WAN - Dadgeha Îdareyê Wanî da zanayîş ke seba projeyê HESî yê Geliyê Zîlanî seba zirar bido derûdorî tedbîrê lazimî nêameyê girewtiş û qerarda ke proje bêro betalkerdiş.

 

Şûreya Dewlete (Danıştay) dewaya betalkerdişê “Projeyê Regulator û HESî yê Geliyê Zîlanî” ê qezaya Erdîşî yê Wanî de amebi xirakerdiş û şirawitibi dadgeha herême. Dewaya betalkerdişê projeyî de qerar vejîya. 1ine Dadgeha Îdareyê Wanî dîyar kerd ke ê resayê nê netîceyî ke “Ercnayîşê Tesîrê Derûdorî Lazim o Hewce nîyo” guncav nîyo û no proje do xesarêkê yan zî tesîrêkê negatîf serê derûdorî bikero û seba nê zî tedbîrê lazimî nêameyê girewtiş. Dadgehe neql kerd ke eke proje bêro viraştiş, do xesarêkê pîl bido derûdorî û seba nê qerarê betalkerdişê proje dayo.

 

Yeno waştiş ke proje cayê qirkerdişî de bêr viraştiş

 

No proje hetê Şirketê Anonîmî yê Berardişê Ceyranî yê Zîlanî ra yeno waştiş cayê ke  qetlîamê Geliyê Zîlan ci de qewimyayo bêro viraştiş. Walîyê Wanî û Mudurîyê Bajarwanî û Derûdorî yê Wanî 2012ine de qerar dayê ke raporê ercnayîşî lazim nîyo û serê nê qerarî de qerarê Şîrketê Berardişê Ceyranî yê bi nameyê Gunakim zî serra 2014ine de dest bi înşeatê projeyî kerd. O wext hîn welatijê herême û rêxistinê komelî yê sivîlî hemverê viraştişê projeyî de vejîyayî û muracatê Şûreya Dewlete dayî û no projeyê HESî amebi vindertiş.