STENBOL - 10 kesê ke Stenbol de amebî destbendkerdiş, dimayê karê îfadeyan ê dozgerî ameyî veradayîş.

 

Çarçewaya cipersayîşêk ke hetê Serdozgerîya Komare ya Stenbolî ameya destpêkerdiş de polîsan 23yê kanûne de xeylêk serê keyeyê qezayê Kuçukçekmece, Ataşehîr, Sancaktepeyî de eştbî. Sereştişan de îdarekarê Rêxistina Partîya Demokratîke ya Şaran (HDP) ê Sancaktepeyî Kerîm Kiliç û Ahmet Ozbey, Melek Aydogan, Şukran Altûnkaynak, Devran Kaya û Muhîttîn Guler zî mîyan de 10 kesî amebî destbendkerdiş.

 

Kesê ke berdî Mudûrîyê Polîsan ê Stenbolî yê Cadeyê Vatanî, pêvînayîşê înan yê telefonî û kitabê sereştişî de ameyî desteserkerdiş persayî û bi sûcdarîya “endamîya rêxistine” ameyî sucdarkerdiş. 2 kesî dimayê kerdişê îfadeyan ê mudurîyê polîsan ameyî veradayîş, 8 kesî zî ewro sewqê Edlîyeyê Stenbolî yê Çaglayanî bî. 8 kesî dimayê îfadeyê înan dozgerî ameyî veradayîş.