ÎZMÎR - Merdimê tepişteyan dîyar kerdî ke Nobeta Edaletî biqedîya zî cigêrayîşê edaletî do dewam bikero û tîya ra pê zî heta ke edalet pê nêro do têkoşînê ma dewam bikero.

 

Merdime tepişteyanê nêweşan û tepişteyanê ke înfazê înan ameyî vêşnayîş Îzmîr de Nobeta Edaletî dabî dest pêkerdiş û yew serrî dewam kerdbî. Nobeta keyeyan 18ê Kanûne de bi siloganê ‘Tepişteyan rê azadî, tecrîd wa wedarîyo’ rayraşîyayîşêk pê ardbî û nobete peynî kerdbî. Polîsan hêrişê rayraşîyayîşî kerdbî û xeylê kesî ameybî destbendkerdiş.

 

Keyeyanê tepişteyan dîyar kerdî ke bi fînalê Nobeta Edaletî rê têkoşînê înan nêqedîyayo û vatî, heta tecrîd nêeşkê do têkoşîn bikerê.

 

‘Zulmê Îmraliyî serê şarî de yo zî’

 

Dayîka tepişteyê bi nameyê Bayram Kaymazê zîndanê Tîpê Fyê Hûmara 2yîn Tekîrdagî maneno, Medîne Kaymaz ke yew xoverdayoxa Nobeta Edaletî bî dîyar kerd ke o zulmê zîndanan û zulmê teberî qebûl nêkerê û seba nê Nobeta Edaletî dabî destpêkerdiş. Medîne wina dewam kerd: “Pêwa cezaya tepişteyan qedîyaya poşmanî tepişteyan rê yena ferzkerdiş û înfazê înan yeno veşnayîş. Serê Abdullah Ocalanî de tecrîdêk giran esto. Gelo kesêk 30 serrî tepişte bo do senîn poşmanî qebûl bikero. Ê qebûl bikerê zî ma nê zulmî qebûl nêkenê. Ma Nobeta Edaletî qedêna la ma fek têkoşînî ra vera nêdanê. Ma Dayîkê Aştîye yê. Rayberê Şarê Kurdî heps kerdî. Ber ser de padayê. Ne keye ne zî avûkatî eşkenê şêrê. Bi mîlyonan Kurdî ê sey îrade qebûl kerdê. Çend ciwanan seba ey bedenê xo da adir. Wa dewleta tirke nê baş bizano. No zulm serê şarê kurdî de yo. Têkoşîn bi ey dest pêkerd, do bi ey zî biqedîyo.”

 

‘Fermanê qirkerdişê Parîsî dayî’

 

Medîne dewam de wina vat: “Ma umud edaletî ra vera nêdayo. Ma vengê xo bi dinya da eşnawitiş. Heme kesî zanê ke ma dayîkê ke edaletî wazenê. Ma seba her kesî aştîye wazenê. Wa fek nê bêedaletî û zulmî ra vera nêdê. Kurdî Kurdê verê nîyê. Serê lingê xo vindenê. Heta serek azad nêbo, do fek têkoşîn ra vera nêdê. Wa peynîya kayanê xo bîyarê. Her roje cayêk rijnenê. Hema vizîrê fermanê qirkerdişê Parîsî dayî.”

 

Seba cuye ma do têkoşîn bikerê’

 

Medîne da zanayîş ke ê do seba cuye têkoşîn bikerê û wina qedêna: “Êdî çîyêk bêro vînîkerdiş çin o. Ma  bi hezaran tutanê xo şehîd da. Ma welatê xo de bî. Tutê ma 30-40 serrî tepişte manenê. Ma Dayîkê Aştîye yê. Ma hemverê tedayan sere nêtewênenê. Çi destê ma ra bêrê ma do bikerê. Ma do têkoşîn bikerê.”

 

‘Seba tepişteyanê azadî nobete de bî’

 

Dayîka tepişteyê bi nameyê Firat Yagmekan ke zîndanê Tîpa Fyê Hûmara 2yîn Kiriklarî de tepişte yo, Sultan Yagmekan zî bale ant serê Nobeta Edaletî û vat: “Ma seba tepişteyanê azadîye nobete de bî. Zulm tutanê ma rê kenê. Tutanê ma şirawenê cayê dûrî û amancê dewlete oyo ke ma tutanê ma ra dûr bifînê. Dayîk û pî nêeşkenê hende dûr şêrê. La çiqas dûr bifînê zî do sernêkewê. Zerrîya ma şarî reyde ya.”

 

‘Bawerîya ma bi dewlete rê çin a’

 

Sultane tewr peyîn wina vat: “Tutê ma dimayê 30 serrî çira poşman bibê gelo? Tepişteyê hemverê zulmê yeno kerdiş, do peyser game nêerzê. Seba tutanê ma çi lazim bo ma do bikerê. Bawerîya ma bi dewlete çin a. La ma do her tim paweyê edaletî yê. Vanê ma wayê û birayê yewbînan ê. A rojan ma eşkerayîye da la înan her ca ma ra girewtî. Eke ma wayê û bira bibayîne do wina nêkerdêne. Serrêke ma Nobeta Edaletî girewt la ma edalet nêdî. Nobeta ma qedîya la têkoşînê ma nêqedîya. Heta tutê ma azad nêbê ma do têkoşîn bikerê.”