ANQARA - Rojnamegera ma Habîbe Eren û Oznur Degere zîndan ra serê nameyê rojnamegeranê tepişteyan mesaj şirawitî vengê wayîrvejîyayîşî kerdî.

 

Kurdistan û Tirkîya de her çend ke 87 rojnamegerî 10ê Çeleyî Roja Rojnegeran tîya de pêşwazî bikerî zî bı seyan rojnamegerî zî raşteyan de wexto ke karê xo kenî yenê astengkerdiş û teda bi înan yena kerdiş.

 

Rojnamegerê ma Habîbe Eren û Oznur Degere ke Zîndanê Cinîyan yê Sîncanî de yenê tepiştiş 10ê Çeleyî Roja Rojnegeran de serê nameyê 9 rojnamegeranê ke 25ê cotmehe de ameyî destbendkerdiş û 29ê cotmehe de ameyî tepiştiş de mesajêk şirawitî.

 

'Ma nêwazenê bêrî şuxulnayîş'

 

Oznure ard ziwan ke 10ê Çeleyî sey rojnamegerê ke nêwazenî bêrî şuxulnayîş zîndan de pêşwazî kenî û nê çîyan vat: "Roja ke qanûnê sansurî ameyo ra nata zextê serê çapemenîya azade zêdîyayo. Sey kedkaranê çapemenîya azade, seba ke şar bireso heqanê xo yê resnayîşî ma têkoşîn danî. Ma heme hêrişanê hemverê xo hucreyan de raşte ra wedarnenî û adetanê çapemenîya azade bi kalemanê azadan domnenî. Ma do têkoşînê xo yê azadîye her raşteyo ke ma tedeyî de dewam bikerî ke heme fikir bi hawayêk azad bêro ziwan û kalemî bê sansur bêrî şuxulnayîş. 87 rojnamegerî ewro zîndanan ra pêşwazî kenî. Ma seba heme rojnamegerannvengê wayîrvejîyayîş kenî û heqê malumatgirewtişî kenî."

 

Habîbeye zî mesajo ke şirawit de nê çîyan ard ziwan ser: "10ê Çeleyî bi taybetî nê rojan de hina bi mana yo. Çimkî rojnamegerî hem nêeşkenê bişuxulî û hem zî azadîya xo ra bêpar ameyî verdayîş... La vera hende astengîyan û polîtîkayanê zextan zî yê ke seba rayaumûmî û seba eşkerkerdişê raştîyan rojnamegerî kenî estî. Coka  ra ganî herkes wayîrê rojnamegeran û heqanê malumatgirewtişî bivejîyo."