STENBOL- 155 avûkatê endamê OHDyî yê Stenbolê, seba taqîbkerdişê tepiştişê nameyê bînan ê Îmraliyî muracatê Baroyê Stenbolî kerd. Avûkatanê OHDyîjan vatî "Ma wazenê tewr lez demî de birêz Ocalanî ra xebere bigîrê û diyalogê çareserîya demokratîke awan bikerê.” Avûkatanê OHDyî venga pÊro avûkatan kerd û bi taybetî venga TBByî kerdî.

 

155 avûkatê ci tede Şubeyê Îstanbulî yê Komeleya Huqûqnasan a Seba Azadîye (OHD) seba ke tecrîdê Îmraliyî bêro wedaritene, qedexeyê pêvînayîşê avûkatan biqedo û heqê mîyanneteweyî yê tepişteyanê Îmraliyî bêrê caardene Baroyê Îstanbulî rê muracat kerd. Muracat de ame waştene ke Baroyê Îstanbulî vera tecrîdî Yewîya Baroyanê Tirkîya û Wezîrîya Edaletî de xîret bikero.

 

‘Muracatî nînê cewabkerdene’

 

Muracat de ame parekerdene ke Rayberê PKKyî Abdullah Ocalan 23 serrî yo, Hamîlî Yildirim, Hayrî Konar û Veysî Aktaş zî 7 serrî yo mîyanê 'sîstemê tecrîdî yê Îmraliyî' de, binê şertanê giranan de tepişîyenê. Muracat de ame parekerdene ke 25ê adara 2021î pêvînayîşê telefonî ra nata Abdullah Ocalanî ra qet yew xebere nêna girewtene.  Muracat de bale ameye antene ser ke heta nika vera tecrîdî xeylêk muracatî ameyî kerdene la cewab nêdîya înan û rixmê biranê Mehkemeya Heqanê Merdiman a Ewropa (MHME) û Komîteya CPTyî zî tecrîd 2022 de zî dewam kerd.

 

‘Avûkatan waşt pêvînayîş bikerê’

 

 Muracat de ame vîrvistene ke 14ê êlule de 22 welatan ra 350 avûkatan û, 19ê êlule de Rojhelatê Mîyanênî ra 756 avûkatan muracatê Wezîrîya Edaletî ya Tirkîya kerd û waşt ke pêvînayîşê avûkatan bêro kerdene.

 

‘Cewabê muracatan nîno dayene’

 

Muracat de wina ame vatene: ''Heta nika cewab nêdîya muracatan. 2018 ra nata bi hawayêkê sîstematîkî Ocalanî rê cezaya dîsîplînî dîyena û derheqê nê cezayan de zî agahîyî nêdîyenê avûkatan. Heqê pawitiş, pêvînayîş, xoresnayîşê dosyayan û muracatê avûkatanê tepişteyanê Îmraliyî zî yenê astengkerdene. Bi nê hawayî heqê bingeyî yenê binpaykerdene. Ma wazenê ke Baroyê Îstanbulî Wezîrîya Edaletî û Yewîya Baroyanê Tirkîya ra biwazê ke wa vera tecrîdî têbigêrê, dezgeh û selahîyetdaranê eleqedaran rê derheqê babete de muracat bikerê.”