COLEMÊRG - Dayîkê Aştîye ke seba wedarnayîşê tecrîdî çalakîyan pê ardbî û çalakîya înan ameybî astengkerdiş, dîyar kerdî ke heta ke tecrîdê serê Rayberê PKKyî Abdullah Ocalanî nêro wedarnayîş do têkoşînê xo dewam bikerê û raşteyan de bê.

 

Tecrîdê serê Rayberê PKKyî Abdullah Ocalanî her ke şino giran beno û 21 aşmî yo Rayberê PKKyî Abdullah Ocalan û tepişteyanê bînan ke eynî zîndanî de yenê tepiştiş Omer Hayrî Konar, Veysî Aktaş û Hamîlî Yidirimî ra xeber nîna girewtiş. Tewr peynî 25ê Adara 2021î de keye pêvînayîşk kilm yê telefonî pê ardbî. Komîteya Vernîgirewtişê Muameleyo Xirab û Îşkenceyî ya Ewropa (CPT) eşkerayîyêk da û dîyar kerd ke mabenê 20-29ê êlule de şîya Tirkîya û Îmrali ziyaret kerda. La derheqê rewşa zîyaretî de çîyêk nêame vatiş. Baroyê Huqûqî yê Asrinî badê eşkerayîya CPTyî dîyar kerd ke Abdullah Ocalan nêvejîyayo zîyaretê CPTyî.

 

Dayîkê Aştîye qezaya Geverî ya Colemêrgî de derheqê wedarnayîşê tecrîdî de waştî ke çalakî pê bîyarî. La çalakîya dayîkan ame astengkerdiş û ameyî derbkerdiş. Dayîkê Aştîye reaksîyon mojnayî na rewşe û dîyar kerdî ke heta ke tecrîd peynî nêbo do têkoşînê înan dewam bikero.

 

‘Ma tepîya gamêk nêerzenê’

 

Dayîka Aştîye Gulbeyaz Mihçîye da zanayîş ke AKP-MHP serranê peyênan de Gever de heme çalakîyanê HDPyî asteng keno û kesê ke tewrê nê çalakîyan benî zî raşt şîdetî yenî û wina vat: “Vera teda û şîdetî de ma do timî raşteyan de têkoşîn bikerî. Ma do dayîkê aştîye kêy şêrî eşkerayîyan polîs hêriş keno. Çend roje badê nê zî seba îfade vendayî ma. Ê çend gaz bierzî, çend bo copan ma bikuyî zî ma do têkoşînê xo dewam bikerî. Ma do raşteyan de bî. Seba ke ma tecrîd, mergî qebul nêkenî ma raşteyan de têkoşîn danî. Cesaretê ma rayberîya m ara yeno. Ma cinî û dayîkî heta wedarnayîşê tecrîdî do xover bidî.”

 

‘Tecrîd wedarîyo do azadî bêra’

 

Gulbeyaze dewamê qiseykerdişê xo de tecrîdê serê Abdullah Ocalan şermizar kerd û wina dewam kerd: “Ma wazenê ke tecrîd wedarîyo. Tecrîd vilayê serê heme şarê Kurdî bîyo. Eke tecrîd serê serekatîye ra wedarîyo do heme dinya azad bibo. Bi aşmano ma serekatîye ra xeber nêgênê. Keye û avûkatî nêeşkenê şêrî pêvînayîşî. CPT şî Îmrali la çîyêk nêvat. Kilîtê aştîye Birêz Ocalan o.”

 

‘Ma do vera tecrîdî de têkoşîn bikerê’

 

Dayîka Aştîye Nazdar Çelîke zî qisey kerd û vat : “Ez çend tewrê çalakî û bernameyan bîya, raştê şîdetê polîsan ameya. Tewr peynî 9ê Teşrîna Verêne de çaqeyê parlementerî şikiya. Tîya de mi zî eştî erd û linge mi kutî. Seba ke ma aştîye wazenî ma şîdet vînenê. Şîdet bi ma kerdî. Ma kutî. Herinda ke ma înan gerre bikerê, ma vendayî îfade. No 30 serrî yo têkoşîn kena. Seba ke tecrîd peynî bibo ez do têkoşîn bikera.”