AMED - Merdimanê tepişteyan û tepişteyê ke înfazê înan ameyo vêşnayîş ke seba tepişteyan edalet wazenî vat: “Astengî ma rincan nêkeno û ma do waştişê xo yê edaletî têdima (pêser) vajê.”

 

Merdimanê tepişteyanê nêweşan û tepişteyanê ke înfazê înan ameyo vêşnayene çalakîya Nobeta Edaletî bê maben verê berê Edlîyeya Amedî, zîndanê Tîpa D û ATKyî dewam kena. Vera serd, germ, nêweşî û astengîyê polîsan merdimê tepişteyan xover danê û kewenê raşteyan. Tîya ya ver qedexeyê çalakîyan yê walîtîya Amedî vera seba 7 rojan Nobeta Edaletî ame astengkerdiş. Merdimê vînîbîyayeyan yê Baroyê Amedî û tepişteyan ameyî têhet û dîyar kerdî ke ê do fek têkoşînê xo ra vera nêdî û se beno wa bibo heta peynî do seba amacê xo raşteyan de bibê.

 

‘Heta ma weş bê ma do raşteyan de bibê’

 

Waya tepişteyo nêweş yê bi nameyê Hemdusena Ada ke 11 serrî yo tepişte yo, Reşahat Adaye bê maben hertim tewrê çalakîya Nobeta Edaletî bena. Reşahate bi israr hemverê heme şert û mercan de xo kena sîper û waştişê xo ana ziwan ser. Reşahate bin ê vatişan dest bi qeykerdişê xo kerd: “Yew serrî ra zêde yo ma raşteyan de yê. Bi israr ma vanê tena waştişêk ma esto. Ma edalet, seyyewbînanîye wazenê. Se beno wa bibo ma do fek waştişanê xo ra vera nêdê. Tepişteyê ma bi nêweşîya girane kewtî. La reyna zî serbest nînê veradayîş. Seba ke ma hemverê nê caardişan de biwirzê payan ser, ma tu astengîyan nêşinasna. Ma hertim raşteyan de yê, ewro zî vanê ke ma do peynîya xoverdayîşê înan nêverdê. Wexto ke erdî de hende vewr û cemed virazîya zî ma vejîyayî. Ma do peynîya dewaya xo de bê. Heta şilkêke gonîye canê ma de biba ma do nê cayan de bibî û ê zî do peynîya dewaya xo de bê. Ê zî gamêk tepîya nêerzenî û ma do zî layiqê înan bibê.”

 

‘Ma do edaleto ferz bîyarê’

 

Reşahate ard ziwan ke ê do edaleto ferz pê bîyarê û wina dewam kerd: “Tîya ra çend rojî verê cû ma şîyê verê berê zîndanî ke ma eşkerayîya xo bidê û nobeta xo dewam bikerê. Coka ra polîsî destur nêdayî û qerarê walîtîye ma reyde pare kerdî. Lazim bî ke ganî no seba ma derbazdar nêbayêne. No yew serrî ra zêde yo ke ma raşteyan de yê û vîşêrê nê tu vatişêk fekê ma ra nêvejîyayo. No zî heqê ma yo. No heqê ma yê merdimîye yo. Ma vanê wa seyyewbînanî bibo. Ma merdime aştîwaştoxan ra yê. Tewr kêm lazim o tedawîya nêweşanê ma bi hawayêke baş bêro kerdiş. Wa cenaze zîndanan ra nêvejîyê. Waştişê ma no yo. Wa zîndan nêbê raşteyê goristanî. Ê hemverê nê waştişî de yê, hemverê çalakîyan de bibê asteng zî ma do xover bidê. Se beno wa bibo do Nobeta Edaletî dewam bikera. Ma do seba pêronan edalet pê bîyarê.”

 

‘Hûmara tepişteyanê nêweşan nîşaneyê bêedaletî yo’

 

Dayîka tepişteyo nêweş yê giran Ciwan Boltan, Nazîme Boltane zî derheqê astengîyan de reaksîyonê xo ard ziwan û vat: “Seba çalakîya Nobeta Edaletî ma bi aşman o raşteyan de yî. Ma bi israr waştişê xo anî ziwan ser. Coka ra hewteyo şîyayeyan de çalakîya ma pê qerarê qedexeyî yê walîtîye ame qedexekerdiş. Heme ke ma şîyî verê berê zîndanî êdî ma musayî qedexeyan. Waştişê ma dîyar o. Lazim o qedexeyê winasî yê serê ma nêrî ferzkerdiş. Tutê ma bi serran o zîndanan de yê. Bi serran o bi nêweşîyê giranan, binê şert û mercanê giranan de têkoşîn danî. Hûmara tepişteyanê nêweşan raşte de ya. Na hûmare nîşaneya bêedaletîye ya. Na hûmare lekeyêke sîya ya. Bi serran o ma raşteyan de yî la gamêk tepîya nêameyo eştiş.”

 

‘Ma do bi israr vajî edalet’

 

Nazîme da zanayîş ke ê do bi israr vajî edalet û qiseykerdişê xo wina qedêna: “Tutê ma yê ke bi serran o nêweşîya girane reyde cuyenê her çend ke cezaya înan qedîyaya zî serbest nînê veradayîş û înfazê înan yeno vêşnayîş. Tutê ma se kerdî ke poşman bibî? Ziwanê xo, kulturê xo û nasnameyê xo dima ra şîyî. Kesêke qetil nêkerdî, dizî nêkerdî ya zî çin nêverdayî namusê kesêkî. Tutê ma nêweş î, acaba kam cû dayîke eşkena tutê wexto ke tutê ci ver bi merdî de boya ye keye de asanî ronişa. Wijdanê ma qebul nêkeno. Ez nê qedexeyan nêşinasnena û keye de nêronişena. Ewro ra tepîya ma tu astengîyan nêşinasnenî. Lazim o çareserî bêra averberdiş. Ma kurd î. Ganî nasnameyê ma êdî qebul bikerî. Ganî nasname vera caardişê kêfî nêrî mojnayîş. Ma do hemverê înan de raşteyan de bî. Ma do bi israr vajî edalet.”