ANQARA - Reaksîyonê hemverê operasyonê cinîyanê TJAyî de ameyo kerdiş dewam keno. Xeylêk kesî mesajê, ‘cin şûşe ra vejîya, cinî hemverê destbendkerdişê sereyê xo nêtewênenê, têkoşînî pîl kenê û do sere nêtewênê” dayî.

 

Hetê Serdozgerîya Komare ya Anqarayî ra bi îdiayê ‘endamîya rêxistine’, ‘îdarekarîya rêxistine’, ‘kerdişê propagandayê rêxistine’ û ‘peydakerdişê ekonomîya rêxistinê rê’ çarçewaya cipersayîşê çalakîyê rayîr ra şîyayîşî de 14 bajarî bi hawayêkê hemdem erzîya serê 57 keyeyan. Sereştişî keyeyan ke verê bi îfadeyê şahidê nimite û şahidê eşkera, raporê HTS û MASAKî amebî kerdiş, hacetî amebî desteserkerdiş û netîceyê cigêrayîşî de derheqê 50 cinîyan de qerarê tepiştişî estbî. Sereştişê keyeyan de 16 cinî ameyî destbendkerdiş.

 

Reaksîyonê hemverê operasyonê cinîyan de dewam kenê. Cinîyan reaksîyonê xo bi mesajêkê hempar ê ‘cinî do nêtersê, sereyê xo nêtewênê, hemverê polîtîkayê şerî yê taybetî do xoverdayîş pîl bikerê’ mojnayî. Cinîyan derheqê destbendkerdişan de ajansê ma rê ercnayî.

 

‘Îqtîdaro ke cinîyan ra terseno hêrişan zêde keno’

 

Endama MYKyî ya Partiya Demokratîke ya Şaran (HDP) Ozlem Gunduz da zanayîş ke îqtîdarê AKP-MHPyî wazeno hawirê şerî awan bikero û wina vat: “Îqtîdar ke faşîzmî her ke şino giran keno, kaos û krîzî bi girankerdişê şerî hewl dano ke binimino. Îqtîdar bi serran o ke polîtîkayê dişminê cinîye keno. Sere de cinî, hemverê Kurdan, muxalîfan û heme hetan ra teda û pelçiqnayîşî keno dewre. Ma cinîyê ke têkoşîn kenê, her wext nê vanê; seserra 21ine do biba seserra cinî û yê ke zorê nê faşîzmî benê cinî yê. Îqtîdaro ke nê rastî vîneno, hêrişê xo yê hemverê cinîyan de destkewtişê cinîyan zêde keno.”

 

‘Îqtîdar zano ke do cinîyî cayê înan birijnê’

 

Ozleme dewam de wina vat: “Pêwa pêro hêrişê cinîyan her ca de, her ware de têkoşînê bîyayîş û têkoşînê pawitişê destkewtişê xo dayî. Kuçe, keye, kargeriyan, zîndanan. Heme ware wareyê têkoşînê cinîyan ê. Cinîyan tu wext fek têkoşîn ra vera nêdayî. Îqtîdar hêzê cinîyan ra terseno. Zaneno ke do cinî cayê înan, kursîya înan birijnê. Seba nê zî operasyonan kenê, hêrişan kenê, îdianameyê veng û organîzekerde amade kenê û cinîyan tepişnenê. Bi operasyonê peyîn zî mesajê ‘şima têkoşîn bikerê, şima do bêrê tepiştiş’ danê cinîyan. Serê cinîyanê Kurdan de mesajê danê pêro cinîyan.”

 

‘Do nêeşkê vernîya xoverdayîşê cinîyan padê’

 

Vervatoxa Masaya Elewîyan ê Komîsyonê Şar û Bawerîyan Songul Tunçdemîr dîyar kerd ke AKP operasyonê terorîzekerdişî û şîdetî hemverê cinîyan de xeylêk zêde kerdo û vat: “AKP kewto cayê tengî. Seba nê teda Kurdan, Elewî, bindestan keno. Sere de yeno zanayîş ke hemverê cinîyan de polîtîkaya dişminî yena rayraberdiş. Cinîyê ke têkoşîn kenê, seba îqtîdarî tehlukeyêk pîlî yê. Rêxistinbîyayîşê cinîyan zehmet o la eke xo bi rêxistin bikerê destê xo kenê binê her kerra. Seba nê cinî sey tehluke yenê vînayîş. Yê ke ewil hedef yenê girewtiş, cinîyê Kurdî yê. Cinîyê Kurdî xoverdayox ê û do heta peynî wayîrê xoverdayîşî vejîyê. Kes do nêeşko vernîya têkoşînê cinîyê Kurdan pado. Ganî reaksîyonî hîn zêde pîl bibê. Tena hemverê cinîyê TJAyî her cayê welatî de operasyonî estê. Ez şermezar kena. Nê hêrişî operasyonê hemverê Rojawanî cîya nêeşkeno bêro ercnayîş. Şorişê cinîyan ê Rojawanî, cinîyê Kurdî awan kerd. Seba nê wazenê heyf bigîrê. Ganî nê hêrişî pîya bêrê ercnayîş.”

 

‘Hewldayîşê şikinayîşê xoverdayîşê cinîyan o’

 

Endama Meclîsa Partiya HDPyî Feray Mertoglu zî ard ziwan ke operasyonê hemverê TJAyî parçeyêke polîtîka û hêrişê 5 serrî hemverê tevgerê cinîyan yeno kerdiş o. Feraye peynî de wina vat: :”Seranserê dinya de demê krîzan de ewil verê xo danê destkewtişê cinîyan. Tirkîya de zî îqtîdarê AKP-MHPyî derheqê weçînayîşan de wazeno xo rê ca awan bikero. Cinî do prîm nêdê nê hêrişan. Teda û hêrişê înan do bi cinîyan sere nêdê tewênayîş. Ma 25ê teşrîna peyêne de dî. Nê hêrişî netîce nêdanê. Do têkoşîn hîn zêde xurt bikero. Cinî do sere nêtewênê.”