Rozerîn Gultekîn

 

STENBOL - Parlamentera HDPyî Dilşat Canbaz, dîyar kerd ke Tifaqê Azadî Kede do 15ê çeleyî de bi mîtîngêkê startê weçînayîşî bido vat: “Hêzê ma yê vurnayîşî esto û ma bi nê îdiayî kewenê rayîr.”

 

AKP 21 serrî yo bi polîtîkayê şer û netewperestîyê îqtîdarê xo paweno. Rewşêka kaosî de şarê Kurdistanî û Tirkîya amadekarîya weçînayîşê serra 2023ine keno. Hemverê Tifakê Cumhur û Milletî yê bi zîhniyetê serdestî yê camêrdan amadekarîya weçînayîşî keno, Tifaqê Azadî û Kede seba şaran beno hêvî. Tedayê Tifaqê Azadî û Kede do 15ê Çeleyî de Raşteyê Kartalî de startê xebatê weçînayîşî bido.

 

Parlamentera Partîya Demokratîke ya Şaran (HDP) ya Stenbolî Dilşat Canbaz, derheqê kombîyayîşê ke 5ê çeleyî de pê ame û sewbîna mîtîngo ke do 15ê çeleyî de pê bêro de ajansê ma rê qisey kerd.

 

'Mîyanê şer û krîzê ekonomî de weçînayîş’

 

Dilşate, destpêkê qiseykerdişê xo de bale ant serê rayîrê hîrên û vat: “Hemverê a bê alternatîfiyê Tifaqê Cumhur û Milletê Rayîrê 3ine muhîm o û Tifaqê Azadî û Kede alternatîf o. No tifaq do dimayê weçînayîşî zî pîya bişuxulîyê. Ma do mîyanê şer, feqîrî û krîzê ekonomî de bikewê weçînayîş. Seba çareseriya probleman ganî kurdî, elewî û cinîyî serê masa de kom bibê û rayîrê çareserî xêz bikerê. Îqtîdar her tim vano ma kerd û masaya 6 zî vanê ma do bikerê. Belê, kam bikero bizano ke xelasî destê înan bixo de ya.”

 

'Hemverê hêrişan de têkoşîno wertax ferz o'

 

Dilşate dîyar kerd ke rewşêk kaosî de prosesê weçînayîşî de hesabê HDPyî yê hetkarîya xezîneyî ame blokekerdiş û wina vat: "Dewaya girewtişê HDPyî û Dewaya Kobanê dewam kenî, hemverê qanûnanê xo l Mehkemaya Berzî qerar dana û no qerar sîyasî yo. Hetkarîya xezîneyî qezencêk nîyo heq o. Vîşêrê hetkarîya xezîneyî do no weçînayîş pê bêro. Çimkî ma şarî ra hêz gênî. Ma partîyêk tabelayî nîyî û fikrê ma raşte de yî. Parlementerîya partîya ma yena betalkerdiş, dewaya girewtişî yena akerdiş û hetkarîya xezîneyî yena birnayîş. La partîya 3ine ya Tirkîya tena bi şirawitişê mesajêk û temeniyî no problem nîno çareserkerdiş. Hemverê her tewirê hêrişan de ganî têkoşînêk wertax bêro dayîş."

 

'Kombîyayîşê ma do dewam bikerî'

 

Dilşate da zanayîş ke Tîfaqê Azadîye û Kere seba şaran do bibo umudêk û wina vat: "5ê çeleyî de ma kombîyayîşêk pê ard. Kurd, sosyalîst, welatparêz û şorişgerî tewrê kombîyayîşî bîyî û ma rojeva Tirkîya bi pêroyî ercna. Babeta serekkomarîye, parlamenterî û profîlê namzedan ameyî ercnayîş. Bi taybetî ma serê çiyî de waştişan bikerî ercnayîşî ameyî kerdiş. Kombîyayîşê ma do heta peynîya çeleyî dewam bikerî."

 

'Hêzê ma yê bedelnayîş esto'

 

Dilşate ard ziwan ke tîfaq do mîtîngê xo yê yewine 15ê çeleyî de pê bîyaro û wina peynîya qiseykerdişê xo ard: "Ma mîyanê feqîrîye û şerî de kewenê weçînayîşî. Tîfaqê Azadîye û Kede reya yewineyo ke bi mîtîngêk gird bivejîyo vernîya ma. Ma do vajî, hemverê kaosî umud. Ma umudê xo yê destkewtişanê cinîyan, xoverdayîşê karkeran, kurdan û embazanê xo yê tepişteyan ra gênî. Hêzê ma yê bedelnayîşî esto û ma bi nê hêzî kewenî rayîr. Mîtingî ma yê Kurdistan û Tirkîyayî badê mîtîngê Kartalî do dest pêbikerî. Tirkîya kewte mîyanê atmosferê weçînayîşî û ma do zî 15ê çeleyî de startê hadreyîyanê weçînayîşî bikerî. Nê sebebî ra ma veng 7 serrî ra heta 70 serrî danê hemwelatîyan ke wa ma reyde bî.”