aye nêwazena ci reyde qisey bikera. La kiştox vano do aye reyde bizewecî yo. Wexto ke Meryeme bi israr îtîraz kena, çekî vejeno û Meryeme qetil keno. Dima ra ma musayî ke qehwexaneyo ke Meryeme şîya qehwexaneyê embazê kiştoxî yo. Ma nêeşkenê xo biresnî dîmenê kamerayî. Kiştox nêmerdo, xo sey merde mojneno. La ma zanî ke dewêka Licê de xo nimneno.”

 

Evîne ard ziwan ke Meryeme seba ke camêrdî nêwaşto ameya qetilkerdiş û waşt demêko lez wa kiştox bêro tepiştiş û bierzîyo zindan.

 

'Wa kiştox bêro cezakerdiş’

 

Dima ra waya Meryeme Gulîstan Sevîme qisey kerd û dîyar kerd ke waya aye timî ameyêne tehdîtkerdiş. Gulîstane badê persê her cinîya ke vejîya teber, qehwexane yan zî cayêko bîn de ronişa do bêra kiştiş yan na, qisey kerd û vat: “Ganî sucdar bêca nêrî veradayîş. Wa êdî cinîyî nêrî qetilkerdiş. Ne waya mi û ne zî cinîyê ke ameyî qetilkerdiş heq kenê ke cuye ra bêrî birnayîş. Ma do gerre bikerî. Kiştoxê waya mi xeylê sucê bînan kerdo û qeydê ci yê sucî zî estî. La hema zî teber de gêreno. Ganî kiştox bêro tepiştiş û cezaya ke heq keno ci rê bêra birnayîş.”

 

Tewr peynî keyeyê aye dîyar kerd ke înan gerreyê kiştoxî kerdî û ê do heta peynî dewaye ra fek vera nêdê.”