ANQARA - Rojnamegerê ke seba gureyê xo aşmêke yo tepişte yê, dîyar kerdî ke ê bi fermanêke sîyasî ameyê tepiştiş û nê çî vatî: “Îqtîdar bi tepiştişê ma reyde wazeno komelî bitersêno û bêveng bikero. Ma seba rojnamegerî kenê yenê muhakemekerdiş.”

 

Anqara de 25 Teşrîna Verêne de çarçeweya tehqîqato ke Anqara de ame raraberdiş de rojnamegera ajansê JINNEWSî Habîbe Eren, Oznur Deger, Mudira karê Nuşteyan ya Ajansê Mezopotamya (MA) Dîren Yurtsever, rojnamegerê MA Berîvan Altan, Selman Guzelyuz, Denîz Nazlim, Ceylan Şahînlî, Emrullah Acar, Hakan Yalçin bi îdîayê ‘endamîya rêxistine’ ameyî destbendkerdiş. 29 Teşrîna Verêne de zî hetê mehkemaya ke bado ke vejîyayî mehkema gureyê rojnamegerîye vera ameyî tepiştiş. Çarçeweya eynî tehqîqatî de rojnamegera MAyî Zemo Aggoz û Mehmet Gunhanî ke wextêke kilm buroyê MAyî de stajerî kerdbî bi şertê kontrolê edlî serbest ameyî verdayîş.

 

Rojnamegerê ke pê gureyê xo ameyî sucdarkerdiş yew aşmî yo ke zîndan de yenê yî. Rojnamegerê ke Zîndanê Cinîyan yê Sîncanî û Zîndanê Hûmara 1ine yê Sîncanî de yenê tepiştiş mesajêke şirawitî.

 

'Ma bi qerarêk sîyasî ameyî tepiştiş’

 

Rojnamegerê tepişteyî mesajê xo yê hemparî de dîyar kerdî ke ê bi qerarêke sîyasî ameyî tepiştiş û yew aşmî yo ke tepişte yî û wina dewam kerdî: “Ma 4 rojan ameyî destbendkerdiş. Roja 4ine de ma berdî edlîye. Heta ke ma berdî edlîye ma tu îfade nêda. La roja 3ine yê destbendkerdişê ma de verê ke îfadeyê ma bêro girewtiş ma vetî mehkema. Zîndanê Sîncanî de ma rê qawîşêk ame hadrekerdiş. Qawîşo ke ma 5 rojnamegerî cinî tede yenê tepiştiş rojêk verê destbendkerdişê ma vatî ma do boyax bikerî û ameyo vengkerdiş. Roja bîn ma ameyî destbendkerdiş û ma berdî no qawîşî. Qawîş boyaxkerde bî û dêsê ci yewbînan ra kewtbî.”

 

'Tepiştişê ma parçeyêkê bêhuqûqî yo’

 

Rojnamegeran bale ant serê rewşa hukmatî û vatî, “5 aşmê peyîn de 26 xebatkarê Çapemenîya Azade ameyî tepiştiş. Xebatkarê Çapemenîya Azade çira ameyî tepiştiş?  Atmosferê sîyasî yê nika û çîyê verê ameyê kerdiş, cewabê nê persan dano. Hukmat hewl dano nê prosesî ke krîzê sîyasî, komelî û ekonomî ci de kûr bîyo, derbaz bikero. Seba nê zî her tewir bêhuqûqî û cardişê bêdemokratîk pê ano. Tepiştişê ma zî parçeyêkê nê xelekê bêhuqûqî yo.”

 

'Wazenê ma rastî nêvînê û nêeşnawê'

 

Rojnamegeran dîyar kerdî ke tepiştişê xebatkarê Çapemeniye ya Azade problemê Kurdî ke birîna giran ê welatî yo, xoser nîyo û vatî, “Ma bîyê hedefê îqtîdarê ke bi polîtîkayê şerî nêzdîyê problemê kurdî beno. Wazenê ma raştî nêvînê, nêeşnawê û nênusê. Çapemenî nêvîna, nêzana komel zî nêzano. La ma dî û ma bêveng nêmendî. Hukmat ke xeylê medyaye kontrol keno, hewl dano çapemenîya ke nêeşkeno kontrol bikero, bitersno. Hukmat bi tepiştişê ma hewl dano ke komelî bipelçiqno û bitersno. Xeberanê ke ma raşteyan de viraştî, tweetê ke ma şawitî, bernameyê ke ma pêşkêş kerdî, babeta 'sûcdarkerdişê ma yo’. Ma bi xebatê xo yê rojnamegerî yenê muhakemekerdiş. Seba ke na dosya sebebê tepiştişê ma nêbî la ma ameyî tepiştiş.”