ANQARA - Sîyasetmedare Nursel Aydogane da zanayîş ke tecrîdê serê Rayberê PKKyî Abdullah Ocalanî bedelîyayo ‘îşkenceyo spî’ û dîyar kerd ke CPT 24 aşmîyo şino Îmrali la wexto ke merdim ewnîyeno realîteya CPT hetê vernîgirewtişê tecrîdê serê Birêz Ocalanî de zêde bi tesîr nîyo.

 

Tecrîdo giran yê serê Rayberê PKKyî Abdullah Ocalanî dewam keno. 20 aşmîyo Abdullah Ocalanî û tepişteyanê bînan ra xebere nîna girewtiş. Keye û avûkatî muracatê Mehkemaya Înfazî ya Bursa kenî la bi bahaneye ‘qedexeyê pêvînayîşê avûkatan’ û ‘cezaya dîsîplînî’ muracatî yenê redkerdiş. Komîteya Vernîgirewtişê Îşkence ya Konseyê Ewropa (CPT) 20-29ê êlule de ame zîyaretê Tirkîya û derheqê zîyaretî de 3ê Teşrîna Verêne de eşkerayîyêk da û vat ke mîyanê dezgehê ke şîyî zîyaretê înan de Zîndanê Asayîşo Berz yê Tîpa Fyî yê Îmrali zî estbî. Baroyê Huqûqî yê Asrînî ke muafîtîya Abdullah Ocalanî rayra beno, 29ê Teşrîna Peyêne de eşkerayî da û vat ke ‘CPT aşma êlule de şîyo Îmrali la Birêz Ocalan nêvejîyayo pêvînayîş.’

 

Sîyasetmedara Kurde Nursel Aydogane derheqê tecrîdê serê Rayberê PKKyî Abdullah Ocalan û pêvînayîşo ke Abdullah Ocalan bi CPTyî reyde nêkerdo de ercnayîşan kerd.

 

‘Ma tecrîd qebul nêkenî’

 

Nursele ard ziwan ke Abdullah Ocalan tewr peynî 25ê Adara 2011î de birayê xo Mehmet Ocalanî reyde pêvînayîş pê ardo û wina vat: “Avûkatan reyde nêeşkeno pêvînayîş pê bîyaro. No teberhuqûqîyêk gird o. 21 serrî yo tecrîdêk giran serê ci de yeno rayraberdiş. Tecrîd bi tena serê xo îşkence yo. Tesîrê tecrîdî serê xozaya merdimîye de xeylê giran o. Îşkence sucê merdimîye yo. Se beno wa bibo tecrîd nîno qebulkerdiş. CPT 29ê êlule de şino Îmrali û na rewşe reyde tabloyêk newe vejîya raşte. Xebere ame ke CPT şîyo Îmrali la Birêz Ocalan pêvînayîş nêkerdo.”

 

‘Prosesê pêkewtişî rolê Ocalanî newera vet raşte’ 

 

Nursele dewamê qiseykerdişê xo de dîyar kerd ke CPT Ocalanî reyde pêvînayîş pê nêardo, coka ra komel mîyan de şikê cîdî vejîyayî raşte û birêz Ocalan muxatabo yewine yê çareserîya problemê Kurdî yo û wina dewam kerd: “Keso yewin o ke paradîgmaya ke Rojhelato Mîyanênî de aver berdo û beno yo. Keso yewin o ke problemê Kurd çareser keno yo. Keso yewin o ke hêrişê Rojawanî eşkeno bido vindarnayîş. Eşkerayîya peynî ya CPTyî şikin a. Selahîyetdarê CPTyî vatî ke tepişteyan reyde pêvînayîş pê ardî la derheqê Ocalanî reyde pêvînayîş pê ardî ya zî nêardî de ercnayîşêk nêkerdî. Ma fehm kerd ke Birêz Ocalan nêvejîyayo pêvînayîşî. Ma fehm kerd ke seba ke avûkatî nêeşkenê şêrî Îmrali Birêz Ocalan CPTyî protesto kerdo. Ma qala îradeya Ocalanî kenî. Her çend ke AKP û MHP çareserî nêarî ziwanê xo ser zî hewldayîşêk ke şarê Kurdî biqedîno de yo. Başûrê Kurdistanî dagir keno. Metîna û Zapî de çekê kîmyewîyan şuxulneno. Teqayîşê Stenbolî kerd bahane û hêrişê Rojawanî kerdî. Nê hêrişê her raşteyî muhîmîya rolê Birêz Ocalanî vejenê raşte.”

