Sema Çaglak-Medya Uren

 

ŞIRNEX - Cinîyê sîyasetmedarî derheqê tecrîd û qerarê Rayberê PKKyî Abdullah Ocalanî ke pêvînayîşê CPTyî qebul nêkerd de ercnayîşan kerdî û vatî: “Ê waştî Birêz Abdullah Ocalanî bidê vîrakerdiş. La her raya ke kewtî tenganî muracatê Îmrali dayî. No nizdîbîyayîşêk balkêşo ke badê hende nêrazîbîyayîşan demêk winasî de Birêz Abdullah Ocalanî reyde pêvînayîş kerd. Nêqebulkerdişê Birêz Abdullah Ocalanî yê pêvînayîşî zî nê nizdîbîyayîşan vera yo.”

 

Tecrîdo girankerde yê 6 serrê peyênan ke serê Rayberê PKKyî Abdullah Ocalanî de yeno rayraberdiş her ke şino yeno girankerdiş. Tewr peynî 25ê Adara 2021î de birayê ci Mehmet Ocalan bi rayîrê telefonî pêvînayîş pê ardbî û telefon nîme de amebî birnayîş. A roje ra nata pêvînayîş nîno kerdiş û muracatî bi bahaneye ‘cezaya dîsîplînî’ yenê betalkerdiş. 20-29ê êlule de Komîteya Astengkerdişê Îşkence yê girêdayeyê Konseyê Ewropa (CPT) seba pêvînayîşî ame la bado ke Rayberê PKKyî Abdullah Ocalan pêvînayîş red kerd ame resnayîş. No sey reaksîyonê hemverê bêvengîye ame ercnayîş. Cinîyê sîyasetmedarî derheqê tecrîd û bêvengîya bîyaye de reaksîyon mojnayî. 

 

‘Waşt bêvengî şermizar bikero’

 

Aktivîsta TJAye û hemsereka şaredarîya qezaya Qopî Eylem Saruca bêvengî şermizar kerd û wina vat: “Wexto ke ma ewnîyenê eslê xo de tecrîdo ke 22 serrî yo dewam keno esto. 6 serranê peyênan de no tecîrd resa sewîyeyêka bîn. Na sewîya sewîyeyêka  girêdayeyê înan ya dorme ra temamî birnayîş a. Xora amac zî birnayîşê girêdayîşê şarî nîyo, Îmrali yo. Hemverê tecrîdî zî sewîyeyêka gird de reaksîyon ame mojnayîş. Şuxulnayîşê na çeku û hemverê ci de viraştişê çalakîyan û heta reaksîyonê ke yenê mojnayîş pêro ameyî qedexekerdiş. No name û vatiş înan çende tersneno dîyar o. Coka ra birnayîşê ci girêdayîşî hesan nêbî û ver bi weçînayîşî ra wazenê bişuxulnê. Coka ra waştişê CPTyî yê pêvînayîşî bakêş o ke badê demêk derg ame. Hemverê nê nizdîbîyayîşî reaksîyonê Birêz Abdullah Ocalanî ca de yo. Goreyê mi waşt no bêvengîya bîyaye şermizar bikero.” 

‘No îşkence û suc o’

 

Eyleme ard ziwan ke tecrîdo ke serê Birêz Abdullah Ocalanî de yeno rayraberdiş eslê xo de serê heme şarê kurdî de yeno rayraberdiş û wina dewam kerd: “Kişta ci de tesîrê xo heme şaranê Tirkîya ser de keno. No zî dîyar keno ke çende îqtîdar bêçareserî û bêdemokratîkbîyayîşî ra mird beno. No şeklê îşkenceyî sewyeya mîyanneteweyîye de zî suc yeno qebulkerdiş. La çi heyfo ke bi hawayêk kêfî no tecrîdî serê Birêz Abdullah Ocalan û şarê kurdî rayra benê. Her kes hemverê nê sucê merdimîye de bêveng o. Israrkerdişê nê zî nêwaştişê sîstemê demokratîk û sîstemê aştîye yo. Coka ra no prosesî de pêvînayîşê Birêz Abdullah Ocalanî reyde do çareserî bîyarî û do berê aştîye akerê. Xora ê zî nêwazenê çareserî pê bêra. Bi no hawa wazenê sîstemê xo awan bikerê. Êdî pêvînayîşî ra wetêr ma azadîya fîzîkî ya Birêz Abdullah Ocalanî de israr kenê.”

 

‘Bi tecrîdî reyde silsileyê krîzan bi ca ame’

 

Hemsereka DBPyî ya Wanî Şengul Polat da zanayîş ke esasê Birêz Abdullah Ocalanî de serê heme şarê kurd û şarê Rojhelatê Mîyanê tecrîd yeno rayraberdiş û wina dewam kerd: “No zî xo reyde silsileyê krîzan ano. Krîzê ekonomî, komelî, sîyasî, weşîye û sewbîna her hetî de tesîrêkê giran keno. Eslê xo de no înan de zî xetimnayîşêkê awan keno û beno sebebê rijnayîşê mîyan ra nêrê vetiş. No tecrîd rast o 6 serrê peyîn de tewr rojeve de yo labelê nê serrê dergî yê dewam keno. Nê prosesî de zî qirkerdîşê pîlî ameyî ciwîyayîş.”

 

‘CPTyî wezîfeyê xo bi ca nêard’

 

Şengule da zanayîş ke nêqebûlkerdişê pêvînayîşî yê Birêz Abdullah Ocalanî ê bi CPTyî reyde dîyar kerd û vat: “Ma qala binpaykerdişê heq û çinbîyayîşê îradeyê şarêkê ercna. Sewbîna senî şarêkê tecrîd kenê. Yeno zanayîş CPT waşt pêvînayîş bikero. Dimayê hende serdayîşan û serran. Birêz Abdullah Ocalan nê pêvînayîşî tedîq nêkerd û sebebê nê zî werte de yo. Reaksîyonê Birêz Abdullah Ocalanî hemverê bêvengî û çinhesibnayîşê înan o. Sewbîna yew berpirsîyarê nê tecrîdî ê bi xo yê. Eke gamêke rast û ca de biameyîne eştiş, bêşik do netîce wina nêbîne. Sere de zî waştişê ma oyo ke ê berpirsîyarîyê xo bi ca bîyarê û nê pêvînayîşî bêrê kerdiş.”

 

‘Ganî ma tecrîd bişikênê’

 

Şengule tewr peyîn wina vat: “Îqtidaro bîyaye nê tecrîd û şerî ra xo mird keno. Eke tecrîd bêro şikinayîş, pêvînayîşî bêrê kerdiş, do cade netîce bêro girewtiş. Wazenê herra Kurdistanî îşxal bikerê û talan bikerê. Metodê şuxulnenê zî tecrîd o. ma ewro vînenê hêrişê Başûrê Kurdistanî û Rojawanê Kurdistanî kenê. Sewbîna nê şerî de heme îmkananê şuxulnenê. Pêwa nê zî sûcê şerî kenê. Nê destkewtişê cinîyan o. seba pêro dinya zî bi nimûneyêk muhîm o. Ma dî ke felsefeyê ‘jin jiyan azadî’ senîn tîya de gane bi. Bi azadîya înan cinîyan reyde azadîya komelî bi ca ame. Seba nê tewr zêde hêrişê destkewtişê cinîyan kenê. Ganî ma bi nê ruhî, bi nê felsefeyî tecrîdî bişikênê û azadî bi dest bikerê.”