Sema Çaglak

 

ŞIRNEX – Cinîyê Şirnexijî reaksîyon vera hêrişê Tirkîyaye yê serê Vakur û Rojhelatê Sûrye mojnayî û dîyar kerdî ke roj roja pawitişê deskewtişê Rojawanî ya û wina vatî: “Ganî ma hemverê nê hêrişan de vejîyê raşteyan û vengê xo berz bikerê. Ma nê qebûl nêkenê, ma do sere de Kobanê, bi pêroyî Rojawan bipawê.”

 

Dewleta Tirke 19ê Teşrîna Peyêne de xeylêk bajaranê Vakur û Rojhelatê Sûrîye (Rojawanê Kurdistanî) û xeylêk cayê Herêma Federe ya Kurdistanî de bi teyareyê şerî bombavaran kerd. Teyareyê ke pey yewbînan rawuştî, Kobanê, Şehba, Dêrik û Girê Spî yê Vakur û Rojhelatê Sûrîye bombavaran kerd. Sewbîna Ajansê Xeberan ê Hawarî (ANHA) dîyar kerd ke muxabîrê înan Îsam Ebdullah demo ke xebere taqîb kerdêne, netîceyê hêrişê dewleta tirke de ame qetilkerdiş. Dewleta Tirke hem hetêk ra hêrişê başûrê Kurdistanî kena û hetêkê bîn zî hêriş bena sere Rojawanê Kurdîstanî. Cinîyê Şirnexijî reaksîyon vera hêrişê Dewleta Tirke mojnayî û venga wayîrvejîyayîşê herra Kurdistanî kerdî.

 

‘Kurd êdî bindestî qebûl nêkenê’

 

Dewlet Olmez hêrişê Tirkîyaye yê serê rojawanê Kurdistanî şermezar kerd û dîyar kerd ke ê zulmê serê xo qebûl nêkenê. Dewlete, wina vat: “Hema çi hêrişî bikerê, kenê milê kurdan.  Bi xo hêrişan kenê û şarî xapênenê. Ma bindestî êdî qebûl nêkenê û ma do seba heqê xo têkoşîn bikerê. Eke kurdêk tena zî bimano, do pey dewaya xo bibo. Ma fek têkoşîn û xoverdayîşê xo ra vera nêdanê.  Bi qasê ke destê ma ra ame têkoşînê xo pilêr bikerê. Wa 7 serrî ra heta 70 serre wurzê serê lingan û hemverê nê zulmî de vejîyê meydanan û vengê xo berz bikerê.”  

 

‘Amadekarîya qirkerdişî kenê’

 

Basra Olmez zî wina vat: “Ma tarîx ra heta roja ewro binê zulm, zordestî de yê. Tirkî ma kişenê,  Erebî ma kişenê û heme dewletî hemverê kurdan şer kenê û pey berjewendîyê xo yê. Bes o êdî nê zulm, koçberî û bêbextî rê. Erdogan bi nê hêrişan amadekarîya qirkerdişî keno. DAIŞ xelas bi na rey  dora ey ya. Wazeno şarê xo uca de bi ca bikero û qirkerdiş serê şarî de bikero. Bi çekanê kimyewîyan hêrişî kurdan keno. Ganî hemverê nê hêriş û planê lêşinî cinî, camêrd û ciwanî heme  kurdî wurzê serê lingan û êdî vajê bes o.”

 

‘Yeno waştiş ke hêrişê DAIŞî dewam bikerê’

 

Heybet Adiyaman zî dîyar kerd ke Erdogan hêrişê DAIŞî ke Rojawan kerdêne wazeno dewam bikero û vat: “Ma azadî wazenê û seba aştîye têkoşîn kenê. Her ca de hemverê kurdan hêriş kenê û hesaban kenê.  Ma wazenê Kobanê serbikewo. Ez hêrişê hemverê Kobanê û bi pêroyî Rojawan şermezar kenê. Seba ke ma kurd ê, zulmêk ma rê nêkerdê nêmendo. Şerê Kobanê de zorê DAIŞî berd. Nika erdogan zî wazeno sey DAIŞî hêriş bikero. Ma nê hêrişan qebûl nêkenê.”

 

‘Her hêrîşê xo kenê milê kurdan’

 

Zuleyha Olmeze zî dîyar kerd ke Kurdî bin ê hêrişan nêqedîyenî û hêrişê Tirkîya bê netîce manenî. Zuleyhaye wina vat: “Ma rê vanê ma do kokê şina bîyarî. La kurdî nêqedîyenî û heta peynî do xover bidî. Kurdî do hîna zêde bibî. Stenbol de teqayîş virazîya kerdî milê PKKyî la heme kes baş zano ke teqayîş PKKyî nêkerdo. Her hêrişê xo kenê milê kurdan.”

 

‘Eynî wextî de hêrişê hemverê destkewtişê cinîyan bî’

 

Hemayîl Olmeze vat ke Kobanê û pêroyê Rojawanî de xeylê bedêlê girdi ameyî dayîş û qiseykerdişê xo wina domna: “Erdogan wazeno güreye DAIŞî ke nîmcet verdayo temam bikero. Wazeno kurdan biqedêno la kurdî nêqedîyenî. Man ê zilmî qebul nêkenî û heta peynî ma do heqê xo bipawî. Ma Kobanê de xeylê berdêlanê giranan da. Xeylê domanê ma ewja de cuya xo vînî kerdî. No hêriş eynî wextî de hêrişê hemverê destkewtişê cinîyan bî. Ganî goreyê nê bêro têgêrayîş û payan ser de bêro vindetiş.”

 

‘Ma do rojawan bipawê’

 

Tewr peynî cinîyan ra Makbule Olmeze qisey kerd û aye zî vat: “Roje roja pawitişê Rojawanî ya. Ma nê zilmê serê xo qebul nêkenî û ma pêro tira aciz î. Heme cîhan zano ke Kobanê de çi qewimîya. Nika reyna bi hêrişanê xo hem Kobanê û hem zî pêroyê Rojawanî hedef mojnenî. Ganî ma hemverê nê hêrişan de bivejîyî raşteyan û vengê xo berz bikerî. Ma na rewşe qebul nêkenî û Rojawanî pawenî