Zelal Tunç

 

WAN – Hetgira Serekatîya Pêroyî ya PÎAye Menîce Gulmeze wexto ke ameye destbendkerdiş cigêrayîşo zip bi aye ame kerdiş û bi zorî sereyê aye ameye akerdiş. Menîceye da zanayîş ke wexto ke babete bena kurd û bajarê kurdan çi heyfo ke caardiş nêbedelîyeno.

 

19ê tebaxe de bi talîmatê wezîrîya karanê zerreyî hemşaredarê Partîya Demokratîke ya Şaran (HDP) yê Amed, Wan û Mêrdînî wezîfe ra ameyî girewtiş û herinda înan de qeyûm ame tayînkerdiş. Hemverê qeyûman de çalakîyê protestokerdişî xeylê bajaran de pê ameyî. Protestokerdişanê Wanî de polîsan hêrişê şarî kerd. Dekewtişê awanîya şaredarîyan ame astengkerdiş. Welatîyê ke waştî Raşteyê Cumhurî de eşkerayî bidî raştê mudaxaleyê polîsan ameyî û polîsan şîdet bi şarî kerd. Cinîyê ke sereyê înan girewte bî îşkenceyo zit bi înan ame kerdiş û laçikê înan sereyê înan ra ameyî vetiş.

 

Reaksîyonê xeylê girdan ra dima kesê ke ameyhbî destbendkerdiş serbest ameyî verdayîş û derheqê 27 kesan de hetê Serdozgerîya Komarî ya Wanî ra îdîaname ame amadekerdiş. 2. Mehkemeya Cezaya Girane ya Wanî îdîaname qebul kerd û roniştişê qerarî de derheqê 19 kesan de 5 aşmî ceza ameye waştiş û derheqê 8 kesan de zî qerarê beraatî ame dayîş.

 

Serdozgerîya Komarî ya Wanî ceza kêm dî û na reye zî ‘serê nameyê rêxistine sûc kerdî’ cezaya ke ameye dayîş rê îtîraz kerd.

 

Her çend ke qerar çinî boz î nêgirîya şaredarîye

 

Hetgira Serekatîya Pêroyî ya Partîya Merdim û Azadîye (PÎA) Menîce Gulmeza ke kesê ke na dewaye ra ameyêne muhakemekerdiş ra yew a, protestokerdişê badê tayînkerdişê qeyûman û caardişê dozgerîye ercnaye.

 

Menîceye da zanayîş ke tayînkerdişê qeyûman bêhuqûqî yo û çîyê ke ptotestokerdişî ra ver ameybî cuyayîş ercnaye: “Ma serê sibayî waşt ke rew bikewî mîyanê şaredarîye. La polîsan nêverda. Her çend ke derheqê endamanê meclîsî de qerarêk çinî bo zî nêverdayî ma dekewî şaredarî.” 

 

Wextê destbendkerdişî de cigêrayîşo zitî

 

Menîceye da zanayîş ke rojêk badê nê tewrê parlementeranê HDPyî waştî ke şêrî Raşteyê Cumhurîyetî de eşkerayîyêk bidî û wina dewam kerd: “Polîsan her ca girewtbî. Heme dekewtiş û vejîyayîşê raşteyî ameybî girewtiş. Ma waşt ke eşkerayî bidî. La polîsan bi awa tazîqlî û gazî hêrişê ma kerdî. Ma destbend kerdî. Bi rojan ma destbendkerde ameyî verdayîş. Ma xeylê cinîyî sere girewte bî. Cigêrayîşê zit b ima ame ferzkerdiş. Laçikê ma sereyê ma vetî. Badê 5 rojan laçikanê ma dayî. Dima ra ma verdayî.”

 

‘Protesto sûc nîyo’ 

 

Menîceye bale ant dewaya ke derheqê înan de ameye akerdiş ser û vat: “Her çend ke tu endamîya mi ya bi HDPyî çinî bo zî mi qerarê qeyûman protesto kerd û ez ameya destbendkerdiş. Wextê destbendkerdişî de vatî ke qey ti AKP, Huda Par ya zî yewna partîyêk de sîyaset nêkena. Mi zî vat ez vera tayînkerdişê qeyûman de ya. Tayînkerdişê qeyûman û îşkenceyê ke bi ma ameyî kerdiş bêhuqûqî yî. Serdozgerîye cezaya ke ma rê ame dayîş kêm dî û waşt ke ma nutqaya endamtîya rêxistine ra bêrî muhakemekerdiş.”

  

Wexto ke babete bena Kurd caardiş nêbedelîyenê

 

Menîceye tewr peynî vat qeraro ke derheqê înan de ameyo dayîş bêhuqûqî yo û vat: “Wexto ke babete bena Kurd û bajarê kurdan caardiş bedelîyeno. Vera kurdan de bêhuqûqîyêk gird esto.”