ANQARA - Şevîn Coşkuna ke pêvînayîşê butçeyî yê Meclîsî de qisey kerd û bale ant polîtîkayê şerî ser û wina vat: “ Çareserî wedarnayîşê tecrîdî yo.”

 

Parlamentera Partîya Demokratîke ya Şaran (HDP) ya Mûşî Şevîn Coşkune pêvînayîşê Pêşnîyarqanûnê Butçeya Rayîrberîya Merkezî yê Serra 2023î ke Heyetê Pêroyî yê Meclîsî de yenê dîyîş de qisey kerd. Heyet ewro butçeya Serekkomarî ser de pêvînayîş pê ard. Coşkune qiseykerdişê xo de serê hêrişê Rêxistina Îstîxbaratê Neteweyî (MÎT) de vinderte. 

 

Xebatê MÎTî

 

Şevîn Coşkune dîyar kerd ke bi Sîstemê Hukmatê Serekkomarî re xeylê dezgehî raştê raşt gire dîya Qesrî û wina vat: “Burokrasî êdî waştişê îqtîdarî sey kere xo yê yewine vîneno. Nê dezgehan ra yew zî MÎT o. Rewşêk winasî de zî xebatê MÎTî ra yew zî bîyo dormeyê ke îqtîdar sey hedef mojneno. Wexto ke babete bena kurd û muxalîx, merdim nê raştîye hîna baş vîneno. Sey nimune; embaza  ma Denîz Poyraze awanîya HDPyî ya Îzmîrî de hetê Onur Gencerî ra ameye qetilkerdiş. Wexto ke kiştox serê hesabê xo yê medyaya komelkî ra çîyan pare kerdêne û bi rojan awanîya partiye de keşf kerd, MÎT se kerdêne? Wexto ke qal beno qala kurdan MÎT kare remnayîş û ferzkerdişê ajanîye keno. Kesê ke xo sey endamê MÎTî mojnenî, xebatkarê partîya ma remnenî û ajanîye înan ser de ferz kenî.”

 

Mehmet Zekî Çelebî

 

Şevîne dewamê qiseykerdişê xo de bale ant suîqestê Herêma Federe ya Kurdistanî ke hemverê kurdan de yenê kerdiş û wina vat: “Mehmet Zekî Çelebî xebatê xo yê sîyasîyan yê Tirkîya vera ame cezakerdiş û Silêmanîye de surgun de cuyayêne. Zewecîya bî û di domanê ci estbî. 17ê gulana 2022î de vernîya restourantê xo de ame qetilkerdiş. Qeydê vengî yê badê mergê Çelebî ameyî weşanayîş de kesê ke xo sey endamê MÎTî dane şinasnayîş ci rê vanê ke eke xeberan bidê do dosyaya ci beri xerepnayîş, kar û barê konsolosxaneyî bi lez bêrî viraştiş. Zekî Çelebî zî bi israr vano ke xeber deste ci de çinî yî. Na rewşe mojnena ke xeyl dosyayê mîyanê ci veng î, wexto ke babete bena kurd hemverê înan de sey şantaj yenê şuxulnayîş.”

 

Ganî tecrîd qetî peynî bibo

 

Şevîne tewr peyîn wina vat: “Vera şerê ke îqtîdar binê nameyê asayîşî de keno û budçeyêke pîlî seba ci visneno, çareserîyêke bîn ê feydeyê şaran rê bêro esto. No zî muzakereyê bi birêz Ocalanî reyde ke vatêne; ‘ez eşkena mîyanê hewteyêke de pêrodayîşan peynî bikerî.’ Çareserî, peynîkerdişê tecrîdê girankerde yo. Çareserî oyo ke rayîr bêro dayîş, keye û derûdorê wazenê ci dir pêvînayîş bikerê. Rewşêka wina de do şarê Tirkîya serbikewo. Ganî tecrîd qetî peynî bibo.”