Marta Somek

 

STENBOL – Endama OHDyî Avûkat Necla Mizgîn Argişe da zanayîş ke CPT derheqê Rayberê PKKyî Abdullah Ocalanî ke vejîyayo pêvînayîş ya zî nêvejîyayo pêvînayîş de tu malumatêk şênber pare nêkerdo û coka ra bêhetî û rêzdarîya CPTyî nêmendo û wina vat: “Ma wazenê CPT mîsyonê xo bîyaro ca. Waştişê ma komeleyê huqûq û şarî ya no yo ke her tim bi israr waştişê xo bîyarî ca.”

 

Tecrîdo giran yê serê Rayberê PKKyî Abdullah Ocalanî dewam keno. No 20 aşmî yo ke xeberêk Abdullah Ocalan û tepişteyê ke eynî ca de manenî ra çinî ya. Keye û avûkatî muracatê Dadgerîya Înfazî ya Bursa danî la bi bahaneyê ‘qedexeyê pêvînayîşê avûkatan’ û ‘cezaya dîsîplînî’ muracat yenê redkerdiş.

 

Komîteya Vernîgirewtişê Muameleyo Xirab û Îşkenceyî ya Ewropa (CPT) 20-29ê êlule de ame zîyaretê Tirkîya û derheqê zîyaretî de 3ê teşrîna verêne de eşkerayî ra û vat ke mîyanê dezgehê ke şîyî de Zîndanê Asayîşo Berz yê Tîpa Fyî yê Îmrali zî estbî. Baroyê Huqûqê Asrînî ke mudafîtîya Abdullah Ocalanî rayra beno, 29ê teşrîna peyêne de eşkerayî da û wina vat: “CPT aşma êlule de şîyo Îmrali la Birêz Ocalan nêvejîyayo pêvînayîş.”

 

 Endama Komeleya Huqûqnasê Seba Azadîye (OHD) Avûkate Necla Mizgîn Argişe derheqê bêvengî û nêzelalîya badê zîyaretê CPTyî yê Îmraliyî kepê ardî de qisey kerd.

 

‘Muracatî di bi israr dewam bikerê’

 

Mizgîne dîyar kerd ke OHDyê Stenbolî 21ê teşrîna peyêne de seba pêvînayîşê Îmrali muracatê Baroyê Stenbolî kerd û wina vat: “Ci ra ver 775 avûkatî seba pêvînayîşê Birêz Ocalan û tepişteyanê bînan yê ke Îmrali de yenê tepiştiş, muracat kerdbî. La Serdozgerîya Komare ya Bursa bi tu hawayêk nêagêra ma. La ma bi israr vanê ke bi hawayêk qanûnî ganî pêvînayîşê ma pê bêrî. Muracatê ma dewam kenî. Ma hewl danî ke mekanizmaya huqûqî pê bîyarî. Ma derheqê na babete de bi israr muracatanê xo dewam bikerî.” 

 

‘CPT demêk dergo ke bêhetî ra nêvejîyayo’

 

Mizgîne da zanayîş ke derheqê muracatî de CPT tu xeberêk nêdayo û înan ard ziwan ser: “Zîyareto ke aşma êlule de ameyo kerdiş ercayeyê vatişî yo. Ser de 2 aşmî derbaz bî. La CPT bi hawayêk zelal nêvato ‘Ey ma pêvînayîş bi dezgeh, Birêz Ocalan û tepişteyanê bînan reyde kerd.’ Ya zî nêvato ‘Ma pêvînayîşêk wina nêkerdo, xeberê şaşî ameyî weşanayîş.’ Bi tu hawayêk çîyêk nêvato. Tena ma çîyê ke eşnawitî ra rojeve virazenî. Bêşik no nizdîbîyayîşê CPTyî bi tu hawayêk nîno qebulkerdiş. CPT demêk dergo ke bêhetî ra nêvejîyayo.”

 

‘Ganî mîsyonê xo bîyaro ca’

 

Mizgîne vat ke 25ê adara 2021î ra heta nika muvekîlê xo ra xebere nêgênî û na babete de î nê çîyan ard ziwan: “Heme muracatê ma bê bahane, bi sebeba ke tu hetê ci yê huqûqî çinîyo de yenê redkerdiş. No di serrî yo ke pêvînayîş nîno kerdiş û xeberêk nîna girewtiş. CPT na rewşe sey rewşa awarte nêvîneno. Ya zî bi lez û bez raporêk hadre nêkeno û pêvînayîş nêkeno. Tu çîyêk şêber ke CPT yeno Îmrali û pêvînayîş do pê bîyaro çinî yo. CPT tîya de bêhetîya xo û rêzdarîya xo vînî kerdo. Ma wazenê CPT tena mîsyonê xo bîyaro ca.” 

 

‘Nêverdayî bêro cenazeya pîyê xo’

 

Mizgîne dewamê qiseykerdişê xo de dîyar kerd ke pîyê tepişteyo bi nameyê Veysî Aktaşî 30ê teşrîna peyêne de Amed de cuya xo vînî kerd, avûkatî muracat kerdî ke Veysî Aktaşî bêro cenazeya pîyê xo la tu cewabêk nêdîya muracatî û wina vat: “Seba mekanizmaya huqûqî pê bêro avûkatî zaf hewl danî. Danê zorî. Çimkî pêro muracatî bênetîce manenî. Tecrîdê Îmrali tesîrê xo heme zîndananê bînan ser de keno. Teberhuqûqî heme zîndanan de vila bîyo.”

 

‘Ganî waştiş bi israr dewam bikerê’

 

Mizgîne peynîya qiseykerdişê xo de wina vat: “Her çar hetê dinya de seba pêvînayîşê Abdullah Ocalanî muracat yenê kerdiş. Meslektaşê ma yê ke Ewropa de cuyenî xeylê rayan muracat kerdî. Senî ke cewab nêdîyeno ma cewab nêdîyeno înan zî. Ganî waştişê m abi sirar dewam bikerî. Ma paştî dane meslektaşanê xo.”