WAN - Hemverê tecrîdê serê Rayberê PKKyî Abdullah Ocalanî do 12ê kanûne de rayraşîyayîşêk pê bêro. Cinîyî seba tewrbîyayîşê rayîr ra şîyayîşî veng dayî û vatî: “Hemverê polîtîkaya tecrîdê zîndanan wext wextê vatiş, wextê çalakîyan o.”

 

Rayberê PKKyî Abdullah Ocalan serra 1999î ra nata zîndanê Tîpa Fyî yê Îmralîyî de binê şertanê giranan de yeno tepiştiş. Abdullah Ocalanî ra 20 aşmî yo tu xeberêke nêameya girewtiş. Hemverê tecrîdî de do di bajaranê Kurdistanî de rayrîrraşîyayîşêk pê bêro. Bi serkêşîya Tevgerê Cinîyanê Azadan (TJA), Kongreya Komela Demokratîke (KCD), Partîya Herêmê Demokratîkî (DBP), Partîya Demokratîke ya Şaran (HDP), Federasyonê Komeleys Paştîdayîş û Huqûqî ya Keyeyê Tepişteyan ya Medî (MED TUHAD-FED), Komeleya Huqûqnasê Seba Azadîye (OHD) û Meclîsê Dayîkanê Aştîye do 11ê kanûne de Amed de û 12ê kanûnê de zî Wan de rayraşîyayîşêk pê bîyarê.

 

Wan de cinîyan derheqê tecrîdî de ercnayîş kerdî û seba rayîr ra şîyayîşo ke do pê bêro veng dayî.

 

‘Ganî her kes destê xo bikero binê kerra’

 

Rayîrbera GOÇDERî Ayten Kirane da zanayîş ke îqtîdarê AKP-MHPyî serê merdimîye de tecrîd pê ano û tecrîd sucê merdimîye yo. Aytene wina dewam kerd: “Seba destkewtişê demokratîke ganî her kes xover bido. Ganî her kes wezîfeyê xo bîyaro ca. Tepişte binê tecrîdî de yê. Ganî ma çîyêk bikerê û bêveng nêmanê. Ganî ma kişta tepişteyan de ca bigîrê û nê tecrîdî birijnê.” 

 

‘Wextê çalakîyan o’

 

Hemsereka HDPyî ya Artemîtî Berîvan Polat Çaglayane reaksîyonê xo yê hemverê tecrîdî ard ziwan ser û vat ke wextêko dergo ke Îmrali de tecrîd dewam keno û wina dewam kerd: “Rayîr ra şîyayîşê 12ê kanûne seba bale antişê serê tecrîdî do pê bêro. Îqtîdar zîndanan de tecrîd pê ano û bedelê giranî tepişteyî danê. Ma têkoşînê nê çîyî danê. Heta ke tecrîdê Îmrali nêwedarîyo tecrîdê serê Şarê Kurdî nêwedarîyeno. Seba wedarnayîşê tecrîdî wext wextê vatişî yo, wext wextê çalakîyan o. Hemverê zilmî de ganî şar bivejîyo raşteyan. Rewşa tepişteyanê nêweşan her ke şina giran bena. Hêvîya mi na ya ke her kes hemverê zilmî de vengê xo berz bikero. Ez her kesî dawetê têkoşînî kena.”

 

Hemsereka HDPyî ya Wanî Handan Karakoyune zî dîyar kerd ke tecrîdo ke pê yeno vera welat ameyo çinîkerdişî ver û wina qiseykerdişê xo peynî kerd: “Roja ke pêvînayîş ameyo birnayîş ra nata welat bedelîyayo cayê adirî. Her raşteyî de krîzê ekonomî, sîyasî û şer giran bîyo. Hemverê binpaykerdişê heqan yê Îmrali û heme zîndanan ma do raşteyan de bibê.”