SÊRT – Tuta ke Perwarî de 2 kesan hêrîşê cinsî ci rê kerdî, seba travmayê derbaz kerd, wedarnayî nêweşxane.

 

Dewêka girêdayê qezaya Perwarî ya Sêrtî de, tutêke 2 serrî bi hêrişê cinsî yê sîstematîkî yê Huseyîn Tapar (65) û Hamît Şener (35) reyde rî bi rî mende. Dimayê ke serebût vejîya werte, keyeyê tute şi qereqole û gerre kerd. Dimayê gerrekerdişî 8ê teşrîna peyêne de derheqê herdi hêrişkaran de dewa ameye akerdiş. La pêwa vengê qeydkerde û îfadeyan zî 11ê teşrîna peyêne de hetê dozgerî ra qerarê bêtaqîbkerdişê derheqê dewa de ame dayîş.

 

Derheqê babete de keyeyê tute ajansê ma rê qisey kerdibi ke ganî tu kes hemverê nê serebûtî de bêveng nêmano û venga paştdayîşê rayaumumî kerdibi.

 

Ame zanayîş ke vizêr qereqole de reyna keyeyî derheqê serebûtî de îfade dayo. Sewbîna ame zanayîş ke tute seba serebûtî trawma derbaz kerda, ewro wedarnayê nêweşxane.