ANQARA - Wezaretê Pawitişê ke cewab da muracatê muxabîra MAyî Ceylan Şahînlî ya serê heqê aye yê tedawî ame astengkerdiş, mûayeneya pêwa kelepçeyî ame kerdiş pawit.

 

Heqê xo resayîşê weşîye yê muxabîra Ajansê Mezopotamyayî (MA) Ceylan Şahînlî çarçewaya cipersayîşêk merkezê ci Anqara de yo 25ê teşrîna verêne de destbend kerdî û 29ê teşrîna verêne de ameye tepiştiş, yena astengkerdiş. Ceylane, seba problemê xo yê weşîye mabêne 2 û 4ê teşrîna peyêne de sewqê Nêweşxaneyê Kampusê Zîndanê Sîncanî ameye kerdiş. Ceylane tîya de hetê doktorê bi nameyê S.O. tewrê kelepçe ameye muayenekerdiş. Ceylana ke tedawîya pê kelpçe qebul nêkerd, 14ê teşrîna peyêne de derheqê binpaykerdişê heqan ke pê reyde rî bi rî mende, gerreyê doktorê ke wezîfeyê xo baş nêkerd Wezaretê Edaletî û Wezaretê Weşîye kerd.

 

Mudirîya Weşîye ya Anqara ke serê nameyê Wezîrîya Weşîye cewab da, muayeneya bi kelemçekerde pawite. Mudirîya Weşîye ya Bajarî dîyar kerd ke muayeneya bi kelemçekerde tedawî asteng nêkena û heta ke hetê doktorî ra nêro waştiş kelemçe nîno akerdiş.

 

Ceylane reaksiyon mojnaye qerarî û wina vat: “Ez bi xo zî raştê ‘muayeneya bi kelemçekerde’ ke caardişêk tebere huqûqî yo û xeylê reyan mi xeberanê na babete viraşte, ameya. Ez nê caardişê hemverê Pêkerdişê Heqanê Merdimîye yê Ewropa (PMME) û tebere exlaqê tibî qebul nêkena. Hem sey mexdurêk hem zî sey rojnamegerêk seba ke muayeneya bi kelemçekerde raşte ra bêro wedarnayîş, ez do têkoşîn bikera. Ma do bê huqûqî û caardişê tebere tibî biresnî rayaumûmî.