Sema Çaglak

 

MÊRDÎN - Ozlem Gumuştena ke nameyê Jîna Emînî da tuta xo ra dîyar kerd ke aye bi nê nizdîbîyayîşê xo waşta ke name û xoverdayîşê Jînaye bidî cuyayîş û vat: “Jîna bî sembola xoverdayîş û serewedarnayîşî. Cinîyê ke hemverê faşîzm û rejîmî de têkoşîn danê do ser bikewê.”

 

Cinîya kurde Jîna Emînî ya 22 serre Tehran de hetê polîsanê exlaqî yê Îranî ra seba ke laçika xo goreyê raybaz û qanûnanê şerîatî nêgirewtbî û gijikê ci asayêne 13ê êlule de ameye îşkencekerdene û 16ê êlule de zî dinyaya xo bedilnaye. Rojhelatê Kurdistan û Îranî de çalakîyê ke qetilkerdişê Jîna Emînî ra dima dest pêkerdbî. 16ê êlule qetilkerdişê Jîna Emînî ra nata şarê Rojhelatê Kurdistan û Îranî payan ser de yê. Cinîyî hemverê rejîmê dîktatorî û ferzkerdişê laçikî de sloganê ‘Jin jiyan azadî’ berz kerdî û çer hetan ra herikîyayî raşteyan. Qetilkerdişê Jîna pêroyê dinya de ame şermizarkerdiş. Reaksîyon û nêrazîbîyayîşê hemverê qetilkerdişê Jîna û sewbîna paştîdayîşê seba serewedarnayîşê Rojhelatê Kurdistanî û Îranî dewam keno.

 

‘Ma wazenê xoverdayîşê Jîna bidî cuyayîş’

 

Ozlem Gumuştena (26) ke qezaya Qoserî ya Mêrdînî de manena nameyê Jîna da tuta xo ya ke newe bîya. Ozleme dîyar kerd ke înan waştî ke xoverdayîşo ke badê qetilkerdişê Jînaye vejîya hîna gur bikerî û vat: “9ê Teşrîna Verêne de tuta mi ameye dinya û ma nameyê Jîna aye kerd. Seba ke Jîna Rojhelat û Îranî de bî sembolê serewedarnayîşî. Jîna hetê kesê ke xo rê vanê polîsê exlaqî ra ameye qetilkerdiş. Serewedarnayîşo ke badê qetilkerdişê Jînaye vejîya heme cayê dinya de bî vila. Her ca ra seba çalakîyan paştîdayîş virazîya. Tay kesî bi tirakerdişê porê xo, tay bi xêzkerdişê fotografê Jînaye, tay zî bi vêşnayîşê laçikanê xo bîyî vengê Jînaye. Ma zî waştî ke bibî parçeyê xoverdayîşî û nameyê Jînaye coka ra ma da tuta xo. Ma wazenê xoverdayîşê Jînaye bidî cuyayîş.” 

 

‘Serkewtiş do bibo yê cinîyan’

 

Ozleme peynîya qiseykerdişê xo de têkoşîn û xoverdayîşê cinîyê Rojhelatê Kurdistan û Îranî silam kerd û wina peynî ard: “Badê qetilkerdişê Jînaye serewedarnayîşê ke bi serkêşîya cinîyan gur bî heyecanêk gird ma de viraşt. Sloganê 'Jin Jiyan Azadî' her cayê dinya de bî vila û na rewşe hîna zêde heyecanêk da ma. 'Jin Jiyan Azadî' slogano ke bi serran o têkoşînê ci yeno dayîş ra yo. Jîna hem cinîbîyayîş û a hem zî kurdbîyayîşê xo vera ameye qetilkerdiş. La Jîna bî sembola xoverdayîş û serewedarnayîşî. Cinîyê ke hemverê faşîzm û rejîmî de têkoşîn danî do ser bikewî. Ez têkoşînê cinî û şarê rojhelatê Kurdistan û şarê Îranî silam kena û vana ke zerrîya ma verê înan de ya. Têkoşînê cinîyan ke bi serran o yeno dayîş hema nêqedîyayo û do nêqedîyo zî. Serkewtiş do yê cinîyan bibo.”