ÎZMÎR - Cinîyê Îzmîrî dîyar kerdî ke 25ê Teşrîna Peyêne de muhîmîya pawitişê cewherî do raşteyan de bîyarî ziwan ser û vatî ke xoverdayîşo ke Wayê Mîrabelan ra heta Jîna Emînîye ame do gird bikerê.

 

25ê Teşrîna Peyêne Roja Têkoşînê Vera Şîdetê Serê Cinîyan pêroyê cîhanî de bi çalakîyanê girseyîyan yena pêşwazîkerdiş. Cinîye hemverê şîdet û hêrişê dewlet-camêrdî de verê cû ra ameya ewro û seba destkewtişanê xo bipawa raşteyan nêteriknena.

 

Îzmîr de 25ê Teşrîna Peyêne de do cinî muhîmîya rêxistinbîyayîş û pawitişê cewherî bîyarî ziwan ser.

Însîyatîfê Wendekaranê Azadan ra Ezgîn Canpolate da zanayîş ke îqtîdar polîtîkaya şerê taybet serê cinîyan de rayra beno û seba ke cinî pwitişê cewherî ra bêra dûrîkerdiş xeylê tewirê şîdetî pê ano. Ezgîye wina vat: “Cografyaya Kurdistanî de talan û texrîbat estê. No talan bedenê cinîye de dewam keno. Ganî ma hemverê şîdetî de sey cinî tewirê pawitişê cewherî pê bîyarî û pare bikerê. Rojeva cinîyan ganî dej û mexdurîyet nêbo, ganî xoverdayîş û têkoşîn bo.”

 

‘Îqtîdar pawitişê cewherî yê cinîyan ra terseno’

 

Ezgîye bale ant serewedarnayîşê ke badê qetilkerdişê Jîna Emînîye ameyî cuyayîş ser û vat: “Heme cinîyê ke ameyî qetilkerdiş sebebê têkoşîn û serewedarnayîşê ma yê. Ma serewedarnayîşê xo hempar kenê. Tirkîya polîtîkaya dişmenîye ya cinîyan rayra bena. Îqtîdar cinîyê azade ra terseno û wazeno înan bêpawitiş vera bido. Hukmê înan zî bîyo camêrd. Coka ra cinîyan kenê zîndanan û kiştoxê cinîyan vera danê. Jin Jiyan Azadî tena sloganêke nameyê têkoşînê cinîyan nîyo.”

 

‘Her firsendî de hêrişê destkewteyanê cinîyan kenê’

 

Tora Pawitişê Cinîyan ra Emîne Akbabaye zî dîyar kerd ke AKP serê cinîyan de şîdet pê ano û her firsendî de hêrişê destkewteyanê cinîyan keno û wina dewam kerd: “Şîdet polîtîkaya bêcezaverdayîşî vera pê yeno. Cinîyê ke heqê cinîyan pawenî raştê barîkatê emnîyetî yenî. Proseso ke ma hemverê cinî û domanan de hêriş zêdîyenî de ma ver bi  25ê Teşrîna Peyêne şinê. Ma zanê azadî çi ya. Man ê hêrişan qebul nêkenî û têkoşînê xo domnenê.” 

 

‘Ma do azadîya xo bipawê’

 

Emîneye tewr peynî wina vat: “Cinîyî cayê ke yenê têkiştî de hewl danî tora pawitişî awan bikerê. Ma vengê girdkerdişê têkoşînî dane heme cinîyan. Cinîyê ke bi aşman o Îran de têkoşîn danê. Ma do hemverê hêrişan de pawitişê azadîya xo dewam bikerê.”

 

‘Cinîyê rêxistinkerde ra tersenê’

 

Endama Meclîsê Cinîyan ya HDPyî ya Îzmîrî Gonul Yalçine zî derheqê 25ê Teşrîna Peyêne de wina vat: “Dîktatorîya Komara Dmînîkî ke Wayê Mîrabelan qetil kerd, Tirkîya de zî esto. Ma hemverê rejîmê zextwerî de bi sloganê ‘jin jiyan azadî’ têkoşîn danê. Tirkîya de roje de tewr kêm hirê cinî hetê camêrdan ra yenê qetilkerdiş. Pawitişê cewherî xeylê muhîm o. Îqtîdar cinîyê rêxisinkerde ra terseno. Ganî ma xo awan bikerê. Rayîrê azadîye bi cinîyanê azadan mumkun o.”