 

‘Do komel wayîrê îradeyê xo bivejîyo’

 

Nursele sewbîna ard ziwan ke wexto ke îqtîdar vano ‘Ma do Kurdan bikerî bin herre’, sebebê cîya yê pênêameyîşê pêvînayîşê Abdullah Ocalanî yê bi CPTyî reyde esto û wina dwam kerd: “Ganî bi çalakî û bernameyan tecrîdê serê Ocalanî bêro rijnayîş. Ganî îqtîdar hende nerehet bo. Komel mîyan de cayê Birêz Ocalanî zaf cîya yo. Şar heta ewro wayîrê serekê xo vejîyayî yo û do ewro ra tepîya zî bivejîyo. No teberhuqûqî do tu netîceyêk nêgêro.” 

 

‘Îşkenceyo spî pê anî’

 

Nursele qiseykerdişê xo wina domnaye: “CPT destêpêka ameyîşê Abdullah Ocalan yê Îmrali ra nata şino girawe. Abdullah Ocalan kitabanê xo de qala CPTyî keno. Tecrîdê serê Rayberê PKKyî Abdullah Ocalanî bedelîyayo ‘îşkenceyo spî’. CPT 24 serrî yo şino Îmrali la wexto ke merdim ewnîyeno realîteya ci CPT hetê vernîgirewtişê tecrîdê serê Birêz Ocalanî de zêde bi tesîr nîyo. Kesêk 24 serrî yo tena yeno tepiştiş. Cezaya hirê aşman yê peyînî zî bi bahaneyê tepişteyanê bînan reyde qisey kerdo, dîyaya. Badê cezaya dîsîplînî ma nêzanê ke yenê têkişt ya nê. Tena îşkence nê, tecrîdêk giran esto. Tay pawitoxê heqê merdiman na rewşe sey îşkenceyo spî bi name kenî. Îşkenceyêk wina esto, la CPT hêz û wezîfeya xo seba şartkerdişê şertê Îmraliyî nêşuxulneno. Çimanê CPTyî de tecrîd 24 serrî yo dewam keno. CPT eşkeno derheqê şîyayîşê peynî yê Îmraliyî de eşkerayî bido. Eşkeno sebebê pênêameyîşê pêvînayîşî rayaumûmî reyde eşkera bikero.”

 

‘Erdogan seba ke weçînayîş vînî nêkero beno ke berê Îmraliyî akero’

 

Nursele peynîya qiseykerdişê xo de ard ziwan ke hirê doneman parlementerî da, AKP baş nas kena, AKP partîyêka paragatîst o û wina vat: “Nika seba înan çîyo tewr muhîm no yo ke sîstemê yew camêrdî nêbedelîyo. La tay raştî estî. Ma donemê 2015î de nîyî. Her çî bedelîyayo. Rewşa tîfaqê Millet û Cumhurî de bêrî hemverê yewbînan, rolê HDPyî xeylê muhîm o. HDP rayan bido kam ci namzetî do aye tîfaq ser bikero. Erdogan tabloya bîyaye baş zano. Coka ra zî wextê weçînayîşî de beno ke berê Îmraliyî akero. La do dima ra reyna bigêro. Serra 2015î bibayêne, wexto ke donemê çareserîye estbî de eşkeyêne pê bêro. La 7 serrî derbaz bî. AKP heme hêzê xo seba qedênayîşê Kurd, HDP û serkêşê înan şuxulneno. Ser nêkewt la xeylê vînîyayîşî virazîyayî. Nê nînê vîrîkerdiş. Şarê Kurd do vîra nêkero. Ê zî vanê ma şansê xo bicerebnî. La binê na pirdî ra xeylê awe vîyart. Coka ra no wext aye wext nîyo.”