Marta Somek 

 

STENBOL - Avûkata Baroyê Huqûqî yê Asrînî Razîye Ozturke da zanayîş ke Rayberê PKKyî Abdullah Ocalan hemverê koployê şerê taybetî de zîndanê Îmrali de bi çîyê ke dano musnayîş û berardiş mînak o û veng da CPTyî ke hemkarîya sucî nêkero û rayaumûmî rê eşkerayîyêk bido.

 

Tecrîdê serê Rayberê PKKyî Abdullah Ocalanî giran beno û 21 aşmî yo ke Rayberê PKKyî Abdullah Ocalanî, tepişteyê bînî Omer Hayrî Konar, Hamîlî Yildirim û Veysî Aktaşî yê ke Îmrali de binê tecrîdî de yenê tepiştene ra xeber nîna girewtiş. 3ê adara 2020î ra nata pêvînayîşo fîzîkî nêameyo kerdiş û 25ê adara 2021î pêvînayîşê bi telefonî yê kilm ra nata zî Ocalanî ra xeberêke nêameya girewtiş. Ocalanî pêvînayîşê telefonî de vat bî ke ‘ez wazena avûkatanê xo reyde pêvînayîş viraza’. Avûkatê Abdullah Ocalanî Newroz Uysal û Rezan Sarica 8 serrî ra dima tewr peynî 2-22ê gulane, 12-18ê hezîrane û 7ê tebaxa 2019î de pêvînayîş pê ardbî. Înan ra dima pêvînay nêame kerdiş.

 

Avûkatî her hewte semedê pêvînayîşî muracat kenê la muracatê înan bi hewayêkê sîstematîkî bêcewab yenê verdayîş. Avûkata Baroyê Huqûqî yê Asrînî Razîye Ozturke derheqê 21 aşmî yo ke xeberêk nîna girewtiş, rolê CPTyî û pêkewtişê demê peyênan de ajansê ma rê qisey kerd.

 

‘Îmrali de waştî ke kompto dewam bikerê’

 

Razîyeye dîyar kerd ke badê komployê mîyanneteweyî Îmrali de zî komplo ameyo dewamkerdiş û wina vat: “Wexto ke komplo pê ame NATO, YE zî tede bî, Tirkîya zî gardîyanîya înan kerd. Waştî ke Birêz Ocalanî teslîm bigîrê. Sere de hetê fîzîkî de hewl dayî bê tesîr vera bidê. Hewldayîşê bê îradekerdişî nê prosesî dewam kerd. La ser nêkewtî. Wexto ke cezya mergî estbî de şirawitî Tirkîya. Sere de selahîyetdarê CPTyî Birêz Ocalanî pêşwazî kerdî.”

 

‘Parçeyêk konseptê şerî yo’ 

 

Razîyeye da zanayîş ke konseptêk taybet hadre kerdê û wina dewam kerd: “Îmrali hewa û erdî ra birnaye yo û serê tecrîdî ameyo awankerdiş. Zîndano ke seba komplo ameyo awankerdiş o. 10 serrî Birêz Ocalan mîyanê şertanê giranan de û hucreyo yew kesî de maneno. Dima ra açarnayî zîndanê dîsîplînî, qedexeyê avûkatan, birnayîşê pêvînayîşan yê keye û avûkatan. Serra 2020î de reya yewine pêvînayîşê telefonî ame kerdiş. No parçeyêk konsepte şerê taybetî yo. Hemverê Birêz Ocalanî de raybazê cîya pê yenê. La caardişî her tim veng ameyî vetiş.”

 

‘Dinya de nimûneyêke wina çin o’

 

Razîyeye bale ante hewldayîşê pûçkerdişê caardişan ser û wina domna: “Birêz Ocalan bi nexşerayîr, pawitoxname, mesajê bi hêvî û raybazan komplo bi hawayêk cîdî veng vet. Coka ra zî hewl dayî vernî bigêrî ke Birêz Ocalanî ra xeber nêra girewtiş. Nêeşkeno heqanê xo bişuxulno. Ma derheqê nê çîyan de wayîrê malumatan ê. Ma nêzanê rewşa ci senî ya, eşkenê bivejîyî revîr ya nê, eşkenê televîzyon temaşe bikerê yan nê û eşkenê sohbet bikerê yan nê. Ma qala zîndano ke tu xeberêk ci ra nîna girewtiş kenê. Tîya serê komployê mîyanneteweyî ameyo awankerdiş.” 

