Sema Çaglak

 

ŞIRNEX - Şukran Oktena ke karê deştişî kena hem îdareyê xo kena û hem zî cinîyan musnena karê deştişî. Şukrane vat ke ganî cinî bieşkê bi hêzê xo payan ser de vinderê û xo muhtacê kesêk nêkerê. 

 

Cinîyî hemverê krîzê ekonomîye de têkoşîn danê, hemverê sîstemê camêrdpawitişî de her ke şino xoverdayîşê xo gird kenê û komel de cayê xo gênê. Nê cinîyan ra yew zî Şukran Oktene (33) ya ke qezaya Silopî ya Şirnexî de karê deştişî kena ya. Şukrane dikanê deştişî ke akerda de hem îdareyê xo kena, hem cinîyan musnena karê deştişî û hem zî hewl dana ke cayê karê xo bikera raşteyê xebatî yê cinîyan.  

 

‘Mi waşt ke payanê xo ser de vindera’

 

Şukrane da zanayîş ke 2 serrî verê cû dikanê xo yê deştişî akerda û nika amacê aye girdkerdişê dikanî yo û wina qala prosesê akerdişî yê dukanê xo kerd: “Karê deştişî demêk derg bî ke bala mi antene û tim vîrê mi de bî. Dima ra ez şîya kurs û demêk derg mi perwerde dî. Dima ke perwerdeyê mi qedîya mi keye de dest bi karê deştişî kerd. La tim vîrê mi de akerdişê dikanê deştişî estbî. Bi nê fikrî mi 2 serrî verê cû dikanê xo akerd. Qet şik çin o ke akerdişê dikanî zehmet bî. Donemo ke krîzê ekonomî ke her ke şîyêne xorî bîyêne de tersê mi virazîyayî la hetê esnafîye de ez qerardarbîya ke akerda verda. La mîyanê wextî de bawerîya mi bi mi ame û nika karê xo kena. Ez zana ke seba xo çîyêk kena. No zî hîssêk xeylê weş o û hîna zêde bala mi dano karê mi ser.”

 

‘Cinîyanê bînan zî xo reyde perwerde kena’

 

Şukrane dîyar kerd ke aye eynî wextî de cinîyanê bînan zî xo reyde perwerd kena û vat: “Gama ke cinî tena serê xo lazimîyanê xo pê ana û payanê xo ser de vindena o wext hêzê xo vînena û bawerîya xo bi xo ana. Coka ra mi waşt ke ezz hêz bida cinîyê ke keye de ameyî hepskerdiş û nêeşkenê îdareyê xo bikerî û seba înan cayê karî akera. Bi nê amacan ez perwerdeyê deştişî dana cinîyan. Nika 12 musayoxê mi estî û qaseyo ke destê mi ra bêro ez înan musnena deştişî, seba ke muhtacê kesêk nêbî. Xeylê cinîyî seba ke bimusî muracatê mi kenî la seba ke dikanê mi şenik o ez nêeşkena hemeyan bigêra. La heta ke destê mi ra bêro ez do hewl bida ke hîna zêde perwerde bikera.”

 

‘Ganî cinîyî xo muhtacê kesêk nêkerê’

 

Şukrane tewr peynî ard ziwan ke esnafê ke tewr zêde zehmetî ancenî yê cinî yî û wiseykerdişê xo wina peynî kerd: “Çi heyfo ke cinî zêde nîyî. Çimkî yeno waştiş ke cinî timî zereyê keyeyî de bimana. Ez serê sibayî saet 7î de yena dikan û heta şewe xebetîyena. Cinî xeylê kede danî. Ganî keda cinîyan bêra dîyîş. Ganî cinî payanê xo ser de vinderî û muhtacê kesêk nêbî. Dima ke dikan de xebetîyaya, bi hawayêk pozîtîf cuya mi bedelîya. Êdî ez zana ke se bikera û goreyê aye cuya xo rayra bera.”