WAN - Cinîyî reaksîyon mojnayî destbendkerdişanê ke bi talîmatê Serdozgerîya Komarî ya Anqara virazîyayî û vatî: “Tu polîtîka do nêeşkê fek têkoşînê ma ra bido verdayîş.”

 

Vizêr bi talîmatê Serdozgerîya Komarî ya Anqara Mûş, Mêrdîn, Stenbol, Anqara, Amed, Adana, Sêrt, Wan, Agirî, Îzmir, Riha, Mersin, Dîlok û Şirnexî de polîsan eşt xeylê keyeyan ser û endamê Meclîsê Cinîyan yê Partîya Demokratîke ye Şaran (HDP) û aktîvîstê Tevgerê Cinîyanê Azadan (TJA) destbend kerdî. Cinîyê ke ameyî destbendkerdiş berdî Anqara. Ame zanayîş ke bi îdîayê ‘endamtîya rêxistin’, ‘rayîrberîya rêxistin’, ‘propagandaya rêxistin’ û ‘hetkarîya rêxistin’ ra dehqîqat dîyayo dest pêkerdiş. Derheqê tehqîqatî de qerarê nimite ame dayîş. Cinîyan reaksîyon û nêrazîbîyayîşê xo yê hemverê destbendkerdişan mojnayî. 

 

'Tepiştiş û destbendkerdiş do ma nêtersno’

 

Cinîyê sîyasetmedarî yê ke reaksîyon mojnayî destbendkerdişan dîyar kerdî ke amacê destbednkerdişan terse cinîye ra yo. Rayîrbera HDPyî ya Rayîrê Armûşî Zubeyde Ozalpe da zanayîş ke bi destbendkerdiş û tepiştişan wazenê cinîyan bitersnê û wina vat: “Ma do vera şîdetî de têkoşîn bikerê û cigêrayîşê xo yê edaletî dewam bikerê. Ewro 50 cinîyî destbend kerdî do siba 100 cinîyî herinda înan bikerê û têkoşînê xo dewam bikerê. Heqê ma çi bibo ma aye wazenê. Nê destbendkerdiş û tepiştişî do çimanê ma nêtersnê.” 

 

'Seba ke şerê înan îfşa nêbo nê şerî domnenê’

 

Rayîrbera HDPyî ya qezaya Rayîrê Armûşî Dilyar Çalişkane dîyar kerd ke 5 hezar serrî yo polîtîkaya şîdetî serê cinîyan de dewam keno û vat: “No bi seyan serrî yo ma hemverê zîhnîyetî de têkoşîn danê. Bi deste dewlete hemverê cinîyan de şîdet yeno kerdiş. Coka ra şîdetê hemverê cinîyan polîtîk o. Dewlete zana ke do Kurdistan pê têkoşînê cinîye azad bibo. Seba ke şerê înan îfşa nêbo nê şerî domnenê. Ma do qet têkoşînê xo ra fek vera nêdê.”

 

'Wa embazê ma lezûbez serbest bêrê veradayîş’

 

Hemsereka HDPyî ya qezaya Rayîrê Armûşî Canan Uzunaye qiseykerdişê xo de vat ke bi serran o pê tepiştişan têkoşîn yeno astengkerdiş û wina dewam kerd: “Têkoşînê cinîyan ra tersenê. Heme xebatêma bi raya pêroyî rê akerde yê. Ma badê tepiştiş û destbendkerdişan hîna zêde wayîrê têkoşînê xo vejîyenê. Ma wazenê ke lezûbez embazê ma serbest bêrî veradayîş.”

 

Bi felsefeya 'Jin jiyan azadî' bivejêne raşteyan

 

Cinîyan ra tewr peynî hemsereka Partîya Herêmê Demokratîkî (DBP) Şengul Polate qisey kerd û vat: “Operasyono ke ame kerdiş qirkerdişê sîyasî yo. Hemverê nê operasyonanê sîyasîyan de ma do hîna zêde raşteyan de bibê. Do hemverê polîtîkaya dişmenîye ya cinîyan de raşteyan de cinî bibê. Îqtîdarî zanê ke do saltanatê înan pê deste cinîyan birijîyo. Coka hedefê înan de ewil cinî esto. Destkewtişê cinîyane esto. Qetilkerdişê Nagihan Akarsele nimuneyêk o. Sloganê 'Jin jiyan azadî' nîşaneyê na rewşe yo ke do na seserre biba seserra cinîyan. Bi felsefeya 'Jin jiyan azadî' bivejêne raşteyan. Serewedarnaşê Arin Mirkana ke hemverê DAÎŞî de çalakîya fedaî kerd û serewedarnayîşê Jina Emînî ya ke Rojhilat de ameye qetilkerdiş bedelîya felsefeya 'Jin jiyan azadî."