 

‘Çîyê ke Birêz Ocalanî da musnayîş, tu cayî de nîno vînayîş’

 

Razîyeye dîyar kerd ke îradeyêkê her tim hemverê sîstemê tecrîdê Îmraliyî de têkoşîn kerdo û vat: “Nê hetî de dinya de nimûneyê ci çin o. Vindertişê birêz Ocalanî, pozîzyonê ci, çîyê berarde kerdê, çîyê ke dayê musnayîş, çîyê ke şarê Kurdî rê veto teber, dinya de nimûneyêkê wina çin o. CPTyî ke mîsyon û rolê ci yê ke ganî vernîya îşkenceyî pado esto, Îmraliyî de wezîfeyê xo bi ca nêano. CPT Zîndanê Îmraliyî sey zîndanêkê normal ercneno. Nê ser de proseduranê xo bi ca ano. Bêdestûrê welatî raporan eşkera nêkeno. Na nûqta de xetimîyena. La ma vanê ke şima Îmraliyî sey zîndanêkê rêze ra bierjnê.”

 

'Tirkîya pêşniyazîyê CPTyî bi ca nêana’

 

Raziyeye, vat CPTyî 2019ine de raporê xo eşkera kerd, rapor de qalê rewşa ‘încommunîcado’ ame kerdiş û wina dewam kerd: “Ame vatiş ke ganî pêvînayîşê keye û avûkatan bêro kerdiş, heqê aktîvîteyê komelî bi ca bêrê. La Tirkîya de a roje ra tepîya şertî hîn zêde xirab kerd. 2011ine ra heta 2019ine de tu pêvînayîşêkê avûkatan bi ca nêame. No mojneno ke Tirkîya pêşnîyazîyê CPTyî bi ca nêana. Pêvînayîşê selahîyetdarê Tirkîya bi CPTyî reyde yenê nimitiş. CPT ganî pozîsyonê ke vernîya  îşkencêyî pado de bo. La vindertişê xo yê ke nê  îşkenceyî bido vindartiş nîşan nêdano. CPT zî na babete de keweno rewşa hemkarîyê sûcî.”

 

'21 aşmî yo agahî nîna girewtiş'

 

Razîyeye derheqê nêzdîbîyayîşê CPT de zî ercnayîşê xo wina dewam kerd: “Ma veng danê ke ganî CPT helwestê xo bivurno. Ma bi sîstemêk raporan şirawenê CPT. Ma pêro rewşe înan rê neql kenê. CPT babeta welatê endamî ke goş nêdanê înan de eşkeno rayaumûmî rê eşkerayîye bido. 21 aşmî yo agahî Birêz Ocalanî û muvekîlê ma yê bînan ra nîna girewtiş. Na rewşe dewam kena. CPT ke tena eşkeno şêro uca, şino la agahî nêdano ma. Seba nê statuyê CTP zî sazgehê Tirkîya ra cîyayêr nîyo. Ganî CPT derheqê muvekîlanê ma de agahdarkerdişêk bikero. Ganî rayaumûmî rê eşkerayîyêke bido. CPT aşma êlule de vat şîyê serdayîş. Vatî 45 deqe pêvînayîş kerdê. Derheqê rewşa muvekîlanê ma de ma agahîyêke înan ra nêgirewt. Pêvînayîşê CPT endîşeyanê ma werte ra nêwedaritî.”

 

Ganî DMME nêbo hemkarê tecrîdî 

 

Razîye babeta serdayîşê xo yê seba sazgehê mîyanneteweyî kerdê zî nê ercnayîşî kerd: “DMMEyî de 2011ine heta nika dosyayêke ma ya tecrîdî ke esta dewam kena. No 11 serrî yo na dosya de qerarêk nêameyo dayîş. Seba nê wina dayê vindarnayîş, beno sebebê dewamê tecrîdî. Yeno pawitiş ke DMME zî mîsyonê xo bi ca bîyaro û ma hêvî kenê ke nêbê hemkarê tecrîdî. Ma seba wedaritişê tecrîdî, şikinayîşê tecrîdî venga têkoşînê bêmabên pêro kesan rê kenê.”