Sema Çaglak

 

ŞIRNEX - Sîyasetmedarê cinî yê Şirnexî 25ê Teşrîna Peyêne de raştê hêrişan ameyî û ameybî destbendkerdiş. Sîyasetmedarê cinî bale antî hêrişê ke ameyî kerdiş û dîyar kerdî ke sloganê ‘Jin jiyan azadî’ bîyo terse îqtîdaran.

 

Cinîyî vera heme astengî û qedexeyan reyna 25ê Teşrîna Peyêne de vejîyayî raşteyan. Qezaya Cizîrî ya Şirnexî de bi serkêşîya Têgêrayîşê Cinîyanê Azadan (TJA) 25ê Teşrîna Peyêne bi pankartê ‘Jin jiyan azadî; Hemverê faşîzm û qirkerdişê cinîye de wext wextê azadîya cinîyan o’ rayra şîyî. Rayîr ra şîyayîşê cinîyan hetê polîsan ra ame astengkerdiş û cinî bi hêrişêke gird ameyî destbendkerdiş. Cinîyê ke raştê hêrişanê hovaneyan ameyî ajansê ma rê qisey kerdî.

 

‘Ez hêrişê hovane şermizar kena’ 

 

Endama Meclîsê Dayîkanê Aştîye Nebahat Îşçîye çalakîye de polîsan ra kutiş werde û deste aye ca ra vejîyaye. Nebahate dîyar kerd ke amacê rayîr ra şîyayîşê înan vengvetiş û berzkerdişê vengê şîdetê hemverê cinîyan bî û vat: “Ma vera şîdetê serê cinîyan şîyî û rayîr ra şîyî. Senî ke ma rayîr ra şîyî bê ke anos bêro kerdiş hêrişê ma kerdî. Hêrişêke hov bî. Gama ke hêrişê mi kerdî wirdî deste mi çewt kerdî û deste mi ca ra vejîya. Ez nika nêeşkena dest û mile xo wedarna. Şopê kutilî hema zî laşe mi de esto. Ez no hovîtîye şermizar kena. Ma nêşîbî şerê tu kesî, ma vera şîdet û qetilkerdişê cinîyan şîyî la ma raştê şîdetî ameyî. Xeylê heqaret û vatişê xirabî bi ma kerdî. Hêrişan vera ez xora şîya û ma nêberdî nêweşxane. Ma berdî odeyêk û kesêk ardî vatî ke no doktor o. La bi tu hawayêk bawerîya ma bi înan nêame. Vera heme caardişan ma do reyna têkoşîn û xoverdayîşê xo dewam bikerê.”

 

‘Destbendkerdişê ma qerarêk sîyasî bî’

 

Hemsereka rêxistina Partîya Demokratîke ya Şaran (HDP) ya qezaya Cizîrî Zîlan Ecevîte zî nê çîyan ard ziwan: “Cizîr a roje şahidîya hovîtîya dewleta tirke kerd. Hema qedexeyê walîtîye yê seba çalakî û bernameyan nêameybî dayîş ma dest bi xebatanê xo yê 25ê Teşrîna Peyêne kerdbî. La qedexe ra ver zî heme bername û çalakîyê ma yê 25ê Teşrîna Peyêne ameyî astengkerdiş. Her cade û raşteyê ke ma tede bername organize kerdbî, girîyabî binê abluqa. Reyna zî ma çalakîyê xo de bi israr bî. Roja 25ê Teşrîna Peyêne cadeyê Orhan Doganî de ma rayîrraşîyayîşêk viraşt. La polîsan hêrişê ma kerdî. Hêrişêk xeylê giran berdî dayîkan ser. La vera heme astengî û hêrişan vindertişê ma cinîyan baş bî. Cinî hemverê nê hêrişan de gamêk tepîya nêeştî. 22 cinî pêro pîya 24 kesî ameyî destbendkerdiş. Sebebê destbendkerdişê ma çinî bî. Her serre 25ê Teşrîna Peyêne de cinî vejîyenê raşteyan û vengê xo hemverê şîdetî de berz kenê. Destbendkerdişê ma bêhuqûqî bî û qerarêk sîyasî bî. Bi hawayêk kêfî hêrişê ma kerdî.”

 

‘Tersenê ke cinî biherikê raşteyan’

 

Zîlane dîyar kerd ke îqtîdar vengê cinîye ra terseno û wina vat: “Gama hêrişan de herinda ke polîsê cinî embazanê ma yê cinî bibî, polîsê camêrdî berdî hêrişê ma kerdî. Man ê hovîtî û zilmî qebûl nêkenê. Ma do gerre bikerê. Emserr hemverê cinîye de polîtîkayêk newe dayî dest pêkerdiş. Hukmatê AKP-MHPyî wazeno bi nê polîtîkayan fikr û hîssanê cinîyanê azadan raşte ra wedarno û cinî zerreye keyeyî de bimana. Badê qetilkerdişê Jîna Emînî û serewedarnayîşê cinîyanê Îranî bî tersê hukmatê AKPyî. Hukmat terseno ke cinî vejîya raşteyan. Zano ke eke cinî bivejîya raşteyan do heme komel hemverê no hukmatî de reaksîyonê xo nişan bido. Coka ra esil wazeno vengê cinyan bibirno.”

 

 ‘Yeno waştiş ke serê serewedarnayîşê cinîyan bêro girewtiş’

 

Hemşaredara HDPyî ya qezaya Cizîrî ke qeyûm tayînê herinda aye ame kerediş Berîvan Kutlu wina dest bi qiseykerdişê xo kerd: “Prosesê 25ê Teşrîna Peyêne ke Wayê Mîrabelî raştê şîdet, tecawuz û qetilkerdişî ameyî, nê prosesî ra qet cîya nîyo. Senî ke Wayê Mîrabelî hetê dîktatorîye ra ameyî qetilkerdiş û ameyî çinîkerdiş, ewro ma cinî eynî çîyan cuyenî. Tirkîya de her roje cinî yena qetilkerdiş la kiştoxê înan ne yenê dîyîş û ne zî yenê cezakerdiş. Cinîya kurd hemverê îqtîdarîye de sere wedarna. Ê zî zanî ke eke cinî sere wedarna do heme komel sere wedarno.”

 

Îqtîdar sloganê ‘Jin jiyan azadî’ ra terseno

 

Tewr peynî cinîyan ra Hemsereka HDPyî ya qezaya Qilebanî Zîlan Yamane qısey kerd ü aye zî wina vat: "25ê Teşrîna Peyêne de ma heme cinîyê sîyasetmedarî ameyî destbendkerdiş. Dayîkî erdî ra ameyî antiş. Ez zî erdî ra ameya kaşkerdiş û bi îşkence ameya destbendkerdiş. Ma hemverê qedexeyan de vejîyayî raşteyan û ma araşteyan nêterikna. No zî mojneno ke hêzê cinîye astengî û sînor nêşinasneno. Bi taybetî herêma Botanî de polîtîkayê şerê taybet merheleyêka tewr cor de yo. Amacê rayraşîyayîşê ma bale antişê nê polîtîkayan bî. Cinîya kurd serkêşa nê têkoşînî kena. Coka ra cinîya kurdî ra tersenî. Îqtîdar sloganê 'Jin jiyan azadî' ra terseno.”