AMED - Polîsan vizêr şan de semtê Dîclekentî yê qezaya Peyasê Amedî de eşt serê keyeyêk û tuto bi nameyê B. Çelîk bi îşkence destbend kerd. Ame zanayîş ke B. Çelîk bi îdiayê “serê dêsan de nuşte nuşto” ameyo destbendkerdiş.

 

Polîsan Amed de vizêr şan de eşt serê keyeyêk û tuto  bi nameyê B. Çelîk destbend kerd. Polîsan bi vatişê ‘ti do qereqol de bivînê’ B. Çelîkî tehdîd kerdê.

 

Şîdet ci rê kerdî

 

Dayîka Çelîkî, Necla Çelîke sereştişê polîsan ê keyeyî de wina vat: “Polîsan saete nêzdîyê 01.00 de eştî serê keyeyî. Ma bi pirodayîşê berî rawuştî. Keye  ser û bin kerdî û bi solanê xo yê biherre kewtî keye. Demê kewtişê keyeyî de, lajê mi derb kerdî. Polîsan tehdîd ci rê kerdî û vatî ‘ti do qereqol de bivînê’. Lajê mi kerdî oda û ma zî kerdî mutbex û ber serê ma de padayî. Polîsan lajê mi derb kerdêne û qîrîyayîşê ey ma eşnawitêne. Pîyê ci xo eşt ser, pîyê ci zî kuyayî.

 

'Polîsan çeka xo nîşanê tutê mi dayî'

 

Lajê mi berdî serê balkone vatî, ma do to tîya ra bierzê. Nêverdayî ke şêrê lavabo zî her tim tehdîdê ‘ti do qereqol de bivînê’ kerdêne. Mîyanê aşmêke de 4 rey o erzenê serê keyeyê ma. Psîkolojîyê tutanê mi xira kerdî, êdî bes o. Do heta ça nê zilm û îşkence bikerê. Kitabanê keyeyê ma Hînker zî mîyan de hemine arêdayî û vatî qedexe yê, mi vat tu kitabê qedexe keyeyê mi de çin ê, reyna zî berdî. Tutê min ê  5 serrî ra vatî, ‘keyeyê şima de çeke esta? Ti ma ra hes kenê?’ Polîsan çeka xo nîşanî tutê mi dayî.”

 

Polîsan B. Çelîk berdî Midurîyê Polîsan ê Şubeyê Tutan.