AMED - Çarçewaya cipersayîşê ke Serdozgerîya Komare ya Anqarayî dabî destpêkerdiş de, cinîyê destbendkerdayan rê 24 saetan qedexeyê avûkatan ame dayîş.

 

Çarçewaya cipersayîşê ke hetê Serdozgerîya Komare ya Anqarayî ra ameyo destpêkerdiş de, bi taybetî Amed de xeylêk bajaran de sereştişê keyeyan ame kerdiş. Eşkerayîya Serdozgerîya Komare ya Anqarayî de ame vatiş, “Netîceyê îfadeyê şahid û şahidê nimite yê îfadeyê înan yê nasnameyê tarîx û fotografê cîya ameyê girewtiş de, netîceyê cigêrayîşê MASAK û HTSyî de 14 bajaran de qerarê 50 cinîyan ê destbendkerdişî ameyo girewtiş.”

 

Amed de netîceyê qerarê destbendkerdişî yê 22 kesan de erzîya serê xeylêk keyeyan. Sereştişê keyeyan de aktîvîstê Tevgerê Cinîyan ê Azadan (TJA) Fîgen Ektî, Mekiye Ormancî, Gulcîhan Şîmşek, Dîdar Çeşme û Zekiye Guler û Bedîa Akkaya, endama Akademîya Cinîyan Fîgen Aras, Sûltan Esen, Hatîce Gungor û Meral Şîmşek ameyî destbendkerdiş. Ame dîyarkerdiş ke Dîlan Akpolat zî Îzmîr de ameya destbendkerdiş.

 

Agirî de zî ame dîyarkerdiş ke Hemşaredara verê ya Diyadînî Hazal Aras sereştişê keyeyî de ameya destbendkerdiş.

 

Nameyê cinîyê ke ameyî destbendkerdiş hema zî nêame zelalkerdiş û ame dîyarkerdiş ke pêvînayîşê cinîyan bi avûkatan reyde 24 saetan ameyo astengkerdiş û do înan berê Anqara.