Dîlan Babat

 

ANQARA - Remzîye Tosuna ke pêvînayîşê Pêşnîyarqanûnê Butçeya Rayîrberîya Merkezî yê Serra 2023î ercnaye da zanayîş ke vatişê îqtîdarî yê ‘şer çinî yo’ bi eşkerayîyêka butçeya şerî yê pêvînayîşê Butçeya Wezîrîya Pawitişê Neteweyî, ame eşkerakerdiş ke her çî eksê vatişan mojneno. Remzîyeye vat ke her kes ganî no prosesî rolê xo kay bikero û mîsyonê xo bîyaro ca.

 

Pêvînayîşê Pêşnîyarqanûnê Butçeya Rayîrberîya Merkezî yê Serra 2023î dest pêkerd. Pêvînayîşan de ge-ge munaqaşa û têmîyankewtiş û pêkewtişê parlementeranê camêrdan vejîyeno û na rewşe rayaumûmî de bena sebebê reaksîyonanê cidîyan. Butçeya newe de zî seba şer û rantî butçe yena cîyakerdiş la seba cinî, kedkar û şarî tu çîyêk çinî yo. Butçeya ke şerî rê yena cîyakerdiş reaksîyonanê girdan rê rayîr akena.

 

Heyetê pêroyî de Parlementera Partîya Demokratîke ya Şaran (HDP) ya Remzîye Tosune vat ‘wa şer peynî bibo, rayîrê Îmrali biabî’ û laçika xo eşte erd. Dima ra wezîrê Karê Zerre Suleyman Soylu, Remzîye Tosune hedef mojna. 

 

Remzîye Tosune pêvînayîşê butçeyî ke Heyetê Pêroyî yê Meclîsî de yeno munaqaşakerdiş ercnaye.

 

‘Wazenê bi Kurdan sere bidî ronayîş’

 

Remzîyeye dîyar kerd ke qerarê şerî ke heyetê pêroyî de yenê girewtiş problemanê girdan rê rayîr akenê û meclîs de zî faşîzm dewam keno. Remzîyeye vat ke qiseykerdişê bi ziwanê Kurdî heyetê pêroyî de sey ‘x ya zî ziwano ke nîno zanayîş’ derbazê zabitnameyan yenê kerdiş. Ya zî mîkrofonê parlementeran yenê girewtiş. Remzîyeye wina dewam kerd: “2015î ra heta nika hemverê Kurdan de hêriş estî. Her cayê dinya de hemverê Kurdan hêriş esto. Hemverê Rojawa, Kobanê, Kurdistan û hemverê cinî û domanan de konseptê şerî dewre de yo. Wazenê her çar hetê Kurdistanî de qirkerdişêk gird pê bîyarî. Bi nê polîtîkayan wazenê bi şarê Kurdî sere bidî ronayîş.”

 

‘Kardî resaya este’

 

Remzîyeye da zanayîş ke di serrî yo Rayberê PKKyî Abdullah Ocalanî ra tu xeberêk nîna girewtiş û tecrîdê serê Ocalanî, hêrişê hemverê Kurdistan û Rojawanî zî zêde kerdî. Remzîyeye wina domnaye: “Nê çîyî girêdayeyê tecrîdê Îmrali yî. Qerarê şerî parlemento de yenê girewtiş. Qerarê tezkereyi parlemento de yenê girewtiş. O wext ganî problem zî tîya de çareserî bibo. Her ke tecîrd giran beno wazenê bi cinîyan sere bidî ronayîş. Tirkîya de şerêk esto. No şer hemverê Kurdan de ameyo dest pêkerdiş. Ganî her kes rol û mîsyonê xo kay bikero. Kardî resaya este. Ma waşt ke cayo ke qerarê şerî tede yenê girewtiş de aştî pê bîyarî. Heta ke rayîrê Îmrali nêabîyî, heta ke hêrişê hemverê Rojawanî peynî nêbî, heta ke operasyonê hemverê cinîyan peynî nêbî ma do rol û mîsyonê xo meclîs de bîyarî ca.”

 

‘Daye şer mojnenî’

 

Remzîyeye dewamê qiseykerdişê xo de vat ke pêvînayîşê butçeyê wezîrîya pawitişî de parlementerê AKPyî dayeyanê derheqê ke çend pere tanq, top û guleyan rê ameyo xerckerdiş eşkera kerd û domna: “Parlementerê AKPyî her çend ke bi israr vajî qerarê şerî nêameyî girewtiş zî pêvînayîşê butçeyî de eşkerakerdişê dayeyan de vejîya raşte ke şer esto. Îqtîdar her ke vînî keno hêrişê hemverê Kurdan û HDPyî zêde keno. Ma wazen seba aştîye ma tîya de bî. Wazenê bi hêrişan îradeyê ma bişiknî. Wazenê ma bê umud vera bidî. Tezkereyan de wazenê mergan normal bimojnî.” 

 

‘Bê Birêz Ocalanî aştî  mumkun nîya’

 

Remzîyeye tewr peynî  vat ke pêvînayîşê butçeyî wezîrê karê zerreyî de Sulenman Soylu, Meral Daniş Beştaşe hedef mojna û wina peynî kerd: “O waşt ke şovêk gird bikero. La verê ke şov bikero mecbur mend ke heyetê pêroyî ra bivejîyo. Mi tîya de qala aştîye kerd û laçika xo erş erd. Ez heta peynî peynîya vatişanê xo de ya. Meclîs de waştişê aştîye suc o. Heta ke tecrîd nêwedarîyo mumkun nîyo ke aştî pê bêra. Ma do nê zîhnîyetê camêrdî bikerî binê erdî. Ma na butçe qebul nêkenî. Tirkîya de do cinî bere demorasîye akerî.”