ÎZMÎR - Cinîyan dîyar kerdî ke destbendkerdişan de astengkerdişê bernameyê TJA û krîmînalîzekirdişê TJAye yeno hedefgirewtiş û vatî cinîyê kurdî bi nê polîtîkayanê şerî nêeşkenê bêrê vindarnayîş.

 

Çarçewaya tehqîqato ke Serdozgerîya Komarî ya Anqara da destpêkerdiş de xeylê aktîvîstê Tevgerê Cinîyanê Azadan (TJA) ameyî destbendkerdiş. Cinîyan dîyar kerdî ke destbendkerdişan de astengkerdişê bernameyê TJA û krîmînalîzekirdişê TJAye yeno hedefgirewtiş û vatî cinîyê kurdî bi nê polîtîkayanê şerî nêeşkenê bêrî vindarnayîş. Sewbîna cinîyan vatî ke cinîyê TJAye tena nîyê, do pîya têkoşîn bikerê.

 

‘Ganî heme cinîyî vengê xo berz bikerê’

 

Aktîvîsta TJAye Hayat Îzgîye da zanayîş ke îqtîdaro dişmenê cinî bîyayîşê cinîyan yê ke ameyî yew ca ra terseno û amacê înan no yo ke çimê cinîyan bitersî, xebatê înan sabote bikerê. Hayate nê çîyan ard ziwan: “Embazê ma yê ke ameyî destbendkerdiş Tevgerê Azadîya Cinîya Kurde ra yê. Tena cinîyê kurd nê ganî pêro cinîyî bêrê têhet û xebatê xo xurt bikerê. Vengê mi no yo. Xurtkerdişê xebatan do înan hîna zêde xurt bikero. Amacê destbendkerdişan pelçiqnayîş û sere ronayîş o. Cinî do qebul nêkerê. Ma do hîna zêde bivejîyî raşteyan, hîna zêde wayîrê heqanê xo bivejîyê. Ez veng heme cinîyan kena. Wa bivejîyê raşteyan. Cinî keye de şîdet vînenê, sîstemî ra şîdet vînenê û cayê karî de vînenê. Tena cinîyê kurd nê, no problemê pêro cinîyan o.”

 

‘TJA pêro nasnameyê cinîyan yew kena’

 

Hemsereka Partîya Demokratîke ya Şaran (HDP) ya Îzmîrî Berna Çelîke zî da zanayîş ke demêk dergo ke hemverê Têgêrayîşê Cinîya Kurde de hêrişê cinî estê, bi tabetî hewl yeno dayîş ke TJA bêra krîmînalîzekerdiş. Bernaye wina dewam kerd: “Têgêrayîşê Cinîya Kurde qet têkoşînê xo de tena rayra nêşîyo. Çalakî û bernameyê ke cewab danê rihê her wextî rona raşte. Wexto ke wina kerd zî serê nasnameyê cinîya kurde de nê heme nasnameyanê cinîye ser de kerd. No proses zî prosesêk wina yo. Her tim wextêk muhîm de hemverê cinîya kurde de hêriş pê ameyî. Prosesêk şerî esto. Feqîrî kewto merheleya tewr cor. Kiştişê cinîyan, tepiştişê cinîyan her ke şino zêde beno. Embazê ma yê ke raşteyan de xebatan rayra benê nika tepişte yê. Ganî lezûbez serbest bêrê veradayîş. Ez veng dana heme cinîyan ke wayîrê TJAye bivejîyê.”

 

‘Wazenê bi polîtîkayê şerî bêveng bikerê’

 

Tora Pawitişê Cinîye ra Gîzem Coşkune ard ziwan ke dewlete verê şîdetê xo dana cinîyan û cinîyê kurdî yê ke têkoşînê azadîye danê bi propagandayê sîya, bi polîtîkayê şerî yenê bêvengkerdiş. AKPyo ke meşrubîyayîşê xo vînî kerdo, muracatê şîdetî keno û sucê heqanê merdiman pê ano. Nîjadperestî gur keno. La cinî do qet fek heq û cuya x ora vera nêdî. Ma do hemverê faşîzmî de têkoşînê xo yê femînîstî rêxistin bikerî û paştîdayiyo gird bikerî. Ma do hemverê faşîzmî de bi eksî bêrî têkişt. Ma do her embazêk xo ya cinî bi paştîdayîş bidî cuyayîş.”

 

‘Îqtîdar hêrişê cinîyan keno’

 

Paştîdayîşê Morî ra Denîz Usluye zî derheqê babete de ercnayîşan kerd û vat ke rayraşîyayîşê 25ê Teşîrna Peyêne de hemverê cinîyan de hêriş pê ameyî û dima ra aktîvîstê TJAye ameyî destbednkerdiş. Denîze wina vat: “Destbendkerdişî dewamê hêrişê hemverê cinîyan î. Hem destbendkerdiş, hem zî hêrişê hemverê çalakîya 25ê Teşrîna Peyêne yî. Heto bîn de ma musayî ke di cinîyê koçberî yê ke tewrê çalakîye bîyî do bêrî tebersînorkerdiş. Her çar hetî de hêriş esto. AKP bi hêrişanê hemverê cinîye hewl dano cayo xo daîmî bikero. La embazê ma yê TJA û embazê ma yê bînî qet ser nêronayî. Ganî lezûbez serbest bêrî veradayîş.”