ÎZMÎR - Cinîyan reaksîyon vera qerarê mehkemaya dewaya Denîz Poyraze mojna û dîyar kerdî ke muhakemekerdiş nêameyo kerdiş û vatî: “Heta ma nêvajê dewa qedîyaya, dewa nêqedîyena. Seba ke kerdox bivejîyê raşte ma do raşteyan de bê.”

 

7ine roniştişê dewaya Onur Gencerî ke hêrişê Partîya Demokratîke ya Şaran (HDP) ya Îzmîrî kerd û uca de Denîz Poyraze qetil kerd, ame dîyîş. Heyetê mehkema derheqê kerdox Onur Gencerî de sucê ‘kiştişê kesêk yê qestî û plankerde’ ra cezaya muebeto giran, sucê ‘zirar dayo malî’ ra 4 serr, sucê ‘binpaykerdişê destnêdayîşê awanîye’ ra 2 serr û ‘muxalefetê qanûnê çekan’ ra 3 serrî ceza birna. 

 

'Kiştox yeno pawitiş’

 

Cinîyan dîyar kerdî ke no qeraro ke ameyo dayîş nîno qebulkerdiş û vatî ke heta ke hêzê peynîya kiştoxî nêvejîyê raşte do dewaya înan dewam bikera.

 

Dayîke Fehîme Poyraze da zanayîş ke aye nêgirewtî salona mehkema û nê caardişî şermizar kerd û vat: “Kiştox yeno pawitiş. Seba ke çîyêk nêvejîyo raşte dewlete mudaxale kena, yanî malumatê ma tu çîyêk ra çin o. Wazenê pakî bikerê, bidê vîrakerdiş la ma do şêrê ser de. Wa nêvajê ma ceza da kiştoxî şima zî keyeyê xo de ronişêne. Goreyê mi kiştox dewlet o, çimkî dewlete kiştoxî pawit. Seba ke dosya bêro girewtiş ma û avûkatanê ma nêgirewtî zerre.hende avûkatî ameyî, çapemenî ameybî la nêgirewtî zerre.” 

 

‘Yê peynîya kiştoxî zî sucdar ê’

 

Fehîmeye ard ziwan ke Denîze seba ke Kurd bî ameye qetilkerdiş û ganî Kurdî wayîrê ziwan, nasname û kulturê xo bivejîyê. Fehîmeye wina dewam kerd: “Her merdimêk bi ziwanêk ameyo dinya. Wa ê ma zî ziwan, nasname, heq û kulturê ma bibo. Kiştoxê Denîze zî yê ke Kurdan qebul nêkenê ra yo. Yê ke kiştoxî pawenê hemkarê qetlîam ê. Serê her çîyî nimitî û mehkema qedênayî. Mehkema zî sucdar a. Yê peynîya kiştoxî zî sucdar ê. Kiştoxî kerdî awanî û şî Denîze qetil kerd. Wa yê peynîya kiştoxî zî ceza bigêrî. Çadire verê awanîya HDPyî ya Îzmîrî de ya. Wexto ke na çadire tîya de biba do her kes bêro tîya û sey awanîya ‘terorîstan’ bivînê. Seba ke merdiman hedef mojnenê na çadire ameye awankerdiş. Dewlete na çadire tîya de awan kerd. Ma do qerarê mehkema berê mehkemaya corîn. Seba ke kesêk bînî nêrî qetilkerdiş na dewaye xeylê muhîm a.”

 

‘No heqaret bi ma ame kerdiş’

 

Verfeka Însiyatîfê Dayîkanê Aştîye Behîye Yalçine zî ercnayîşanê xo kerd û vat: “No heqaret bi ma ame kerdiş. Her tim heqaret bi ma kenê. Kewenê partîye û merdiman qetil kenê. Seke uca de çîyêk bibê mojnenê. Ma nê çîyan qebul nêkenê. Eke avûkatî nêeşkê bikewê zerre û nêeşkê ma bipawê ecaba cezaya ke ameya dayîş do kamî rê fêdeyê ci biba? Şarê Kurd înan qebûl nêkeno. Ma tena seba Denîz Poyraze edalet nêwazenê. Ma seba heme dinyaye wazenê. Kesêk Kurdan nêvîneno, nêeşnaweno. Kesêk seba Kurdan çîyêk nêkeno. Eke Kurdî wayîrê xo nêvejîyê kesêk çîyêk zî nêkeno. Dayîkê Kurdî her ca de teda û zilm vînenê. Nê dayîkî tutanê xo seba ke bêrê qetilkerişî nêanê dinya.”

 

‘Ma do bibê Denîze û bivejîyî vernîya înan’ 

 

Platformê Cinîyî Pîya bi Hêzê (KBG) ra Dîdar Gule zî vat ke proses prosesê mehekema yo û kayî yenê kaykerdiş. Dîdare wina domnaye: “Salona roniştişî de tena kerdox û avûkatê ci estbî. Keye zî nêgirewtî zerre û avûkatan nêgirewtî zerre. Bi no hawa kayê xo kay kenê. Ma do embaz û wayê Denîze timî raşteyan waştişê edaletî bîyarî ziwan. Ma do raşteyan de bê û her tim sey Denîze înan ver de bê. Heta ke ma nêvajê dewa qedîyaya, dewa nêqedîyena.”

 

‘Ma tepîya game nêerzenê’

 

Endama Heyetê Rayîrberîya Merkezî (MYK) ya HDPyî Îdîl Ugurluye vat ke HDP demêk dergo ke sey hedef yeno girewtiş û netîceyê hedefgirewtişî de Denîz Poyraze ameye qetilkerdiş û wina dewam kerd: “Na dewaye fînayî tewr cêr ke qerarêk winasî ame dayîş. La do komel nê muhakeme bikero û na dewaye hema nêameya girewtiş. Ne hetê komel de û ne hetê Denîz Poyraze de, ne hetê HDP û avûkatan de na dewaye nêameya girewtiş. Nizdîbîyayîşê HDyî dîyar o û do têkoşînê xo dewam bikero.”

 

Hemsereka HDPyî ya Aydinî Aysel Baytar Onsele tewr peynî qisey kerd û aye zî bale ant dewa ser û dîyar kerd ke kerdox tena nêbi û peynîya nê de hêzî estê û wina vat: “Waştişê ma no nîyo ke wa kerdox cezaya giran bigêro û dewa bêra girewtiş. Ma vanê ke seba ke qetlîam yewna reye nêro cuyayîş ganî hêzê peynîya kerdoxî ke kerdox wayîr kenê bivejîyî raşte.”