Rabîa Onver

 

COLEMÊRG - Cinîyê Geverijî dîyar kerdî ke zimistanê înan zehmet derbaz beno û seba vayîye nêeşkenê  komir bigîrê û vat: “Komirê sey hetkarî danê zî sey sîye yo. Ganî ma hemverê nê krîzî de bibê yew. Yan zî do wina dewam bikero.”

 

Tesîrê krîzê ekonomîyî her ca de bi giranî yeno hîskerdiş. Seba vayîya ceyran û gazî, welatijî problemê ekonomîye yê cidî ciwîyenê. Colemêrg de serra vîyarte tonê kolîyan û komirî mabêne hezar û 500 û hezar û 900 de derbaz bîne. La emsar yê komirî 8 hezar TL derbaz kerdo. Yê kolîyan zî vejîyayo 4 hezar û 500î.

Cinîyê Geverijî derheqê babete de reaksîyonê xo ardî ziwa  û vat, seba vayîya înan koli û komir nêgirewtê.

 

Cinîya bi nameyê Sîtî Zerek ercnayîşê xo wina kerd: “Seba rewşa ma ya ekonomî ma nêeşkayî koli û komir bigîrê. Komirê sey hetkarî danê zî kerre yo. Ma pê germ nêbenê. Mêrdeyê mi meaşê kalbîyayîşî gêno. O zî tena qîmê faturayê ceyranî keno. Keyeyê ma pêrodayîşê 2016ine zirar dîyo. Her ca ra serd keweno zere. Lajê mi înşat de şuxilîyayîne texteyê mendeyan ardibi. Ma nêeşkenê komir bigîrê. Di serrî verê rewşe hîna baş bî. O wext qet nêbi ma eşkayîne hîn çî bigirewtêne. Krîz rê çareserîyêk nîno vînayîş, ma do pêro perîşan bibê.”

‘Ma nêeşkenê arûdû bigîrê’ 

 

Cinîya bi nameyê Vesîle Rendane da zanayîş ke krîzê ekonomî vera ê nêeşkenê adûrû bigêrê û wina dewam kerd: “Îmkanê kar qezaya ma de çinî yê. Coka ra her keyeyî de kesêk şuxulîyeno. Debara keye, mesrefê wendekaran xeylê zehmet o. Texte û kartonê hamnanî ma arê da, ma nika vêşnenê. Komir û kolîyî vaye yê. Rayîrê bazirganîye zî padaye yê. Serranê verênan ra hîna zêde ma zehmetî ancenê. Ma nêeşkenê çîyêk keyeyî xo rê bigîrê.” 

 

‘Çareserîya ekonomî ma yê’

 

Vesîleye vat ke komiro ke yeno vilakerdiş hem tay û hem zî kerra yo û wina reaksîyon mojnaye: “Acaba no zilm do heta kêf dewam biker. Wa Homa heqê ma înan rê nêverdo. Ma biwerizî payan ser do no krîzî biqedîyo. Ganî ma wayîrê heqê xo bivejîyî. Ma bibî yew do ekonomî çareser biba.”

‘Wa pere seba şer nê seba aştî bêro vilakerdiş’

 

Cinîya bi nameyê Beybun Tekçîye seba ke mêrdeyê aye merdo tena domananê xo wayîr kena û aye zî wina vat: “Ez meaşê mêrdeyê xo gêna. Ma bi nê meaşî mesref kenî. Domanê mi mekteb ra yenê werd wazenî. Xeylê rayan seba ke çîyêk çinî bî mi werd nêpewto. Domanê mi mukaqeşe kenî û keye ra vejîyenî. Ma dewlete ra çîyêk nêwazenî. Wa no krizî bida vindertiş. Heme pere da no şerî. Wa tîya ra pê herinda şerî de bida hemwelatiyan. Wa pere seba şer nê seba aştî bêro vilakerdiş.”