WAN - Dayîka tepişteyo bi nameyê Botan Tîmurî ke zîndanê Tîpa Fyî yê Wanî de yeno tepiştiş, Aslihan Tîmure da zanayîş ke bi desan reyan îşkence bi lajê mi ame kerdiş, şîdeto ke ame kerdiş vera nêweşî ci de vejîya û vat: “Ma nê îşkenceyî qebul nêkenê. Heqê ma binpay kenê. Ma do hemverê tu kesî de sere nêronê.”

 

Botan Tîmur zîndanê Tîpa Fyî yê Wanî de yeno tepiştiş. 7 serrî yo zindan de yo. Botan Tîmur bi ‘hetkarîya rêxistine’ ra ame muhakemekerdiş û wexto ke ame tepiştiş aşmêk zîndanê Colemêrgî de mend û dima ra erşawîya zîndanê Asayîşo Berzî yê Tîpa Fyî yê Sîncanî yê Anqara. Botan badê demêk serbest ame verdayîş û reyna ame tepiştiş. Botanî na rey berdî zîndanê Wanî. 7 serrî yo tepişte yo. Dayîka Botan Tîmurî, Aslihan Tîmur derheqê rewşa lajê xo de qisey kerd.

 

Aslihan Tîmure da zanayîş ke lajê aye 15 serrî yo tepişte yo û seba ke rayîr dûrî yo Colemêrgî ra ameyî Wan. Aslihan Tîmure wina vat: “Netîceyê îxbarî de polîsan eşt keyeyê ma ser. Botanî sereştişê keyeyî de tepişti û berdî. Tu sucê ci çinî bî.”

 

‘Wazenê cuye ra bibirnê’ 

 

Aslihane bale ant rewşa lajê xo ser û da zanayîş ke xeylê reyan îşkence bi lajê aye ameyo kerdiş û nê çîyan ard ziwan ser: “Lajê mi xeylê reyan ame îşkencekerdiş. Serê betonî de rakewtêne. Îşkence bi ci kerdî. Didanê ci şikitî. Sereyê ci şikitî. Wazenê cuye ra bibirnê.”

 

‘Nêeşkeno falîyetê sporî ra fêde bigêro’

 

Aslihane dewamê qiseykerdişê xo de fikranê xo ard ziwan ser û wina vat: “Botan 7 serrî yo tepişte yo û falîyetê sporî ra fêde nêgêno. Bi serran o odaya ke hirê kesî tede manenî de yeno tepiştiş. Falîyetanê sporî ra fêde nêgêno. Nêeşkenê tu bernameyêk pê bîyarî. Tepişteyan ser de tedayê girdi estî. Şîdet bi tepişteyan kenê. Nîmeyê şewe de erzenê odaya înan ser. Dest ronenê kitabanê înan ser. Kincê înan gênê. Ma înan senî qebul bikerê.”

 

‘Gardîyanî ma tehdîd kenê’

 

Aslihane dîyar kerd ke 25ê teşrîna peyêne de şîya pêvînayîşê lajê xo la probleman reyde rî bi rî menda û qiseykerdişê xo wina peynî kerd: “Ma silam da tepişteyanê kişta lajê mi Adnan Mîrzaî û Develî Acarî. Dayîşê silamî vera gardîyanî ma tehdît kerdî. Gardîyanî lajê mi rê vatî ‘mi to îqaz kerdbî’. Mi vat qey ti tehdît kenê? Vat qedexe yo. Ma nê caardişan qebul nêkenê. No hemverê heqanê ma de heqeret o. Ma hemverê tu kesî de sere nêronenê.”