MERKEZÊ XEBERAN - HDPyî derheqê zêdîyayîşê hêrişanê cînsîyan ê vera tutan de eşkerayîyêke daye û vat: “Nê hêrişê cînsîyî netîceya polîtîkayanê îqtîdarî de ya.”

 

Hemvervatoxanê Komîsyonê Tutan ê Partîya Deokratîke ya Şaran (HDP) Nuray Turkmen û Huseyîn Kaçmazî bi eşkerayîyêka nuştekîye vist vîrî ke kênaya Yusuf Zîya Gumuşelo ke ronayoxê Weqfa Hîranurî ya, bi serran binê nameyê ‘zewajî’ de raştê tecawuzî ameya, Manîsa de zî dewayêka tecawuzî eşkera bîya.

 

Dewamê eşkerayîye de wina ame vatene: “Manîsa de tuta 12 serre dima ke hetê di camêrdanê pîlan ra ameye tecawuzkerdene, cayê tutan de ameye cakerdene û kewte binê pawitişê dewlete. La binê pawitişê dewlete de tute pavyonan de yena xebitnayene. No zî mojneno ke dezgehê pawitişê tutan û hêzê asayîşî senî yoz bîyê. No mîsal mojneno ke Tirkîya de serebûtê îstîsmarî senî bîyê sîstematîkî. Tirkîya de keye, mektebî, kuçe û pêro waranê cuye de tutî raştê îstîsmarî yenê. Ewro zî tutî asayî nîyê. Amed de zî Serekê MHPyî yê Amedî Cîhan Kayaalpo ke tecawuzî ra yeno muhakemekerdene, mehkeme de vat ‘tut ci rê razî bîyo.

 

Nê hêrişê cînsîyî netîceya polîtîkayanê îqtîdarî de ya. Heta ke sûcê kiştiş û îstîsmarî yê vera tutan eşkera nêbê do dewam bikerê. Ganî nê meseleyî cade bêrê çareserkerdene. Komîsyonê Tutan ê HDPyî seba ke pêro kerdişê vera tutan biqedê do mesuldarîya xo bikero. Ma do her ca de vengê tutan bidê eşnawitene.”