AMED – Hemverê tecrîdî de do 11ê kanûne de Amed de rayîrraşîyayîşêk bêro organîzekerdiş. Aktîvîsta TJAyî û avûkate Pîrozxan Karalî dîyarkerd ke ganî sazgehê mîyanneteweyî Îmraliyî pêvînayîşan bikero û îdarekarîya TUAY-Derî Muşeher Ulkere zî dîyar kerd ke roniştoxê Amedî do hemverê tecrîdî tewrê rayîr ra şîyayîşî bibê.

 

No 20 aşmî yo agahî Rayberê PKKyî Abdullah Ocalanî ra nîna girewtiş. Eynî wextî de CPTyî 20-29ê Êlule de serdayîşê Zîndanê Îmraliyî de kerdibi û derheqê muracatî de tu eşkerayîye nêdabi. Labelê avûkatê Bûroyê Huqûqî yê Asrinî çend rojî verê nika dîyar kerd ke Abdullah Ocalanî pêvînayîşê bi CPTyî reyde red kerdo.

 

Nê ser de Kongreya Komeleya Demokratîke (KCD), Tevgerê Cinîyan ê Azadan (TJA), Partîya Herême ya Demokratîke (DBP), Partîya Demokratîke ya Şaran (HDP), Federasyonê

 

Tepişte û Hikumwerdoxan ê Medî (MED TUHAD-FED), Komeleya Huqûqnasê Seba Azadîye (OHD), Dayîkê Aştîye 1ê kanûne de kombîyayîşêkê adetî organîze kerd. Sazgehan eşkerayîye de dîyar kerd ke do 11ê kanûne de  Amed û 12ê kanûne de zî Wan de rayîrraşîyayîşêk girseyî organîze bikerê.

 

Aktîvîsta TJAyî û avûkate Pîrozxan Karalî û îdarekarîya TUAY-Derî Muşeher Ulker venga tewrbîyayîşî kerd.

 

‘Ganî her kes vengê xo berz bikero’

 

Pîrozxan Karalî, dîyar kerd ke polîtîkayê tecrîdî yê hemverê Rayberê PKKyî Abdullah Ocalanî û heme beşê komelî yê Tirkîya yeno kerdiş suc o û vat: “Tena hemverê Rayberê PKKyî hemverê her kesî ganî tecrîd nêro kerdiş. Seba ke pêro kesî verê qanûnî de têduşt ê. Tirkîya peymana AÎHMyî qebûl kerda. Seba ke Peymana AÎHMyî qebûl kerda, a zî qebûl kena ke ganî belgeyî vejîyê vernîya dadgehe û bêrê muhakemekerdiş. Seba na peymane muracatê dadgehe yeno kerdiş. Sazgehê mîyanneteweyî zî seba ke nê binpaykerdişî ca de tespît bikero, ganî zîndanê Îmraliyî de pêvînayîşan bikero. Ameyîşê CPTyî na çarçewa de xeylêk muhîm a. La seba ke huqûqê mîyanênî, huqûqê mîyannetweyî de pê bêro, kesê huqûqê mîyanneteweyî ameyî nê heqî bica nêardî zî  bêhuqûqîyêk vet werte. Ganî hemverê bêhuqûqî her kes nêrazîbîyayîşê xo ramojno û vengê xo berz bikero.”

 

‘Hemverê tecrîdî de 11ê kanûne de rayîr ra şîyayîş…’

 

Muşeher Ulker zî dîyar kerd ke Abdullah Ocalan 24 serrî yo mîyanê çar dêsan de yeno tepiştiş û vat: “Ma nêeşkenê tu agahîyêk ci ra bigîrê. Destûr nêdanê ke keye û avûkatê ci şêrê pêvînayîş bikerê. Tecrîdêko giran serê Serêkî de kenê. Tecrîdo ke ewro serê Serekî de yeno kerdiş, ewro serê temamê şarê Kurdî de yeno kerdiş. Kesanê hewt serre ra bigî, heta hewtay serre binê tecrîdî de yê. Tewr tay çar hezarî tepişteyê ma mîyanê çar dêsan de yenê tepiştiş û ewro no tecrîd serê înan de zî yeno kerdiş. 11ê kanûne de ma do hemverê tecrîdî de rayraşîyayîş pê bîyarî. No rayraşîyayîş seba Serekatî û wedarnayîşê tecrîdî yo. Edalet û huqûq nêmendo. Hukmat huqûq goreyê xo rayra beno. No  heq û huqûqo ke goreyê xo şuxulneno qetlîyam û çinîkerdişê Şarê Kurdî yo. Ma tecîrd û zilmî qebul nêkenî. Heta şilka peynî ya gonîya ma bibo ma do payan ser de bî.” 

 

‘Ma do tecrîd birijnî’

 

Muşehere peynîya qiseykerdişê xo de vengê tewrbîyayîşê rayraşîyayîşî kerd û wina qiseykerdişê xo peynî kerd: “Seke ma her reye vanî; Amed çira zerrî yo. Amed cayê qehremanan o. Vengê mi şarê Amedî rê no yo ke hewt serrî ra heta hewtay serrî wa her kes tewrê rayraşîyayîşî bibo. Şarê Kurd do 11ê kanûne de tewrê rayraşîyayîşî bibo. Eke ma tewrê no rayraşîyayîşî nêbî aye wext ma çinîkerdişî qebul kenî. Ma do bîyayîşê xo qebul bikerî, sere wedarnî û vajî; ma estî, ma kurd î, ma nêqedîyenî. Qanûnê ke hemverê ma de yenê rayraberdiş ma qebul nêkenî. Vengê mi heme dayîkan ra no yo ke wa tewrê rayraşîyayîşî bibî. No rayraşîyayîşê azadî û seyyewbînanîye yo. Ma vengê berzkerdişê kenî û tecrîd rijnenî.”