MERKEZÊ XEBERAN - Buroyê Huqûqî yê Asrinî pare kerd ke derheqê rewşa Rayberê PKKyî de agahîyêke çin a û vat: "Şert û mercê tepiştişê înan ke uca de serê înan yeno  ferzkerdiş, teberê mewzûatê neteweyî yo û nêeşkenê feyde tu heqê xo yê bingehîn ra bigîrê."

 

Buroyê Huqûqî yê Asrinî derheqê tecrîdê giran ê serê Rayberê PKKyî Abdullah Ocalan û bandorê tecrîdî de diyar kerd ke derheqê babete xeylêk reyan hetê ma ra muracat û gerreyî ameyê kerdiş la heqê qanûnî nêameyê caardiş û vat: "Mekanîzmayê Neteweyî û Mîyanneteweyî bêtesîr ê.”

 

Dewamê eşkerayîye de wina ame vatiş:

 

"Çapemenîye û rayaumûmî rê;

 

Mûwekîlê me Rêzdar Abdullah Ocalanî 1999 ra nata, Omer Hayrî Konar, Hamîlî Yildirim û Veysî Aktaş zî adara 2015î ra nata Zîndanê Îmraliyî de binê tecrîdî de tepişîyenê. Eşkerayîye de ame vîrvistene ke 3ê adara 2020î ra nata pêvînayîşo fîzîkî nêameyo kerdene û 25ê adara 2021î pêvînayîşê bi telefonî ra nata zî Ocalanî ra xeberêke nêameya girewtene.

 

Eşkerayîye wina dewam kena: “Muwekîlê ma Birêz Ocalan dinya ra yeno îzolekerdene, binê tecrîdî de tepişîyeno. Na rewşe vera krîteranê huqûqê mîyanneteweyî û mewzûatê neteweyî ya û yena manaya îşkence û têgêrayîşê xirabî. Rixmo ke ma hende xîret zî kerd heyf ke rewşe nêvurîyaye.

 

Ma heta nika Dezgehê Çimdarîya Umûmîye, Komîsyonê Heqanê Merdiman ê Meclîsî, Wezîrîya Edaletî zî tede xeylêk cayan rê muracar kerd. Reyna ma Mehkemeya Heqanê Merdiman a Ewropa (MHME), Komîteya Heqanê Merdiman a Neteweyanê Yewbîyayeyan (NY) rê muracat kerd la muracatê ma bêcewab mendî û tecrîd nêwedarîya. Ma wazenê bivisnê vîrî ke 2019 de Wezîrîya Edaletî grevê vêşanîye ra dima pare kerdbi ke verê pêvînayîşan de yew astengîye çin a. La wezîrîye sozê xo nêard ca.

 

Mekanîzmayê neteweyî û mîyanneteweyî bêtesîr ê

 

Huqûqê mîyanneteweyî û mewzuatê neteweyî de çîyo winasên çin o ke pêvînayîşî bêrê astengkerdene. Mecburîyîyêka huqûqî ya ke tepişteyî tim bieşkê keye û avûkatanê xo bivînê. La rixmê ney zî 20 mengî yo destûr nêdîyeno ke ma muwekîlê xo ra xeberêke bigêrê. Hetê bînî ra Heyetê Çimdarîya Zîndanan ê ke di mengan de reyêke şinê zîndanan, raporê xo yê serê Îmraliyî eşkera nêkenê.

 

Ganî raporê heyetê taqîbkerdişê zîndanan bi rayaumûmî reyde pare bikerê

 

Ma nêzanenê ke muwekîlê ma eşkenê xo biresnê agahîye, înan rê sansur û astengîya kitaban yeno ferzkerdnee, kovare û rojnameyî resenê înan yan nê. Hetê bînî ra pê cezayanê dîsîplînî zî destûr nêdîyeno ke muwekîlê ma heqanê xo yê aktîvîteyanê hemparan bişuxilnê. Raporanê CPTyî de zî ame parekerdene ke nê cezayê dîsîplînî ‘xapînayox ê’ û nênê qebulkerdene. Xûlasa 20 mengî yo xebera ma pa çin a ke Birêz Abdullah Ocalan û muwekîlê ma yê bînî şertanê senînan de tepişîyenê û maruzê çita manenê.

 

Na babete de tek têgêrayîşêko manadar no bi ke CPT mabênê 20-29ê êlula 2022î de Tirkîya zîyare kerde û şi Îmrali zî. Ma 13ê teşrîna verêne ya 2022î de CPTyî reyde pêvînayîşêk kerd. Selahîyetdaranê CPTyî nê pêvînayîşî de ne derheqê muwekîlanê ma de agahîyêke daye ne zî cewab da persanê ma. Nê pêvînayîşê 45 deqayan de înan vera vat ke ê do raporêkî amade bikerê û pêşkêşê Tirkîya bikerê û ancax pê destûrê Tirkîya do bieşkê raporî rayaumûmîye de vila bikerê. Ma zanenê ke no prosedur ancax serrêke yan zî serrêke nême de temam beno. La nê prosesî de no wexto derg do bibo sebebê zeraranê pîlan. Xora ma prosesê CPTyî ra hayîdar ê la reyna zî prosedûrê CPTyî asteng nêbeno ke ma muwekîlanê xo ra xeberêke bigêrê.

 

CPT ganî derheqê pêvînayîşî de agahî bido

 

Hetê bînî ra ma pê eşnawit ke Birêz Ocalanî êlula 2022î de pêvînayîşê bi CPTyî red kerd. CPTyî pêvînayîşê bi ma (Asrinî) de no çîyo ke ma eşnawito red nêkerd. Eke wina yo zîyaretê CPTyî cayê nîqaşanê pîlêran o. CPT ganî goreyê krîteranê xo û krîteranê huqûqê mîyanneteweyî derheqê pêvînayîşê Îmraliyî de agahdarîyêke bikerê.

 

Ma bi hawayêkê perîyodîkî CPTyî ra agahîyan wazenê. Reyna ma muracatê Wezîrîya Edaletî kerd ke derheqê babete de agahîyan bida ma. Reyna ma bêmabên seba pêvînayîşî muracatê Serdozgerîya Komare ya Bursa, Hakîmîya Înfazî û Îdareyê Zîndanî kenê.

 

Na çarçewa de seba pêvînayîşî ma xîretê ma bêmabên dewam kenê. Ê kesê ke terefgîrê heq û azadîyanê merdiman ê zî ganî na babete de hesas bibê û prosesî teqîb bikerê

 

Bi Rêzdarî. 29.11.2022

Buroyê Huqûqî yê Asrînî."