COLEMÊRG - Keyeyê Tahîr Gurdalî ke zindan de dinyaya xo vînî kerdbî, dîyar kerd ke nêweşîya ci hetê îdareyê zîndanî ra ameye nimitiş û vatî: “Waştişê ma tena no yo ke edalet pê bêro û ma wazenê ke tepoşteyê nêweşî serbest bêrî veradayîş.”

 

Tehlîyeyê tepişteyê nêweşî bi bahaneyanê cîya cîyayan yenê astengkerdiş û tepişeyê nêweşî bi polîtîkaya taybetî terke mergî yenê kerdiş. Tepişte Tahîr Gurdalo (53) bi serran tehlîyeyê ci ame astengkerdiş û bado cezaya ci ame taloqkerdiş 13 rojî dima dinayay xo bedelna. Gurdalî 2014î de qezaya Geverî ya Colemêrgî de bi îdîayê ‘endamtîya rêxistine’ ame destbendkerdiş. Tahîr aye wext îşkenceyanê giranan dî, mehkema qerarê tepiştişî da û sewqê zîndanê Tîpa Fyî yê Wanî ame kerdiş. Tahîro ke nizdîyê 4 aşman verê cû teşhîsê kanserê pişike ame kerdiş, seba dermankerdişî sewqê zîndanê Asayîşo Berz yê Hûmara Yewine yê Amedî bî û Nêweşxaneyê Perwerde û Cigêrayîşî yê Gazî Yaşargîlî de pê kelemçeyan ame dermankerdiş. 28ê teşrîna peyêne de cezaya Tahîrî ameye peydeştene û 13 rojî dima dinyaya xo bedelna. Cenazeya Tahîr Gurdalî 10ê teşrîna peyêne de qezaya Geverî ya Colemêrgî de ame definkerdiş.

 

Keyeyê Tahîrî ajansê ma rê qala rewşa ci kerdî û vengê serbest verdayîşê tepişteyanê nêweşan kerdî. 

 

'Îdareyê zîndanî erê xeber da ma’

 

Cinîya Tahîrî, Keyfî Gurdale da zanayîş ke heta roja ke dinyaya xo bedelna cuya Tahîrî bi têkoşîn derbaz bî. Keyfî qiseykerdişê xo de bale ant rewşa Tahîrî ser û vat: “Tepiştişê ci ra ver rewşa ci baş bî û bado ke ame tepiştiş nêweş kewt. Îdareyê zîndanî nêweşî erê ma rê vat. 9 serrî bî ke tepişte bî. Zêde nêberdêne nêweşxane. Ma nêzanayêne ke hende nêweşîya ci giran a. Ma bizanayêne hende giran a çi destê ma ra biameyêne ma do bikerdêne. Senî ke ma nêweşîya ci eşnawit ma waşt ke ci bîyarî keye. Hirî aşman zî ma ver de bimendêne do domanê mi pîyê xo bidîyayêne. La ma nêdî.”

 

‘Wa tepişteyê nêweşî serbest bêrî veradayîş’

 

Keyfîye dîyar kerd ke nêweşîya mêrdeyê aye zîndan de vejîyaya û her çend ke nêweş bibo zî nêameyo dermankerdiş û nê çîyan vat: “Eke rew biameyêne qe nêbo ma do rew dest bi dermankerdişî bikerdêne. Waştişê ma tena no yo ke edalet pê bêro. Wa berê zîndanan biabî. No dejêk giran o. Ame serê ma wa nêro serê kesêk. Mêrdeyê mi baskê ma şikit. Ganî tepişteyê nêweşî serbest bêrî veradayîş û dermankerdişê înan bêro kerdiş. Ma nêwazenê kesêk zîndan de bimiro.”

 

‘Ez têkoşînê lajê xo ra sereberz a’

 

Dayîka Tahîr Gurdalî, Fehîme Gurdale zî vat ke lajê aye pêroyê cuya xo de têkoşîn dayo û ê sey keyeyê Tahîrî têkoşînê ci ra sere berz î û wina doman: “Ez têkoşînê lajê xo ra sereberz a. Bado ke lajê mi ame tepiştiş nêweş kewt. Her çend ke nêweşîya ci zêde giran biba zî ma rê erê vatî. Eke rew biameyêne vayiş seba dermankerdişî ma do hewl bidayêne. Wa Homa heqê lajê mi înan rê nêverdo. Lajê mi na rewşa giran de kelemçe kerdêne. Tahîrî gire dayêne renza. Wa Homa nê zilmî qeul nêkerdo. Wa tepişteyê nêweşî serbest bêrî veradayîş. Wa kesêk bîn nê zilmî nêcuyo.”