WAN - Cinîyan dîyar kerd ke îqtîdar her tim cinîyan hedef gêno û sebebê nê zî no yo ke hêzê cinîyan ra terseno. Cinîyan ardî ziwan ke ganî hemverê polîtîkayanê îqtîdarî de xoverdayîşêk topyekun bibo.

 

9ê Çeleyê 2013î de Paris de  Sakîne Cansiz, Fîdan Dogan û Leyla Şaylemeze ameyî qetilkerdiş. Dima ra qezaya Silopî ya Şirnexî de endama Meclîsê Partîye (PM) ya Partîya Herêmê Demokratîkî (DBP) Sêvê Demîr, aktîvîsta Kongreya Cinîyanê Azade (KJA) Fatma Uyar û hemsereka Meclîsê Şarî ya Sîlopiyî Pakîze Nayire 4ê Çeleyê 2016î de badê qedexeyê tebervejîyayîşî bi guleyê ke wesayîtê zirxinî ra ameyî reşênayîşî, ameyî qetilkerdiş. Edîtora jineolojiye rojnameger Nagîhan Akarsele Silêmanîye de ameye qetilkerdiş. Tewr peynî zî 23ê kanûne de Evîn Goyî, Mîr Perwer û Abdurrahman Kizilî hêrişê vera Merkezê Kulturê Kurdan ê Ahmet Kayayî yê Parisî de ameyî qetilkerdene.

 

Aktîvîsta Tevgerê Cinîyanê Azadan (TJA) Dîlan Yildiz û Endama Heyeto Merkezî yê Rayîrberîya Herêmî ya Parîya Demokratîke ya Şaran (HDP) Oznur Evîne derheqê babete de ernayîşan kerdî.

 

‘Îqtîdarî kerdoxan pawenî’

 

Dîlane da zanayîş ke tîfaqê AKP-MHPyî hemverê cinîyan de polîtîkayê dişmenîye rayra beno û vat: “Îqtîdar paştî dano qetilkerdişan û kerdoxan paweno. Kiştoxê Nagîhan Akarsel talimat girewt û qetilkerdiş pê ard. Ma baş zanê ke serê pê qerarê îqtîdarê AKP-MHPyî nê qetlîyamî pê yenî.”

 

‘Ganî xoverdayîşêk topyekun bêro riştiş’

 

Dîlane qiseykerdişê xo wina dewam kerd: “Ganî ma hemverê qetilkerdiş û qirkerdişê cinîyan de vinderî. Hem Ewropa û hem zî welatanê bînan de binê tehlukeyan de yî. Her raşteyî de polîtîkayê qetilkerdişî hemverê cinîyan de pê yenî. Seba no zî ganî xeta topyekun beri riştiş. Bi taybetî hemverê cinîya Kurde de hêrişêk gird esto. Cinîya Kurd perspektîfê azadîye ronaya vernîya xo. Ma hem bi çalakîyan hem zî bi teorîyî raşteyan de bî. Çinkî her cinîya Kurde yena hedef girewtiş. No esasê xo de terse hemverê cinîya Kurde mojneno.” 

 

‘Hêriş hemverê hêzê cinîye de yo’

 

Endama Heyeto Merkezî yê Rayîrberîya Herêmî ya HDPyî Oznur Evîne reaksiyon mojnaye qirkerdişê sîyasî yê hemverê cinîya Kurde û eina dewam kerd: “Cinîya Kurde bi şîdetê îqtîdarî rî bi rî ya. Tewr peynî Evîn Goyîye Paris de ameye qetilkerdiş. Paris de qetlîyam dewam keno. No hêriş hemverê hêzo serkeş yê cinîya Kurde de ameyo kerdiş.”

 

 ‘Tirkîya û Fransa bêveng î’ 

 

Oznure da zanayîş ke qetlîyamê Parisî de Tirkîya û Fransa ortax î û wina dewam kerd: “Bi ortaxîya Tirkîya û Fransa reya diyîne Paris de qetlîyam pê ame. Wirdî qetlîyamî zî manenê yewbînan ma van ke hêriş hemverê serkêşanê Kurdî de pê ameyo. La wa baş bizanî ke cinîyan Kurde bêveng nêmanena. Ê hewl danî ke bi qetlîyaman bidî vindarnayîş la ma do bêveg nêmanî.”