ANQARA - Hemserekê KCDyî Berdan Ozturk û parlamenterê HDPyî hemverê tecrîdê Rayberê PKKyî Abdullah Ocalanî verê Wezaretê Edalet de çalakîya ronîştîşê dayî destpêkerdiş û vatî, heta ê biresê netîceyî do çalakîya xo dewam bikerê.

 

Partîya Demokratîke ya Şaran (HDP) hemverê tecrîdkerdiş û xebere nêgirewtişê Rayberê PKKyî Abdullah Ocalanî ra hemleyêke newe da destpêkerdiş. Parlamenterê HDPyî hemverê tecrîdî de, xebere nêgirewtişê Abdullah Ocalanî û bêvengîya selahîyetdaran ra ver bi Wezaretê Edaletî de rayîr ra şîyayîş organîze kerdî. Heyetê ke Hemserekê Kongreya Komeleya Demokratîke (KCD) Berdan Ozturk, parlamenterê HDPyî Omer Ocalan, Feleknas Ûca, Dîlan Dîrayet Taşdemîr, Şevîn Coşkûn, Gulistan Kiliç Koçyîgît, Sezaî Temellî, Abdullah Koç, Nûran Îmîr, Huseyîn Kaçmaz, Celadet Gaydali û Erdal Aydemîr pê ameyîne ver bi Wezaretê Edaletî rayîr ra şîyayîş. Polîsan cayêk de nêzdîyê bînaya Wezaretê Dade heyetî asteng kerd û nêverdayî şêrê verê bîna.

 

Rayîr ra şîyayîşî de dovîzê bi nuşteyê sey, “Tecrîd sûcê merdimayî yo”, “Wa Îmraliyî de huqûq bi ca bêro” û “Wa avûkatî şêrê Îmraliyî” ameyî wedaritiş. Cayê ke rayîr ra şîyayîş ame astengkerdiş, eşkerayîye ameye dayîş.

 

Hemserekê KCDyî Berdan Ozturkî dîyar kerd ke her roja ke şino tecrîdê serê Rayberê PKKyî Abdullah Ocalanî yê zîndanê Îmraliyî de xidar beno û wina vat: “Bi nêzdîyê di serrî yo xebere ci ra nîna girewtiş. Aşma êlule de heyetê CPTyî serdayîşê Zîndanê Îmraliyî kerdibi. Labelê tu eşkerayîye nêdayî rayaumûmî. Buroyê Huqûqî yê Asrinî neql kerd ke birêz Ocalanî bi heyetê CPTyî rê pêînayîş nêkerdo. Rewşa weşîye û cuya Ocalanî rayîr verê tehluke û qesawetêk pîl akerdo. Sey ke şima zanê huqûqê netewî û mîyannetewî ameyo binpaykerdiş. Tecrîd êdî ameyo sewîyeyêke krîtîk. Ma wazenê şarê ma, hêzê demokrasî her kes hemverê tecrîdî de wurzo û nêrazîbîyayîşê xo ramojno.”

 

Berdanî bale ant serê rolê Abdullah Ocalanî çareseriya demokratîke de û wina vat: "Her ke vengê Abdullah Ocalanî ameyîne eşnawitiş, hem  seba aştîya komelî, hem zî seba ameyoxê Tirkîya umud girs bikerê. Îqtîdarê AKP-MHPyî bi polîtîkayê tecrîdî yê serê birêz Ocalanî polîtîkayêke bêmerdimayî ya vîrîkerdişî rayra beno. Ganî her kes hemverê nê vengê xo berz bikerê. Ameyê qonaxêkê krîtîk. Birêz Ocalan hem seba şarê ma û hem zî seba şarê Rojhelatê Mîyanên de wayîrê muhîmîyêk bi mana yo û ma nê muhîmî pratîkê ci yê verî ra zanê. Seba ke firsend ame dayîş, bi vengê aştîya komelî. Ma reyna veng danê; tecrîd qanûn, destûrê bingehîn û peymanê mîyanneteweyî yê ke Tirkîya ci de girêdayê ya ca nêgîno, tecrîd îşkence yo. Nêzdîyê di serrî yo destûr nîno dayîş ke pêvînayîş bêro kerdiş, bi tu hawayî avûkatî û keyeyî nêeşkenê şêrê pêvînayîş û têkilî ronê. Caardişê tecrîdê mutleq hem îşkence û hem zî sûcê merdimayî yo. Ganî birêz Ocalan avûkatanê xo reyde pêvînayîş bikero û nika û dima ra huqûq û qanûn seba birêz Ocalanî zî bêro caardiş. Seba nê ma ewro sey parlementerî nê caardişê tecrîdî, tecrîdo ke mîqyasê merdimayî derbaz bîyo û ameyo sewîyeyêka krîtîk, qebûl nêkenê. Ma do êdî tehemûlê nê nêkerê.”

 

Berdanî dîyar kerd ke heta destûr nêro dayîş ke Abdullah Ocalan bi avûkatanê xo reyde pêvînayîş bikero û vat: “Ganî tecrîd nêbo malzemeyê sîyasetê rojane. Nêzdîbîyayîşê Îmraliyî seba ma nêzdîbîyayîşê demokrasî, huqûq û rûmetê merdimayî yo. No nêzdîbîyayîş do heme qerarê sîyasî yê ke ma do nika û peyra bi tesîr bê. Ma ewro ra tepîya hemverê tecrîdî de sebr nêkenê ganî gamê verbiçim bêrê eştiş. Heta ke çalakîya ma bireso netîceyê ci dewam bikero. Tecrîd merg o, çin hesibnayîş o. Yan ma do pîya rayîrêk abikerê, yan zî ma do rayîrêk bivînê.”

 

Dimayê eşkerayîye parlamenteran verê Wezaretê Edaletî çalakîya xo dewam kenê.