WAN -  Nêzdîyê 25ê Teşrîna Peyêne DBPyî awankerdişê Meclîsê Cinîyan îlan kerd û vat: "Ma do hemverê şîdet, desteştişî, tecawiz û zihniyetê pederşahî, koletî, kolonyalîstî cuya têduşt awan bikerê.”

 

Meclîsê Cinîyan yê Partîya Herêmanê Demokratîke (DBP) Eywanê Konferansê Tahir Elçi yê Wanî de kombîyayîşê çapemenîye organîze kerd iyê û awankerdişê xo îlan kerd. Xeylêk sazgeh û dezgehî tewrê eşkerayîya çapemenîye bî. Fotografê Rojnamegere Nagîhan Akarsele û Jîna Emînî eywan de ameyî daliqnayîş.

 

Nilufer Ayhane heqê qiseykerdişî girewt da zanayîş ke sloganê Jin Jiyan Azadî bîyo vengê hemparî yê dinya û wina dewam kerd: “Ma do hemverê şîdet, desteştiş, tecawiz û zihniyetê pederşahî, koletî, kolonyalîstî cuya têduştî awan bikerê. Ê do wezîfeyê ma yê bingehîn o bi ke ma seserra 21ine bikerê şorişê cinî. Ma do têkoşînê xo pîl bikerê.