AMED - Wetha Atare da zanayîş di kênayê aye hetê mêrdeyê ke înan reyde zewecnayebî ra wextê cîyayan de ameyî qetilkerdiş û vat: “Kesêk mi nêmend. Kesêk ke paştî bido mi çin o. Kiştoxê kênaya mi ewil rema. Edalet pê nêame. La ez nêwazena Gulcane de wina bibo. Wa cinî vengê mi bieşnawê. Ez veng dana rêxistinê cinîyan.”

 

Qezaya Yenîşehîrî ya Amedî de taxa Gurdoganî de 3ê Kanûne de camêrdo bi nameyê Sezer G.yî hewl da cinîya xo Gulcan A.ye (20) qetil bikero. Gulcane bi giranî birîndar bî û nêweşxane de ameye dermankerdiş. Gulcane badê 10 rojan dinyaya xo bedelnaye la kiştox hema zî nêameyo tepiştiş.

 

‘Kênaya mi qetil kerd suc eşt tay kesan ser’

 

Dayîka Gulcane, Wetha Atare da zanayîş ke aye nêwaşta kênaya xo bi kiştoxî reyde bizewecna la kênaya aye remaya û vat: “Ez nêzana verê cû şîdet bi kênaya mi kerd ya nê. Şîdet bi aye bêro kerdiş zî qet ma ra nêvat. Rojêk mesajêk yeno telefonê mêrdeyê Gulcane û Gulcane zî vînena. Vînena ke mêrdeyê aye bi yewna kesêk re qisey keno. Munaqaşayî ra dima kiştox bi çeke hewl dano ke kênaya mi qetil bikero. Vera nê çîyan suc eşt tay kesan ser. La kênaya mi nêweşxane de beşa giran de vat ke Sezer G. Wina kerdo. Tuta 7 aşmî kênaya mi dima mend.”

 

‘Seke yewna kesêk reyde têkilîya aye esta nawnayî’

 

Wethaye ard ziwan ke Sezer G. û keyeyê ci dûrî ra merdime înan ê û her kes derheqê nê keyeyî de baş qisey nêkeno û heta vatişê sey ‘fuhuş danî kerdiş’ zî înan dima yenê vatiş. Wethaye wina dewam kerd: “Çapemenîya hetgir de tay xeberî vejîyayî. Kênaya mi xirab nawitî. Vatî ke têkilîya Gulcane bi kesêk bîn reyde esta. La kênaya mi mêrdeyê xo û keyeyê xo ra zaf hes kerdêne. Sezer G kesêk bîn reyde qisey kerdêne. Kênaya mi dî û dima ra kênaya mi ameye qetilkerdiş. Qey nê zurî bi kênaya mi kenî? Acaba seba ke cinî ya? Ez polîsan rê qereqol de vana ke kiştox kêy yeno tepiştiş, ê mi rê vanê ke do bitepişî. La kiştox teber de gêreno. Qey nîno tepiştiş?”

 

‘Ez felc a la ewnîyena domananê kênaya xo ya bîn’ 

 

Wethaye dîyar kerd ke kênaya aye Nurcane zî bi serran verê cû hetê mêrdeyo ke aye reyde zewecnayebî ra ameye qetilkerdiş û nê çîyan vat: “Dejê mi tena no nîyo. yewna dejêk mi zî esto. Mi nêwaştêne Nurcane zî bizewecîya. La aye zî sey Gulcane hes kerd û remaye. Hirê domanê aye esbî. La biyewbînan nêkerdî. Her tim munaqaşe kerdêne. Kênaya mi qetil kerd. Kiştox rema Iraq. Cezaya xo nêant. Ez nika felbîyaye ya la reyna zî ewnîyena domananê Nurcane. Torinêk mi nêweş û astengdar o. Torinê mi yê bîn  yew zewecîya, yew zî mekteb waneno. Meaşê mi yî. Yê bîn 1000 TL yo. Ez nêeşkena kîra bida.”

 

'Ez wazena cinî paştî bidî mi’

 

Wethaye qiseykerdişê xo wina peynî kerd: “Ez nê dejî ancena. Dejê mi di qat bî. Mi wirdî kênayê xo zî vînî kerd. La remayî. Wirdî zî ameyî qetilkerdiş. Bîla sebeb ameyî qetilkerdiş. Seba ke zanayêne kesêk înan çinî yo qetil kerdî. Ne mêrdeyê mi esto, ne way û birayê mi û ne zî domanê mi estî. Kesêk ke paştî bido mi çinî yo. Ez heqê domananê xo gêrena. Ez taybet wazena ke cinî wa vengê mi bieşnawî. Ez wazena ke wa Sezer G bêro tepiştiş. Qesebaya mi vêşena. Mêrdeyê mi zewecîya şî. Derde mi pere nîyo. Wa kiştoxê domananê mi bêrî cezaya xo biancî. Ez wazena cinî paştî bidî mi.”