Şehrîban Aslan

 

AMED - Avûkata Komîsyonê Heqanê Tutan ya ÎHDyî ya Amedî Eylul Ozgultekîne dîyar kerd ke Rozerîn Çukura ke wextê qedexeyê tebervejîyayîşî yê Sûrî de ameye qetilkerdiş berdî Mehkemaya Desturê Bingeyîn û paweyê qerarî yê.

 

Rozerîn Çukura 17 serrî 8ê çeleyê 2016î de wextê qedexeyê tebervejîyayîşî yê Sûrî yê Amedî de ameybî qetilkerdiş û cenazaya aye 5 aşman ra dima dîyabî keyeyê aye. Tehqîqato ke derheqê mergê aye de ameybî akerdiş rê serra 2021î de qerarê ‘ca tehqîqatî rê çinî yo’ dîya. Qerarê ke hetê serdozgerîya Komare ya Amedî ra ame dayîş de ame vatiş ke nameyê Rozerîne pêvînayîşê telsîzî yê endamanê Yewîya Pawitişê Sîvîlan (YPS) de vîyarîyayo.

 

Qerar de nê îfadeyê ca girewtî, “Rozerîn Çukure tarîxo verêne de pêkewtişo ke bi hêzanê asayîşî reyde vejîyayo de merda û pêvînayîşê telsîzî de yeno dîyîş ke tewrê PKK-KCKyî bîya û zabitnameyê asayîşî de zî yeno famkerdiş, coka ra serê nameyê şikdaran ca tehqîqatî rê çinî yo (…)”

 

Avûkata Komîsyonê Heqanê Tutan ya Komeleya Heqanê Merdiman (ÎHD) ya Amedî Eylul Ozgultekîne derheqê babete de ercnayîşan kerd.

 

‘Rozerîne tutêka ke xeyalê aye estbî’

 

Eylule da zanayîş ke dosyayê binpaykerdişê heqanê tutan de wexto ke şikin bi sifatanê hêzanê asayîşî bêro sey dosyaya Rozerîne tutan kenê hetgir. Eylule wina dawam kerd: “Seba ke Rozerîne Sûrî de bî bi bahaneyê ‘yewîya dewlete xira kerda’ derheqê aye de tehqîqat ame akerdiş. Rozerîne hema 17 serrî bî. Wendekarêk serkewte bî. Dersanê xo ra zaf hes kerdêne. Fotografantişî ra zaf hes kerdêne. Xeyalê aye estbî. Waştêne biba avûkat ya zî psîkolog. Wextê qedexeyî de wirzena wazena şêra verê embazanê xo yê Sûrî û dersan bixebetî. La senî ke qedexe îlan beno nêeşkena uca ra biveja û uca de manena. Dima ra gule sereyê aye keweno û dinyaya xo bedelnena.”

 

‘Ma paweyê qerarê DDByî yê'

 

Eylule dîyar kerd ke dosyaya Helîn Hasret Şene zî bi nêtaqîbkerdişî netîce bîya û destûrê cipersayîşî zî nêdayê dosyayan. Eylule wina dewam kerd: "Seba proses derg benê, ma dosya benê Dadgeha Desturê Bingehîn (DDB). Yew nê dosyan ra zî ê Rozerîne ya. Ma dosya berd DDByî. Ma nika paweyê qerarê DDByî yê. Tena rewşa Rozerîne nê, tutê bînî yê ameyê qetilkerdiş zî wina yo. Ma wazenê ke destûrê cipersayîşê dosyayan bêro dayîş. Raporê ma yê aydê mabêne serranê 2011 û 2021î goreyê dayeyê heqê cuya 228 tutan ameyo binpaykerdiş."