ANQARA - Vervatoxa HDPyî ya Ebrû Gunay da zanayîş ke ganî Rayberê PKKyî Abdullah Ocalan bêro veradayîş û vat: “îqtîdar seba dîzaynkerdişê sîyasetê mîyanênî, seba serkewtişê weçînayîş de sey stratejîyê ke nê şerî keno. No îqtîdar reyke bîn bi teyareyê şerî, bi kiştiş û rijnayîşî dest bi kampanyaya weçînayîşê kerdo.”

 

Vervatoxa Partîya Demokratîke ya Şaran (HDP) Ebrû Gunay merkezê pêroyî yê partîya xo de kombîyayîşêkê çapemenîye pê ard.

 

Ebrûye bale ant serê hêrişê Vakur û Rojhelatê Sûrîye û vat, "No şer hemverê bîyayîşê Kurdan o, hemverê heq û destkewtişê Kurdan o. Bi nê şerî wazeno şorişê ke zêdeyê des serran o bi berdêlê giran yê şarê Vakur û Rojhelatê Sûrîye ameyo awankerdiş, teslîmê hemkarê xo yê lêşin, çeteyê dişminê merdimayî bikerê.”

 

Ebrû Gunaye dîyar kerd ke rîyêk bîn ê muhîmî yê nê şerî zî oyo ke şexsê Kurdan de hemverê temamê komelî yê, şerêkê pîl ê seba teslîmgirewtişê komelî yo û wina dewam kerd, "Îqtîdar seba dîzaynkerdişê sîyasetê mîyanên, seba serkewtişê weçînayîşî de seke stratejiyêkê nê şerî keno. No îqtîdar reyke bîn bi teyareyê şerî, bi kiştiş û rijnayîşê dest bi kampanyaya weçînayîşî kerd.”

 

Hêrişê serê Taksîmî

 

Ebrû Gunay bale ant serê hêrişê Taksîmî yê Stenbolî û vat: “Serekê Pêroyî yê AKPyî roja Dişeme qisey kerd û reyke bîn kurdan tehdîd kerd. Heto bîn ra zî îdîa kerd ke tarîxê Tirkîya de 'tena edalet, rehm û tecrûbeyê cuya pîya esta’. Halbûkî ey bi xo seba qirkerdişê Dersimî vatibi felaketêkê bi gonî, qirkerdiş û seba nê yewî ozir waştibi.”

 

Eşkerayîye de Ebrûye vat, "Bi nameyê HDPyî ma reyke bîn rayaumumî yê demokratîke yê nê welatî û şarê ma yê bindestî ra vanê; ma do tu wext teslîmê nê sîyasetê kiştiş û şerî yê tifaqê AKP-MHPyî nêbê. Sîyasetê hemverê şer û awankerdişê aştîya komelî seba ma têkoşînê esas o. Ma do hemverê sîyasetê mergî yê îqtîdarê AKP-MHPyî cuye bipawê. Her gama prosesê weçînayîşî de ma do bi mîqyas têbigêrê.”

 

‘Polîtîkaya tecrîdî ya Îmraliyî her roje hîna xorî beno, nîno qebulkerdiş’

 

Verfeka HDPyî Ebru Gunaye ard ziwan ke înan her firsendî de ardî ziwan ke sîyasetê şer, feqîrî, rişnayîş û mergî polîtîkaya tecrîdî vera yî û wina vat: “Polîtîkaya tecrîdî ya Îmraliyî her roje hîna xorî beno, nîno qebulkerdiş. Tewr peynî avûkatê Baroyê Huqûqî yê Seserrî bi eşkerayîyêk dîyar kerdî ke qerarê polîtîk û nizdîbîyayîşê hemverê huqûqî vera 20 aşmî yo ma nêeşkenê Birêz Ocalanî ra xeber bigêrî. Sewbîna eşkera kerdî ke înan eşnawito ke zîyaretê CPTyî yê aşma êlula 2022î yê Girawa Îmrali de Birêz Ocalan pêvînayîş nêkerdo. Na rewşe sewîyeya rejîmê tecrîdî yê Girawa Îmraliyî mojnena.”

 

Veng dîya CPTyî 

 

Ebru Gunaye da zanayîş ke şikê bêhuqûqîya Îmraliyî gird bîyî û wina vat: “Ma yewna reye veng danê CPTyî ke wa detayê zîyaretê xo yê peynî rayaumûmî reyde pare bikero û nêbo hemkarê sucê tecrîd û îşkenceyî yê îqtîdarî. Polîtîkaya tecrîdî ya serê Birêz Ocalanî mojneno ke israrê îqtîdarî hetê nêçareserîye de yo. Îqtîdar bi polîtîkaya tecrîdî hewl dano ke krîzê huqûq, edalet, heqê merdiman û ekonomîye ra fêyde bigêro û sîyasetê şerî de israr bikero.

 

Tecrîd bîyo nasnameyê sîyasî yê îqtîdarê AKPyî û nizdîbîyayîşê ci yê rayîrberî. Weriştişê hemverê polîtîkaya tecrîdî weriştişê hemverê polîtîkaya şer û rejîmê yewperestîye yo. Coka ra ma tîya ra reyna vanê ke adresê sîyaseto demokratîk û çereserîye Birêz Ocalan o. Ma veng dane rayaumûmî ya demokratîk ke seba peynîbîyayîşê bêhuqûqî û tecrîdê Girawa Îmraliyî bikewî mîyanê têgêrayîşan.”

 

Eşkerayîye de veng dîya Wezîrîya Edaletî ke cewab bida muracatê selahîyetdaranê DBP û HDPyî yê ke seba şîyayîşê Îmrali û îmkan bida ke bilez pêvînayîşê keye û avûkatan Îmrali de bieşko bêro kerdiş.