Medya Uren

 

AMED - Xurbet Duruya ke bi îmkananê xo viraştişê nexş û lazimîyê seke çante, sehpa musaya û roşena û pê debara xo kena, wazena akerdişê atolyeya cinîyan reyde xeylêk cinîyanê bînan rê zî karê xo bimusno.

 

Binê veresîya krîzê ekonomî de komel her çiqas problemê pîlan ciwîyeno zî tewr zêde cinî bi tesîr benê. Mîyanê nê krîzî de cinî xoverdayîşêk pîl danê.  Xurbet Duruya qezaya Çinarê Amedî de ciwîyena, bi îmkananê xo nexş û viraştişê çanteyan musaya. Bi nameyê “Kevaniya Keyeyî” û sloganê “Kedê Destan, Roşnîya Çiman” ameye naskerdiş û wazena bi kurdkî atolyeya destê cinîyan abikera û cinîyan zî bikera wayîrê kede û karî.

 

‘Mi hes kerd û serkewta’

 

Xurbete dîyar kerd ke cinî biwazê eşkenê serbikewê û vat: “Tutî de eleqeyê mi nexş û xeyatî rê estbi. Bi zewacî reyde ma kewtî mîyanê xebatê keyeyî. Ez serê medyaya dîjîtale de viraştişê çenteyan musaya. Serê medyaya dîjîtale de zî bi sernameyê kurdkî û parekerdişê kurdkî reyde mi xebatê xo da naskerdiş. No rastê eleqeyêk baş ame. Êdî bi nê mi debara xo kerd. Derûdor de xeylêk kesî mi ra vat 4 tutê to estê, ti do senîn bieşkê na xebate zî bikerê? Xeylêk kesan vat, ti do tutanê xo îhmal bikerê. La hemverê nê mi vat, eke cinî biwaza eşkena bikera. Lazim o ma astengîyan nas nêkerê. Heskerdiş û bawerî cayê her çî gêno. Nê reyde serkewtiş mumkin o.”

 

‘Es wazena atolyeya cinîyan abikerî’

 

Xurbete dîyar kerd ke bi hewldayîşê xo reyde aye resaya serkewtişêk û wina vat: “Xeylêk cinîyê ke lazimîyê înan serê lingê xo de vinderê, esto. Xeylêk cinîyê ma zî çi heyf yan seba şert û mercan yan zî seba hişmendiyê komelî nêvendayê. Ez bi taybetî wazena cinîyan rê bibî hetkar. Seba nê wazena ameyoxî de karê xo girs bikerê û seba cinîyanê bînan zî bibî hetkar. Bi akerdişê atolyêk reyde hem bimusnî, hem zî seba cinîyan wareyêk berardişî awan bikerî. No seba mi xeylêk muhîm o.”

 

‘Krîz tesîr serê ma de keno’

 

Xurbete tewr peyîn wina vat: “Her ke şino krîzê bîyaye tewr xirab beno. Çi heyf, no zî bi zêdeyêr tesîr serê ma de keno. Çîyê ke mi verê girewtêne, nika ez  3 qat giran gêna. Heta ez viraznena zî kedêke pîl dana û çi heyf gama ke roşena gerre yenê. Xeylêk kesî vanê vay o. Goreyê çîyê ke ma gênê û ma viraznenê zî danê. Her çî giran bîyo û rewşa şarî baş nîya. Hêvî kena ganî na rewşe bêra çareserkerdiş.”