WAN - Hemsereka TUHAYDERî ya Wanî Edîbe Babure dîyar kerd ke ganî edalet bêro nê welatî û wina vat: “Seba ke edalet pê bêro zî ganî bere Îmraliyî bêrî akerdiş. Seba aştî û rewşa asayîşî ganî reyna maseya dîyalogî bêra awankerdiş.”

 

21 aşmîyo ke Rayberê PKKyî Abdullah Ocalanî ra xeber nîna girewtiş. Tecrîdo ke bi serran o dewam keno zî tesîrê xo pêro komelî ser de keno. Polîtîkaya tecrîdî yena manaya dewamkerdişê polîtîkaya şerî ke hemverê Şarê Kurdî de yeno kerdiş. Keyeyê tepişteyan hemverê tecrîd, binpaykerdişê heqê tepişteyan, rewşa tepişteyanê nêweşan û tepişteyê ke înfazê înan ameyî veşênayîş Stenbol, Îzmîr, Amed û Wanî de çalakîya ‘Nobeta Edaletî’ dabî dest pêkerdiş. Çalakî bi rayraşîyayîş û eşkerayîyan ameybî peynîkerdiş. La sere de Stenbol, Îzmîr û Amed de keyeyê bi hêrişêk gird reyde rî bi rî mendî.

 

Derheqê manaya çalakî û hêrişê hemverê çalakîyan de Hemsereka Komeleya Paştdayîşê bi Hukmwerdeyan û Tepişteyan (TUHAYDER) ya Wanî Edîbe Babure ajansê ma rê qisey kerd.

 

Edîbeye da zanayîş ke nika zîndanan de binpaykerdişê heqan pê yeno û wina vat: “Keyeyê tepişteyan û bi taybetî zî dayîkê tepişteyan hemverê binpaykerdişê heqanê tepişteyan de dest bi çalakîya ‘Nobeta Edaletî’ kerdî. Dayîkî bêhuqûqî û neheqîya hemverê domananê xo qebul nêkenî. Dest dîyeno kitaban ser, werdo ke yeno dayîş xirab o, payan ser de yenê hûmartiş, hetê gardîyanan ra yenê kutiş û îşkence bi tepişteyan yeno kerdiş. Tepişteyê ke benê nêweşxaneyan bi kelemçekerde yenê muayenekerdiş û hemverê nê caardişan de zî doktor bêveng manenî. Tepişteyê ke nê caardişan qebl nêkenî, nînê tedawîkerdiş.” 

 

Edîbeye dîyar kerd ke çalakîya ‘Nobeta Edaletî’ 

 

heqêk demokratîk û qiseykerdişê xo wina dewam kerd: “Nobeta Edalet heqêk o û heqêk demokratîk o. Waştişê keyeyan estbî û ganî nê waştişî bêameyêne qebulkerdiş. Seba ke Tirkîya de edalet çinî yo waştişê înan nêameyî qebulkerdiş. Çalakî ame peynîkerdiş la ganî bêro zanayîş ke xoverdayîşê ma dewam bikero. Ma heta ke edalet pê bêro têkoşînê xo dewam bikerî. Ma do bi dayîk û şarê xo reyde têkoşînê xo dewam bikerî.”

 

Edîbeye vat ke ganî tecîrd bêro peynîkerdiş û derheqê babete de wina ernayîşan kerd: “Heta peynîardişê tecrîdî do têkoşînê ma dewam bikero. Tecrîdo ke hemverê Birêz Abdullah Ocalanî de dîya dest pêkerdiş nika vilayê pêroyê zîndanan bîyo. Tecrîd pêroyê Tirkîya de bi tesîr o. Wexto ke tecrîd dewam bikero şer zî do dewam keno. Wexto ke şer dewam bikero zî şar mîyanê feqîrîye de bo. Îqtîdarê AKP-MHPyî dewlet nîyo, hukmat o. Ganî no hukmat şêro, ganî şar hemverê şîyayîşê hukmatî de vengê xo berz bikero.”

 

Edîbeye tewr peynî wina vat: “Ganî edalet bêro nê welatî. Seba pêameyîşê edaletî zî ganî bere Îmraliyî bêrî akerdiş. Seba aştî û rewşêka asayiş zî ganî reyna maseya dîyalogî bêra awankerdiş.”