ANQARA - Qirkerdişê Garê Anqarayî kewt aşma 87ine. Merasîmê vîrardişî de wina ame vatiş: “’87 aşmî yo 87 gamî zî nêameyê eştiş. Peynîya peynî de yê heqdarî serbikewê.”

 

Endamê DAIŞî mitîngê hêzê ked û demokrasîyî yê 10ê Teşrîna Verêne 2015ine ê vernîya Garê Anqarî de bomba teqênayî û qirkerdişê pîlî pê ardî. Qirkerdişê Anqarayî ke kewt aşma 87ine. Komeleya Aştîye ya 10ê Teşrîna Verêne (10 Ekîm-Der) seba vîrardişê 104 kesê ke qirkerdiş de dinyaya xo bedelnayî, vernîya Garê Anqarayî merasîmê vîrardişê organîze kerd. Rêxistina Partîya Demokratîke ya Şaran (HDP) ê Anqarayî zî tewrê vîrardişî bî. Vîrardiş de pankartê ke fotografê kesê dinyaya xo bedelnayî ameyî akerdiş û beşdaran sloganê “10ê Teşrîna Verêne xo vîr ra meke û mede xovîrrakerdiş” berz kerdî.

 

Sere de seba kesê dinyaya xo bedelnayî rêze ame girewtiş û dima ra zî Sereka 10 Ekîm-DERî Mehtap Sakîncî Coşgun qisey kerd û vat: “Yew keyeyê 10ê Ekîmî zî Sîbel Tekîn a. Tekîne, 87 aşmî yo tîya de qeydê dijîtalî girewtêne, temamê karê hafizayê dijîtale aye xo ser de girewtib, nê prosesî de belgefîlmê zaf girîng viraştî û seba ke qirkerdiş nêro xovîrrakerdiş kedêke pîl da. Sîbele nika paweyê edaletî ya.”

 

Mehtape nê çî var: “Dewayê îdarî hetê Dadgeha Kargerî yê Berzî û dadgeha corî ra ameyî redkerdiş. Bi 87 aşmî yo 87 gamî zî nêameyê eştiş. Prosesêkê wina de yê heqdar do serbikewê. Ma ewro kuçeyan de pîya paştdayîş kenê û bawer bikerê do veng nêşêro.”